Июлгә хас булмаған көндәр сентябрҙе лә хәтерләтеп ҡуя ҡайсаҡ. Ҡыҫҡаһы, һауа торошо көйһөҙләнеп торһа ла, Миәкә тарафтарына юлландыҡ. Дим яҡтарында халыҡтың көнитмеше нисек? Ысынында, ҡайһы ғына районды алып ҡараһаң да, барыһында ла тиерлек бер үк хәл: ғаиләһен ҡарайым тип, ирҙәр Себер юлын тапай, шул уҡ ваҡытта йәштәр район үҙәк­тәрендә төп­ләнеүҙе хәстәрләй. Ә ауылда ҡарт-ҡоро ғына ҡалып бара.
Аксен ауылын үтеп, унан Иванай тауын артылып, һулға ҡайы­рылғас, күнәк менән ҡойған шикелле яуған ямғыр “шып” туҡ­таны ла ҡуйҙы. Миәкә районы хаки­миәтенең кадр­ҙар һәм мәғлүмәт-аналитика бүлеге етәк­сеһе Хәлил Мәхейәнов менән алдан һөйләшкәнсә, юл ыңғайын­да булғас, иң беренсе Бикҡол ауыл Советы биләмәһендәге “Үҙәк” МТС-ының Миәкә филиалына табан юл тоттоҡ.
– Автомобилегеҙгә ҡарағанда көс­лө ямғырға эләккәнһегеҙ шикелле, – тип ҡаршы алды беҙҙе ауыл хакимиәте башлығы Илдар Заһиҙуллин. – Ә беҙҙә тыныс, ҡояш та йылмайып алды. Әйткәндәй, ауыл кешеләре бында артыҡ өҙгөләнмәй генә донъя көтә. Иң мөһиме – МТС халыҡты эш урындары менән тәьмин итте, уға күптәр рәхмәтле. Ниндәйҙер районда баҫыуҙар ташландыҡҡа әйләнгән­дә, шөкөр, беҙҙә барыһы ла эшкәртелә.
Баш ҡалалағы һәм бүтән яҡ­тар­ҙағы хәл тураһында ла һөйләшеп алдыҡ.
Сәтәй-Бөрйән ауылына етәрәк баҫыуҙа комбайндарҙы күргәс, кү­ңелгә йылы булып китте. Юғиһә, ҙур дүрт район аша үтеп тә баҫыу­ҙарҙа бер комбайн да күҙгә салын­мағайны бит.
“Үҙәк” МТС-ының Миәкә филиалы менеджеры Вадим Иҙ­рисов билдәләүенсә, көндәр арыу тор­ғанда бөтә көс арыш урып йыйыуға йүнәлтелгән. Уны бө­төүгә бойҙай һәм арпаға дәррәү төшәсәктәр.
Үткән йыл менән сағыштыр­ғанда, уңыш әҙерәк булыр, тип фаразлай миәкәләр, сөнки нәҡ кәрәк саҡта – сәсеү тамам­ланғанда – ергә тамсы ла ямғыр күҙе төшмәгән. Шу­лай булыуға ҡарамаҫтан, ашлыҡты ярайһы уҡ мул үҫтереүгә өлгәш­кәндәр, уртаса алғанда иген культу­раларының гектар ҡеүәте 18,5 центнерға етер тип күҙаллайҙар.
Ҡеүәтле “Челленджер” маркалы комбайндарҙың баҫыуҙы иңләүенә ҡарап тороуы кинәнес. Еңел йөрөй­ҙәр, боҙолоп бармай­ҙар, ҡолас­тары киң. Ураҡ барышы тураһында мәғлүмәт туп­лағанда ра­йон хакимиәте баш­лығы Зәй­нул­ла Насировты ла осраттыҡ. Хәс­тәрлекле хужа уттай ҡыҙыу эш ва­ҡытында кабинетта ултырып сы­ҙай­мы? Зәйнул­ла Хәбибулла улы, егеттәргә уңыштар теләп, юлын артабан дауам итте.
– Хакимиәт башлығының иген­селәр янына килеп китеүе бер бөгөн генә түгел, – ти Вадим Иҙ­рисов. – Ундай сәфәр һәр бере­һенә дәрт өҫтәй, эшкә йүнәлеш бирә, кәңәштәр ярап ҡала, ғө­мүмән, килә­һе көндәргә өмөт уята. Ху­жаның алдан әйтмәйенсә киле­үенә күптән өйрә­неп бөттөк инде.
Был хужалыҡта Бикҡол, Әбеш, Маяҡ, Рассвет, Садовый, Сәтәй-Бөрйән ауылдарынан ғына түгел, райондың бүтән яҡтарында йә­шәү­селәр ҙә эш тапҡан.
Өфөгә ҡайтырға сыҡҡанда Әл­шәй районы тирәһендә һибәләй башлаған ямғыр артабан көсәйҙе генә. Бүтән урында түгел, Миә­кәлә икән ураҡтың ҡыҙған ере тигән фекергә килдек. Бирһен Хоҙай! Сәсеүен сәскәс, уңышты йыйып алыу ҙа фарыз бит.