Башҡорт халыҡ ижадында, әҙәбиәтендә, сәнғәтендә бай тормош тәжрибәһенә эйә булған, шул уҡ ваҡытта шаянлығын, саялығын һаҡлап ҡалған ауыл бабайы персонажы йыш осрай. Башҡорт бейеүҙәрендә ул айырыуса сағыу кәүҙәләнә. Үҙенсәлекле хореограф, Башҡортостандың атҡаҙанған мәҙәниәт эшмәкәре Йәүҙәт Бикбирҙин "Һәтәү Әминский" бейеүендә тыуҙырған ҡабатланмаҫ образ — быға асыҡ дәлил.
Тамашасылар был бейеүҙе тәүге тапҡыр мәшһүр артист Рәфҡәт Юнысов башҡарыуында күрҙе. Башҡорт дәүләт филармонияһында эшләгән осорҙа "Һәтәү Әминский" һәр саҡ көслө алҡыштарға күмелер ине. Йәүҙәт Бикбирҙин был бейеүҙе Рәфҡәт Юнысов өсөн махсус ҡуйҙы, шул уҡ ваҡытта Ялталағы халыҡ-ара конкурсҡа ла әҙерләне. "Һәтәү Әминский" бейеүенең персонажы — шаянлығы, йор һүҙлелеге менән айырылып торған ауыл бабайы. Йәүҙәт Бикбирҙин кешеләрҙе, тәбиғәт күренештәрен, ҡоштарҙы, хайуандарҙы күҙәтеп, үҙенең бейеүҙәре өсөн элементтар табыр ине. "Һәтәү Әминский"ҙы ҡуйғанда ул персонаж прототибының холоҡ-фиғелен аҙналар буйы өйрәнгән, уның тураһында ауылдаштарынан һорашҡан.
Һөҙөмтәлә башҡарыусынан ҙур оҫталыҡ, образға тулыһынса инеүҙе, сағыу мимика талап иткән бай йөкмәткеле бейеү тыуа. Таҡмаҡтар менән биҙәлеүе башҡарыусы өсөн өҫтәмә ҡатмарлылыҡ тыуҙыра, әлбиттә, уның ҡарауы бейеү йәнлерәк, дәртлерәк булып китә. Рәфҡәт Юнысовтан башҡа был образды сәхнәлә тулыһынса асып биреүселәр күп түгел. Тап "Һәтәү Әминский" аша бейеүсе һәм хореограф Йәүҙәт Бикбирҙиндың ҡабатланмаҫ таланты, ғәйәт ҙур ижад ҡомары тулыһынса асыла.
Мәшһүр бейеүсе сәхнәлә тыуҙырған ҡыҙыҡлы образдар бихисап. Тарихи, илһөйәрлек юҫығындағы бейеүҙәр айырым урын биләй. Уларға "Каруанһарай", "Бөрйән яугирҙәре", "Урал аша", "Маршрут", "Игеҙәков", "Ҡаһым түрә", "Ҡараһаҡал", "Кинйә", "Бейеш ҡараҡ", "Юлғотло", "Төйәләҫ йылғаһы ярында", "Ҡара юрға", "Колхоз йәштәре" инә.
1812 йылғы Ватан һуғышынан еңеү менән ҡайтҡан башҡорт яугирҙәренә арнап ХVII быуат башында тарихи шәхес Байыҡ сәсән тарафынан башҡарылған "Байыҡ" бейеүе вариацияларының авторы ла — Йәүҙәт Бикбирҙин. Бөгөн төрлө сәхнәлә "Түңгәүер Байығы", "Үҫәргән Байығы", "Тамъян Байығы", "Ҡыҙҙар Байығы", "Ушанов Байығы", "Атайым Байығы" башҡарыла.
Хореографтың ижады, шул иҫәптән "Сонайым", "Ҡара тауыҡ", "Кәкүк", "Күсәй зимагорҙары" кеүек шаян бейеүҙәр Баймаҡ районында Йәүҙәт Бикбирҙин ҡатнашлығында ойошторолған "Ирәндек" халыҡ бейеүҙәре ансамбле репертуарының нигеҙен тәшкил итте һәм әле лә шулай. Башҡортостан юлдаш телевидениеһы үткәргән "Байыҡ" республика конкурсында ла уның бейеүҙәре ҙур урын биләй. Ошондай исемле тәүге бейеү конкурсы Йәүҙәт Зәйнулла улының башланғысы менән 1996 йылда Баймаҡ ҡалаһында ойошторолғайны.
Йәүҙәт Бикбирҙиндың сағыу һәм талантлы бейеүсе булыуы биографияһындағы айырым биттәрҙән үк күренә. Ул 1952 йылдың 10 июнендә Баймаҡ районының Күсей ауылында тыуған. Ун өс бала тәрбиәләнгән ғаиләлә Йәүҙәт унынсыһы була. Әйткәндәй, Бикбирҙиндарҙың бөтә балалары ла тормошта үҙ урынын тапҡан. Туғандары әйтеүенсә, Йәүҙәттә бала саҡтан уҡ бейеүгә һәләт асыҡ сағыла. Ул ете айҙан атлап китә, өс йәш ярымда бейей башлай. Һәр саҡ артист булырға хыяллана. Ауыл хужалығы институтына уҡырға бар, тип өгөтләһәләр ҙә, Стәрлетамаҡ мәҙәни-мәғрифәт училищеһына инә. Баймаҡ мәктәп-интернатында уҡыған осорҙа Башҡортостан ауыл хужалығы институты студенты булған ағаһы Саматҡа яҙған хаттары һаҡланып ҡалған. Бишенсе класта белем алыусы Йәүҙәт былай тигән: "Мәктәптә концерт ҡуйҙыҡ. Мин "Яблочко" менән "Бригадир" бейеүҙәрен башҡарҙым. Сәхнәгә алҡышлап ике-өс тапҡыр саҡырҙылар, хәлдән тайҙым".
Фәйзи Ғәскәров исемендәге дәүләт академия халыҡ бейеүҙәре ансамбленең Германия буйлап гастролдәре барышында Дрезден ҡалаһы башлығы Йәүҙәт Бикбирҙин башҡарған "Ҡара тауыҡ" бейеүенә һоҡланыуын йәшермәйенсә, уға бүләккә бер сумаҙан тапшырған.
Ҡайһы саҡта тарихҡа инеү өсөн ижад кешеһенә бер талантлы әҫәр ҙә етә. Йәүҙәт Зәйнулла улы 44 йыл ғүмере эсендә ике тиҫтәнән ашыу бейеү ижад итте, уларҙың һәр береһе — башҡорт сәнғәтенең сағыу өлгөһө. Шул уҡ ваҡытта уның ижади мираҫы әлегә тулыһынса өйрәнелмәгән. Яҡташтарында, дуҫтарында, туғандарында, журналистарҙа, башҡорт мәҙәниәте өлкәһендәге тикшеренеүселәрҙә был хәл билдәле бер фекер тыуҙырырға тейештер.