Улар Цзянси провинцияһының бер нисә ҡалаһында уҙғарылған Башҡортостан бизнесы көндәрендә ҡатнашты, республика­ның иҡтисади ҡеүәте менән таныштырыу сараларын үткәрҙе.
Республикабыҙ Ҡытай менән аҙыҡ-тү­лек, химия сәнәғәте продукцияһын һәм ауыл хужалығы машиналары өлкәһендә хеҙмәттәшлеккә әҙер. Атап әйткәндә, бөгөн беҙҙә сыр ризыҡтары, аҡ май күпләп етеш­терелә. Предприятиеларыбыҙ шулай уҡ ярма, он, айырыуса арыш оно, шәкәр, ли­кер-араҡы, колбаса ризыҡтары, йылҡы, һыйыр, ҡош итенән нәзәкәтле ашамлыҡ­тар, бал, уны эшкәртеү продукттары, картуф, һуған, кәбеҫтә, ҡыяр, татлы борос, шулай уҡ төрлө ҡатнашмалар, биологик препараттар, үҫемлектәр өсөн ашламалар, ауыл хужалығы культураларын һаҡ­лау һәм уңышын арттырыу мөмкин­леген биргән фунгицид, гербицидтар ме­нән тәьмин итеү мөмкинлегенә эйә.
Республикала ауыл хужалығы машиналары етештереү яйға һалынған. Башҡорт­остан Ҡытайға тағылмалы һәм аҫылмалы ҡоролмалар, мал аҙығы етештереү һәм таратыу машиналары һатырға әҙер. Мәҫә­лән, сәсеүлектәрҙе эшкәртеү өсөн ГАРД уникаль ҡорамалын ғына алайыҡ. Уны баҡсасылыҡта ла файҙаланырға мөмкин.
Төбәктә уңышлы тормошҡа ашырылған инвестиция проекттарына килгәндә, Николай Коваленко шуларҙың ҡайһы берҙәренә иғтибарҙы йүнәлтте. Шәкәр сөгөлдөрөн эшкәртеү комбинатын (“Джут” йәмғиәте), ауыл хужалығы продукцияһын ҡалдыҡһыҙ йыл әйләнәһенә үҫтереү технологияһына эйә булған күп йүнәлешле “Эко Терра” автономиялы агросәнәғәт комплексын, ал­дын­ғы биотехнологиялар нигеҙендә киптерелгән елемсә, крахмал, мал аҙығы сүпрәһе, глюкоза-фруктоза һәм мальтоза шәрбәте алыу мөмкинлеген биргән бой­ҙайҙы тәрән эшкәртеү комплексын төҙөү һәм башҡалар – улар араһында иң мөһимдәре.