Бына нисек итеп төҫмөрләй әҙәм балаһын (ҡатын-ҡыҙҙы) Туфан Миң­нул­лин үҙенең “Ай булмаһа, йондоҙ бар” исемле пьесаһында. “Бер нәмәгә ҡара­маҫтан, һынырға хаҡыбыҙ юҡ!” – тигән һымаҡ. Ә Стәрлетамаҡ дәүләт театр-концерт берләшмәһенең 24-се ижад миҙ­гелен нәҡ ошо әҫәрҙе сәх­нәләштереү менән башлап ебәреүе осраҡлы түгелдер. Төптән уйлап ҡараһаҡ, бындай яҙмыш бөгөн кешене генә түгел, ҡайһы бер ойошма-учреж­дениеларҙы, хатта дөйөм дәүләттәрҙе сорнап алған һымаҡ. Стәр­летамаҡ театрының үҙен алғанда ла, үткән юлы бормалы-бормалы уның. Төрлө саҡ­тары булды: берсә күтәрелде, берсә заман ауырлыҡтарын үҙ иңендә татыны. Әммә шуныһы хаҡ: ниндәй генә осор булмаһын, ижади коллектив һис ҡасан баҙап, һүнеп ҡалманы, бере­һенән-береһе сағыуыраҡ әҫәрҙәрҙе сәхнә­ләштереп торҙо. Дәртле “Ҡыҙ ур­лау”ҙы хәтергә төшөрһәк тә, берсә илатҡан “Ғә­лиә­ба­ныу”ҙы иҫләһәк тә, актерҙарҙың “сәхнәлә йәшәүе” һәр кемгә аңлашыла ине. Ижад миҙгелен асыу тантана­һында ла һүҙ нәҡ үҙ эшен мөкиббән яратҡан актерҙар һәм тоғро тамашасы хаҡында барҙы.
– Әле генә Өфө тамашасыһын һө­йөн­дөрөп ҡайтҡайныҡ, хәҙер үҙ залы­быҙҙа ла гөрләтеп спектаклдәр баш­ланды. Бы­йылғы миҙгел бай бу­лыр, – тип Стәр­летамаҡ дәүләт театр-концерт бер­ләшмәһенең директоры Ғәфүр Һә­йет­ҡолов алдағы пландарын күҙал­ланы.
Ҡала хакимиәтенең мәҙәниәт бүлеге етәксеһе Зөфәр Зиннәтуллин иһә артис­тарҙың ҙур башланғыстарына изге теләк­тәрен еткерҙе, залдың һәр саҡ бөгөнгөләй тулы булырына ышаныс белдерҙе.
Артистарҙы, тамашасыны яңы миҙгел менән Мәжит Ғафури исемендәге Баш­ҡорт дәүләт академия драма театрының художество етәксеһе, Башҡорт­остан­дың халыҡ, Рәсәйҙең атҡаҙанған артисы Олег Ханов та тәбрикләне:
– Сирек быуат эсендә Стәрлетамаҡ башҡорт театры ниндәй генә ауыр­лыҡтар аша үтмәне, әммә бындағы ижа­ди көс, берҙәмлек үҙ тамашасы­һына тоғро ҡалырлыҡ нигеҙ булды, – тине Өфө ҡунағы.
Спектаклгә килгәндә, бындай әҫәргә стәрлетамаҡтар күптән һыуһағайны. Юҡһа, һуңғы арала мәҙәни усаҡтарҙа төп иғтибарҙы әҫәрҙән ситкә – музыка, сәхнә биҙәлешенә – алып киткән, милли тамашасыға хас булмаған тамашалар артыҡ күбәйҙе һымаҡ. Ә был спектакль ифрат ябай, шул уҡ ваҡытта фәһемле булды. Әҫәрҙә күтәрелгән тема көнүҙәк.
Эйе, ҡаланың башҡорт театры яңы миҙгел генә түгел, ә тормош башлап тора һымаҡ. Планда ла ошондай яҡшы әҫәрҙәр барлығы коллективҡа ҙур өмөттәр бағ­лата. Театр тамашасыһына артабан да шулай яҡын булһа, айҙары ла булыр уларҙың, йондоҙҙары ла, ҡояшы ла баш осонан китмәҫ.