…Тирә-яҡҡа “үләттәр ауылы” тигән даны таралған ерҙә ике ҡоҙа — Кәбир менән Хәким йәшәй. Тағы ла бер ҡарт, йәғни Ғабдулланан башҡа ауылда бүтән кеше лә ҡалмаған. Һәр хәлдә, бөтөп барған ауылдың яҙмышы тап ошо өсәүҙең ҡулында. Балталары һыуға төшкәндәй, күңелдәре һүрелеп барған ваҡытта ҡарттар бик ҡиммәтле хазинаға тап була. Баҡтиһәң, Хәким ҡарттың ишек алдындағы һаҫыҡ күле тылсымлы көскө эйә икән. Әгәр ҙә шул күлдә ҡойоноп, уның һыуынан ауыҙ итһәң, йәшлектәге ғәйрәт ҡайтып, дәрттәр артып китә, имеш. Был турала хатта боронғо сәйәхәтселәр үҙҙәренең көндәлектәрендә лә яҙып ҡалдырған, ти. Ҡарттар мөғжизәле күлдең тылсымын татып ҡарамаҡ була...

Тап ошо, көлкөлө лә, ҡыҙғаныс та ваҡиғаларға бәйләп милләтебеҙҙең бөгөнгө хәленең бер нисә проблемаһын асып һала автор. Башҡорт ауылдарының бөтә барыуы, еребеҙгә, һыуыбыҙға ҡул һонған сит милләт байҙары, шуларға аҡсаға һатылған урындағы етәкселәрҙең мәкерлеге лә асыҡ һүрәтләнә. Ҡалала түрәлек вазифаһын биләп, бай, етеш тормошта йәшәп тә, атайҙарын ҡарттар йортона алып барып ташлаған мәрхәмәтһеҙ балалар хаҡында ла бәйән ителә. Ғүмер буйы ситтә йөрөп, ҡартайған көнөндә тыуған төйәгенә ҡайтып төпләнгән әбейҙәр ҙә тамашаға йәм өҫтәй.
Пьесаның авторы Мөҙәрис Багаев – был проблемаларҙы ишетеп түгел, күреп, тойоп, йәне әрнеп күҙәткән кеше. Спектаклдәге образдың ысынбарлыҡта Ишембай районының бер ауылы биләмәһендә ер һатып алып, урман уртаһында дәү йорт төҙөп, ял итергә килеп йөрөгән Мәскәү байының улынан алыныуы ла дәлилләй быны.
– Ҡайһы ваҡыт комик күренештәр аша асып һалынған проблемалар кешегә нығыраҡ аңлашыла, күңеленә үтеп инә. Азат Йыһаншин менән бергә был спектаклде сәхнәгә сығара алыуыбыҙға бик шатмын. Салауат башҡорт дәүләт драма театры минең дүртенсе спектаклемде ҡуйҙы. Бергәләшеп эшләү осоронда артистар яҡын дуҫтарыма әйләнде, – ти автор.
Ҡарттар һәм әбейҙәр образын сағыштырмаса йәш артистарҙың тыуҙырыуы ла айырым бер үҙенсәлек бирә комедияға. Уларҙың килештереп уйнауы, ваҡыты менән артыҡ комизмға бирелеп китеүҙәре лә урынлы.
Төп ролдәрҙе халыҡ артисы Риза Мәһәҙиев (Хәким), Фәтих Ҡолһарин (Кәбир), Рәсәйҙең атҡаҙанған, Башҡортостандың халыҡ артисы Миңдулла Иҙрисов (Ғабдулла), республикабыҙҙың атҡаҙанған артистары Нәүфилә Яҡупова, Наҙгөл Иҫәнбаева, Гөлфирә Сәфиуллина башҡара.
– Наилә Сәфәрғолова Салауат театрында спектакль ҡуйырға саҡырғас, оҙаҡ уйлап тормай ризалаштым. Ут күршеләр менән эшләп ҡарау теләге күптән бар ине. Ә спектакль һайлауға килгәндә, Мөҙәрис Багаевтың “Мөхәббәт күле”н тәҡдим иттем. Был спектаклде күптән ҡуйырға хыяллана инем. Артистар ҙа теләп, ихлас башҡарҙы ролдәрҙе. Миңә Салауат артистары менән эшләү бик оҡшаны, саҡырһағыҙ, тағы ла килермен әле, – тип премьеранан ҡәнәғәт булыуын белдерҙе режиссеры Азат Йыһаншин.
Салауат сәхнәһендә премьера ике көн дауам итте. Шуныһы ҡыуаныслы: һәр тамашала зал шығырым тулы булды. Ҡалала театр, сәнғәт һөйгән халыҡ йәшәүен дәлилләй был. Ә артистар иһә Татарстанға гастролгә юлланды. Мөғжизәле “Мөхәббәт күле”нә сумыуҙан башланған миҙгелдең уңышлы булырына шик юҡ.