Миңә, оҙаҡ йылдар мәктәптә башҡорт теле һәм әҙәбиәтен уҡытҡан кешегә, журналист һөнәре ифрат яҡын. Республикабыҙҙа донъя күргән гәзит-журнал эшемдә һәр саҡ иң ҙур ярҙамсы булды.

Журналисҡа яҙыу оҫталығы, киң фекерләү ҡеүәһе, халыҡты үҙенә ышандыра, эйәртә алырҙай һәләт талап ителә. Шәһит Хоҙайбирҙин исемендәге премия тап ошондай талантҡа эйә ҡәләм оҫталарына бирелә. Быйылғы дәғүәселәрҙең араһында уҡыусым Даян Мәжитовты күреп, айырыуса шатландым.
Даян бәләкәйҙән уҡыуға һәләтле булды. Өс кенә йәшлек баланың, мәктәп янына килеп, “Яңы Усман һигеҙ йыллыҡ мәктәбе” тип уҡып торғанына шаһит булған директорыбыҙ Рәил Ғәли улының (хәҙер мәрхүм инде) ошо хаҡта хайран ҡалып һөйләгәне хәтерҙә ныҡ уйылып ҡалған.
Өмөтөбөҙҙө аҡланы Даян: иң алдынғы уҡыусыларыбыҙҙың береһе булды, уны һәр уҡытыусы маҡтап ҡына торор ине. Математиканы, урыҫ телен, географияны, тарихты яҡшы белде. Мин иһә уның хаҡында, ҡырҡ йылға яҡын эш дәүеремдә иң һәләтле, яратҡан уҡыусым булды, тип әйтә алам. Даяндың ижади мөмкинлегенә, бай фантазияһына хайран ҡала инем. Әҙәбиәтте ярата. Уның яҙғандарын уҡыу үҙе бер кинәнес ине. Бәләкәйҙән бик грамоталы ла булды ул — хатта бер өтөр хатаһы ла ебәрмәй торғайны.
Үтә ҡыҙыҡһыныусан уҡыусымды өлкән кластарҙа белем алған балалар өсөн ойошторолған сараларҙа ҡатнаштыра, походтарға алып бара торғайным. Даяндың үҙебеҙҙәге ер-һыу атамалары, ауыҙ-тел ижады буйынса төҙөгән альбомдарын дәрестәрҙә ҡулландым, әле лә һаҡлап тотам. Бай телле, мажаралы иншаларын йыйып, туплама төҙөгәйнем. Үҙе мәктәпте тамамлап киткәс тә, был хеҙмәттәрен башҡа уҡыусыларға өлгө итеп күрһәтеп, уларҙы ла шулай матур яҙырға өндәнем. Даяндың шиғыр яҙыуы, йыр-моңға һәләтле булыуы, байтаҡ көй ижад итеүе хаҡында ла һөйләп, балаларҙың һәләтен һәр яҡлап үҫтереүгә этәргес бирә инем.
Уҡыусымдың “Башҡортостан” гәзитендә сыҡҡан һәр мәҡәләһен уҡып барам. Сәйәси, иҡтисади темаларға аналитик яҙмалары, “Башҡорт донъяһы” ҡушымтаһы — барыһы ла еңел булмаған хеҙмәт. Бындай йүнәлештә эшләгән башҡорт журналистары күп түгел. Һуңғы йылдарҙа сәйәсәттә, иҡтисадта яңы төшөнсәләр, терминдар, алымдар барлыҡҡа килә, ҡануниәт йыш үҙгәреш кисерә, был, әлбиттә, хәбәрсенән заман менән бергә атлауҙы, хатта ҡайһылыр йәһәттән бер аҙым алдараҡ барыуҙы талап итә. Бөгөн илдә милләт-ара мөнәсәбәттәр ҙә хафаға һалмай ҡалмай. Власть менән йәмғиәт араһында бәйләнеш күпере булдырыусы матбуғат хеҙмәткәрен ут йотоп йөрөгәндәй күҙ алдына килтерәм. Әммә һәләтле журналист эсендәге ялҡынды тышҡа сығармай, ғәҙел, дөрөҫ юлды айыҡ аҡыл аша таба, күрһәтә белә. Беҙҙең Даян — тап шундайҙарҙан. Ул Шәһит Хоҙайбирҙин исемендәге премияға ысынлап та лайыҡлы, тип иҫәпләйем.