Йолаға әүерелгән был байрамдың яҙғы баҫыу эштәре тамамланғас үткәрелеүенә ғәҙәтләнгәнбеҙ. Ә Шайморатов ауылы халҡы һабантуйҙы ҡыш ойошторҙо.

Их, бар ине колхоздарҙың гөрләп торған сағы, тип һағынып һөйләргә генә ҡалды. Эйе, уҙған быуат аҙағындағы үҙгәртеп ҡороуҙар күмәк хужалыҡтарҙы ситләп үтмәне. Элек ауыл халҡының төп өлөшө колхозда мәшғүл булһа, хәҙер, техника заманында, баҫыуҙағы, фермалағы эште ни бары бер нисә тиҫтә кеше башҡара.
Ваҡытында даны киң таралған Шайморатов исемендәге колхоз нигеҙендә ойошторолған яуаплылығы сикләнгән йәмғиәткә Артур Нурғәлиев етәкселек итә. Уның бар эште оҫта ойоштороуы арҡаһында донъя иҡтисадында хөкөм һөргән финанс көрсөгө лә, тәбиғәттең көйһөҙләнеүе сәбәпле һуңғы йылдарҙа булған ҡоролоҡ та әллә ни бәкәлгә һуҡманы. Һыйырҙар һаны, мал аҙығы әҙерләү, һауым һәм башҡа күрһәткестәр буйынса шайморатовтар районда — алдынғылар рәтендә. Ҡыш уртаһында һәр һыйырҙан тәүлегенә 20-шәр литр һөт алыу үҙе генә ни тора! Элегерәк йәйләүгә сыҡҡас ҡына һауым арта торғайны.
Әлбиттә, бының нигеҙендә — Варшавка һәм Шайморатов ауылдарындағы алдынғы технологиялы фермаларҙың уңышлы эше. Хәҙер унда һигеҙ кешене бер оператор алмаштыра. Һауынсылар Наилә Мәғзүмова, Эльвира Хәмзина, Илүзә менән Гөлсинә Әминеваларҙың тырышлығы бушҡа түгел. Малсылар Сабит Хәсәнов, Рәфис Әминев тә күп көс һала, ветеринария белгестәре Елена Ғилметдинова менән Әнүзә Фәхрисламова малдың һаулығын даими күҙәтә. Былтырғы һөҙөмтәләр ҡыуанырлыҡ: иген культуралары гектарынан 16-шар центнер уңыш бирһә, шәкәр сөгөлдөрөнөкө 432 центнер тартты. Яңы төр үлән сәсеү ҙә малсылыҡты үҫтереүгә булышлыҡ итә. Ҡайһы бер үҫемлектәрҙән йылына бер нисә тапҡыр уңыш алып була. Беренсе һәм икенсе ураҡ бесән, сенаж өсөн ҡулланылһа, көҙ алынғаны малға йәшел килеш ашатыла.
Бөгөнгө йәмғиәт етәксеһе алдына ҡуйған бурыстарын да, пландарын да тулыһынса үтәй, шул уҡ ваҡытта ауыл халҡының мәнфәғәттәрен дә күҙәтә. Мәҫәлән, иң мөһим проблема булған һыу мәсьәләһе хәл ителде. Ә нисәмә йыл һыуһыҙ интеккәйнек! Күп кенә ауылдарҙа кешеләрҙең биҙрәләп, феләкләп һыу ташыуына юлығабыҙ. Пай ерҙәрен дә хужалыҡҡа тулы ышаныс менән тапшырҙыҡ. Уның өсөн халыҡҡа иген, һалам бүленә. Ҡоролоҡ булыу сәбәпле, бурыстары түләнеп бөтмәгән, әлбиттә, әммә мәсьәлә ыңғай хәл ителер тип ышанабыҙ. Юҡҡа ғына Артур Нурғәлиевте халыҡ бер тауыштан район Советы депутаты итеп һайламаны – уның бар эште лә атҡарып сығырына иманыбыҙ камил. Ҡыш уртаһы ғына, әммә бөтә техника яҙғы сәсеүгә әҙер.
Ауыл ерендә ҡышҡы юл гелән хәүеф тыуҙыра. Беҙҙә иһә был йәһәттән дә тәртип. Йәмғиәттең «Т-150» тракторы урамдарҙы “һә” тигәнсә таҙартып ҡуя.
Был сараларҙы ғәмәлгә ашырыуға ауыл хакимиәте башлығы Илвир Моратшиндың ветерандар ойошмаһы менән килешеп эшләүе лә булышлыҡ итә. Байрамдарҙы, мәҙәни сараларҙы ойошторғанда, берҙәмлек, теләктәшлек ифрат мөһим.
Мәҙәниәт йорто алдында ҡышҡы һабантуй үткәреү ауыл өсөн ҙур сара булды. Артур Ирек улының ниәте менән уҙғарылған байрамға йәше лә, ҡарты ла ихлас килде. Баш ҡаланан саҡырылған сәнғәт оҫталары халыҡҡа күңелле ял бүләк итте.
Моңло көйҙәр, боҫрап торған былау, шашлыҡ еҫе әллә ҡайҙан үҙенә саҡырып торҙо. Спорт ярыштарында халыҡ әүҙем ҡатнашты: тоҡ менән һуғышыу, туп тәгәрәтеү, сана шыуыу кеүек бәйгеләрҙә балалар ғына түгел, оло йәштәгеләр ҙә үҙҙәрен һынап ҡараны, еңеүселәр иҫтәлекле бүләк алды.
Саф һауала күңел асҡандан һуң, тамаша мәҙәниәт йортонда дауам итте. Йәмғиәттең генераль директоры, экрандан фотоһүрәттәр менән аңлатмалар биреп, хужалыҡтың эшмәкәрлеге хаҡында һөйләне. Артабан тамашасылар Өфө дәүләт авиация техник университеты студенттары әҙерләгән бай йөкмәткеле концертты тын да алмай ҡараны.
Ҡышҡы һабантуй юғары кимәлдә уҙҙы. Халыҡ унан рухи көс, дәрт алды. Ошондай матур йолаларҙы артабан да дауам итһәк ине.