Рәсәй Президентын һайлауға әҙерлекте һәм тауыш биреү барышын тикшереү өсөн Башҡортостанға сит ил күҙәтеүселәре килә башланы. Республиканың Үҙәк һайлау комиссияһы рәйесе Хәйҙәр Вәлиев уларҙың икәүһе – Европала хәүефһеҙлек һәм хеҙмәттәшлек ойошмаһының Демократик институттар һәм кеше хоҡуҡтары буйынса бюроһы миссияһы вәкилдәре – менән осрашты.
Швециянан Ханс Биргер Нареског менән Литванан Людмила Блинова һайлау участкаларын барып ҡарау, кәрәкле мәғлүмәттәрҙе алыу мөмкинлеге менән ҡыҙыҡһынды, сөнки тауыш биреүҙе күҙәтеүҙе маҡсатҡа ярашлы ойоштороу өсөн был – мөһим шарт. Халыҡ-ара миссия вәкилдәренең айлыҡ эш планы тикшерелде, талаптары тыңланды. Хәйҙәр Вәлиевтең әйтеүенсә, һайлау алдынан республикаға сит илдәрҙән тағы ла бер нисә күҙәтеүсе киләсәк.
Рәсәйҙең Үҙәк һайлау комиссияһынан хәбәр итеүҙәренсә, 1 февралдән илдең 32 төбәгендә Европала хәүефһеҙлек һәм хеҙмәттәшлек ойошмаһының Демократик институттар һәм кеше хоҡуҡтары буйынса бюроһынан 40 вәкил эш башлаған. Тауыш биреү көнөнә ҡарай күҙәтеүселәр артасаҡ. Дөйөм алғанда, халыҡ-ара күҙәтеүҙә, Дәүләт Думаһына һайлауҙағы кеүек үк, 600-ҙән ашыу кеше ҡатнашасаҡ.
Мәғлүм булыуынса, декабрҙәге кампания барышында Башҡортостанда сит илдәрҙән 15 күҙәтеүсе эшләне, улар беҙҙә тауыш биреү һөҙөмтәләренә насар йоғонто яһарлыҡ бер ниндәй ҙә етешһеҙлек тапманы.