Ир намыҫы

Үлсәнәлер
Ниндәй бизмәндәрҙә
Был донъяла ирҙәр намыҫы?!
Ни ғәмәлдәр менән яулай улар
Хаҡ баһаны:
“Был — ир аҫылы!..”
Ғәййәр ирҙәр
Халыҡ хәтеренә
Яугир булып ингән мәңгегә.
Ерен-һыуын һаҡлап,
Арыҫландар
Ғорур атлап барған үлемгә!
Һүҙ баһаһын белгән аҫыл йәндәр
Үҙ баһаһын белә урынлы.
Бер әйтерҙе ете үлсәүҙәре,
Тапҡыр һөйләү әллә уйынмы?!
Ир намыҫы
Буш һүҙ булып ҡалмаҫ,
Вәғәҙәләрең мотлаҡ үтәлһә,
Башҡаларҙың именлеге өсөн,
Мең ыҙалы юлың үтелһә!
Ир намыҫы
Бөйөк, күркәм сифат,
Анһат түгел уға ирешеү.
Үҙ атаһын оҙатмаған әйткән:
“Беләмен мин, ауыр ер эше...”
Ғүмер юлым,
Изге яҡты уйым –
Артылыуҙыр Намыҫ-ҡаяға.
Кешеләргә тура ҡарап барам:
“Ир!” — тиерҙәр, бәлки, ҡайҙа ла...

Яуаплылыҡ

Ҙурҙан ҡубамындыр һәр эшемдә,
Тотонмайым еңел-елпенән.
Ялыҡтырғыс, ябай хеҙмәтте лә
Әллә ниҙәй күреп елкенәм.
“Тырыш булһаң, эш ҡарышмай ул!” —
Тигән аҡыл сыҡмай аңымдан.
Беләгеңдә көс-ҡеүәтең кәрәк,
Йөрәк ҡаҡһын теләк-ялҡындан!
Ғүмер буйы теләп атҡарамын
Белем эстәү, һабаҡ биреүҙе.
Ғилем үрҙәренә артылғанда
Буш итмәгән бәхет берәүҙе!
Иңдәремә йәнә йөкмәп алдым
Яуаплылыҡтың мин иң дәүен.
Халҡым рухиәтен байытҡанда,
Күҙәтеүсе түгел илдә мин!
Яуаплылыҡ тигән оло тойғо
Һеңгән, ахыры, минең ҡаныма.
Алда байтаҡ эштәр башҡарғанда,
Маяҡ булһасы, тим, юлыма!

Башҡорт теле

“Телем!” тиеп
Тамаҡ ярғаным юҡ,
Әйтер һүҙем – йөрәк түремдән.
Бар хыялым – телем, һине һаҡлау,
Һинең сәскә атыу еремдә!
Ҡанбабалар
Аманаты күреп,
Ҡәҙерләйем һине, телгенәм!
Һинең хаҡта яман һүҙ ишетһәм,
Тәнгенәмде хәнйәр телгеләй…
Һине яҡлап
Баҫҡан, ҡалҡан кеүек,
Мостайҙарың, Рәми улдарың.
Туған телем изге нурын сәсер,
Йәшәгәндә ерҙә Уралым!
Уяу булыр кәрәк
Һәр заманда,
Телгә һөжүм әле тиҙ бөтмәҫ.
Рухын һаҡлар ғәзиз телен аяр,
Сая халҡым минең теҙ сүкмәҫ!
Һәр бер өнөң
Әсәм һымаҡ наҙлай,
Һәр һүҙең бит миңә –
Мең дауа.
Килер быуындарға рухи дарман
Биреп, йәшә, телем, донъяла!


Юғалтыу

Эш бүлмәмдән уйламаҫтан
Кәпәс юғалды.
Һөрән һалып йөрөмәнем:
“Кем генә алды?!”
“Эшләпә шәп эшләтә”, —
Тип әйтһә лә халҡым.
Кәпәсемде сәлдергәнгә
Кергәнме аҡыл?
Әлдә әле бер ваҡыт та
Баш юғалманы.
Миңә яҙған аҡылдарҙы
Яттар алманы.

Йәййөрөм

Йәййөрөмгә сыҡтым бына,
Арытылған йыл буйы.
Эш эшләмәй, бер хәстәрһеҙ
Тәгәрәрмен йәй буйы.
Отпускымдың тәүге көнө –
Биштән аяҡ өҫтөмөн.
Көрәк, балта ҡулда уйнай,
Мин ялһыҙ ҙа көслөмөн.
Килмәгәнмен, ахыры, ергә,
Ғәмһеҙ йәййөрөмдәргә.
Ҡалмам шуға йәй йырлаған
“Сиңерткә”* хәлдәренә.

Ғүмер юлым

Бәхеттәрем менән йәнәш йөрөй
Күрер ҡайғы, килер михнәттәр.
Ғүмер юлын бергә үткән дуҫтар:
“Бөгөлә лә төшә!..” — тимәҫтәр.

Аяҙ булһын, ҡар-ямғыры яуһын,
Бик кәрәкһә, ҡойон уйнаһын!
Ҡырҡмаһа ҡырҡ төрлө булған өсөн,
Йәшәүҙәрҙән булмаҫ туяһым.

Аҙмы артылыштар
Артылғанмын,
Оят булмаҫ әҙәм алдында.
Ә шулай ҙа теүәл төшөнмәйем,
Ниҙәр барын тауҙар артында.

Ғүмер юлым – сикһеҙ йомғаҡ һүтеү,
Тәү нөктәнән һуңғыһына етеү;
Башҡаларҙы михнәттәрҙән һаҡлау,
Ете яттың көнөн имен итеү.

Ниндәй көн был?..

Башҡа һыймаҫ ниндәй тойғо –
Маҡсатым юҡ, үкенес юҡ.
Тыуып килгән ал таңыма
Алғышым юҡ, үтенес юҡ, —
Ниндәй көн был?..

Ике ҡулға бер эш бармай,
Хыялым юҡ, ҡасҡан уйҙар.
Донъям сумды ят бушлыҡҡа,
Еле иҫмәй, аҡмай һыуҙар, —
Ниндәй көн был?..

Бер тере йән ҡалмағанмы,
Һүҙ атырҙай бәндә ҡайҙа?!
Ҡояш инде ситтә ҡунаҡ,
Ваҡыт уҙа, бирмәй файҙа, —
Ниндәй көн был?..

Үҙ-үҙемде аңламайым,
Ҡылығыма аптырарлыҡ.
Шуға шатмын: килеп баҫҡан
Ғүмергә бер битарафлыҡ.


Артмаҡкүлем

Артмаҡкүлем,
Ата-бабам
Белеп атыңды таҡҡан.
Яҙ еттеме – һин даръялай,
Күҙгә күренеп артаң.
Ағиҙелкәй киң йәйелһә,
Ярҙарың һыуға тула.
Һиндә һыуҙар инеү түгел,
Аттар йөҙҙөрөп була.

Йылдар төрлөсә килә лә,
Һиңә ҡағылып уҙа.
Ҡоролоҡ ҡотороп уйнаһа,
Сиңерткә йырын һуҙа.

Ике ҡалаҡ һыу алғыһыҙ
Тамам кибеп ҡалһаң да,
Һин бары бер Артмаҡкүлһең,
Һис ҡоромай даның да.

Шул саҡта ла төштәремә
Керәһең даръя булып.
Ташҡын һымаҡ һөйөүемдән,
Китәһең төҫлө тулып.


Ҡарһыҙ ҡышҡа элегия

Ап-аҡ ҡарһыҙ килгән ҡыштың
Бөгөн йәнә йылы көнө.
Ҡарһыҙ ҡышым туй күлдәген
Кеймәй төшкән килен төҫлө.
Ағастарҙа бәҫ-фата юҡ,
Ап-аҡ нағыш нурламаған.
“Мендельсон”ды ҡышҡы буран
Әлегәсә уйнамаған.


Барометр

Һинең йөҙөң – барометр,
Хис-тойғолар бизмәне,
Шуға күрә ни булырын
Аҙна әүәл һиҙәмен.

Һөйөү гөлөн һулытырҙай,
Ҡапыл ҡырау төшәрен
Барометр
Алдан һөйләй –
Һинең төҫөң, йөҙҙәрең.
Аяҙға ла, йонсоуға ла
Инде мин күнеп бөткән.
Барометр мөхәббәтте
Оҙон ғүмерле иткән.


Хәйерлегә булһын!..

Февраль уртаһында
Уйламағанда,
Ҡапыл йылытты.
Аномаль йылылыҡ, тип
Аҡыллылар
Хәбәр һатты.
Арабыҙҙа аномаль йылылыҡ —
Сөсөләндең артыҡ.
Хәйерлегә юрайыҡ!..