Башҡортостанда бер үк ваҡытта ике кадрҙар үҙәге асылды

Башҡортостан Башлығы Радий Хәбиров һәм Рәсәйҙең хеҙмәт һәм социаль яҡлау министры урынбаҫары Дмитрий Платыгин видеоконференцбәйләнеш режимында Дыуан һәм Баҡалы райондарында «Рәсәйҙә эш» ике модулле кадрҙар үҙәген асты.

Хәтерегеҙгә төшөрәбеҙ, 2024 йылда Башҡортостан халыҡ мәшғүллеге хеҙмәтен комплекслы яңыртыу буйынса проекттың икенсе тулҡынында ҡатнашты. Төбәктә эшләп килгән 69 кадрҙар үҙәгенең 51-е яңыртылды.

«Былтыр кадрҙар үҙәктәре яңыртылған 12 төбәк араһында тап Башҡортостан эшһеҙ булып иҫәптә тороу ваҡытын ҡыҫҡартыу темптары буйынса алдынғы урынды биләй, — тип билдәләне Дмитрий Платыгин. — Мәшғүллек хеҙмәтенең яңы нөктәләрен асабыҙ, шул рәүешле беҙ илдә яңы, яңыртылған кадрҙар үҙәктәре селтәрен нығытабыҙ һәм үҫтерәбеҙ. Бөгөн кадрҙар үҙәктәре ниндәйҙер сәбәптәр менән эшһеҙ ҡалғандарға ғына түгел, карьераһын үҫтерергә теләгән һәр кемгә ярҙам итергә әҙер. Кадрҙар үҙәктәрендә эш биреүселәргә етди иғтибар бирәләр, төбәк иҡтисады үҫешенә өлөш индерәләр».

2025 йылдың аҙағына Рәсәйҙең 46 төбәгендә 1200-гә яҡын яңыртылған кадрҙар үҙәге асылырға тейеш.

Радий Хәбиров билдәләүенсә, яңыртылған кадрҙар үҙәге бинаны ремонтлау ғына түгел. Бында күрһәтелгән хеҙмәттәр даирәһе эш эҙләүҙә ярҙам күрһәтеүгә ҡарағанда күпкә киңәйтелде.

«Тәрәнерәк комплекслы эш алып барыла. Шуға күрә мәшғүллек хеҙмәте хеҙмәткәрҙәренә рәхмәт белдерәм. Һеҙгә уңыштар, именлек теләйбеҙ. Дыуан һәм Баҡалы райондарында «Рәсәйҙә эш» модулле кадрҙар үҙәктәрен сафҡа индерергә рөхсәт бирәм. Ә Рәсәйҙең Хеҙмәт һәм социаль яҡлау министрлығына хеҙмәттәшлек өсөн тағы бер тапҡыр рәхмәт», — тип йомғаҡ яһаны Радий Хәбиров хөкүмәттең оператив кәңәшмәһендә.

https://www.bashinform.ru/news/nacproject/2025-11-17/v-bashkirii-odnovremenno-otkryli-dva-kadrovyh-tsentra-4469895