“Дим моңдары” күңелегеҙгә ял бирер.

Республика юбилейы алдынан донъя күргән был китап шиғриәт һөйөүселәр өсөн генә түгел, барлыҡ район халҡына ысын бүләк булды. Бер нисә йыл дауамында әҙерләнгән йыйынтыҡта районыбыҙҙа ижад иткән егерме ике авторҙың башҡорт, татар, рус телдәрендәге шиғырҙары тупланған.




Эйе, донъяларыбыҙ емерелмәҫ тә ине, әммә тормошобоҙҙо шиғриәтһеҙ күҙ алдына килтереүе лә ҡыйын... Пушкин һәм Шекспирһыҙ, Есенин һәм Ахматоваһыҙ, бөйөк Мостай һәм Рәмиһеҙ... Хистәр ташып урғылыуын, сихри һүҙҙәр донъяһын, ябай ғына фекерҙәрҙе шиғыр юлдарына һалғас, уларҙың күңел ҡылдарын тирбәтеүен башҡаса нисек аңлатырға һуң? Ә һеҙ кешенең ни сәбәпле шиғыр яҙа башлауы тураһында уйлап ҡарағанығыҙ бармы? Һүҙҙәрҙе башҡа төрлө яңғырарға, йөрәктәрҙе йышыраҡ тибергә мәжбүр иткән ғәжәйеп һәләт ҡайҙан килә? Нисек бары тик ике юлға бөтә донъяны һыйҙырырға? Шиғриәткә өйрәтеп булмай, уны бары аңларға ғына мөмкин.

Әлшәй шағирҙары ла был көндө залда ултырған тамашасыларҙы үҙҙәренең уй-хыялдары һәм эске кисерештәре донъяһына алып китте. Әлфиә Ханнанова, Клара Туҡаева һәм Гөлфиә Ғиззәтованың сығышын халыҡ алҡыштарға күмде. Миңзилә Муллағолова һәм Зөбәржәт Ғәбделмәнованың күңел гәүһәрҙәре халыҡ рухына, әсәйгә, тыуған ергә һөйөү хистәре менән һуғарылған.

...Һәр кемдең дә тормошонда шундай мәлдәр була, бөтмәҫ мәшәҡәттәрҙән арынып, тулҡынландырғыс һәм илһамлан­дырыусы шиғриәт донъяһына сумғы килә. Бына шундай минуттарҙа Әлшәй ерендә ижад иткән авторҙарҙың “Дим моңдары” китабы күңелегеҙгә ял бирер, рухи шишмәләрегеҙҙе байытыр. Был кисәлә йыйынтыҡҡа ингән әҫәрҙәрҙең ни бары бер өлөшө генә башҡарылды. Әйтеп бөтөлмәгән фекерҙәр, уҡылмаған шиғырҙар күп әле.