Шул саҡта
хәтер уяна ла
сәнсеп ала
һәм
күҙ алдынан үтә
ретро кино һымаҡ
аҡлы-ҡаралы яҙмыш...
Аҡлы-ҡаралы яҙмыш...
Аҡлы-ҡаралымы ул яҙмыш, әллә ошо ике төҫ арауығына башҡа төҫтәр ҙә килеп ингәнме?! Хәйер, кисәнең сәбәпсеһе шиғырҙарын уҡығанда һәр кем үҙ кисерештәре, үҙ гонаһ-сауаптары хаҡында уйланғандыр. Был кистә һәр хәлдә шағир уҡыусыһы, саҡы­рылған ҡунаҡтар алдына әҙип кенә түгел, шоумен да, йөрәге асылған шиғриәт хулиганы булып та килеп баҫты. Хулиганы тим, сөнки ул заман телендә, йәштәр күңеленә етерлек телмәр менән һөйләште.
Ә инде Роберт Хәмиҙуллин, Тимур Ямалов, Альбина Шәмсетдинова кеүек исемдәре билдәле йәш таланттарҙың гитарала уйнап, күңелдәрҙе һиҫкән­дерерлек тауыш менән залға әллә һағыш, әллә тетрәнеү һирпеүе кисәне шағир ижадына ауаздаш моң менән һуғарҙы. Әле скрипка, әле ауыҙ гармуны тауышы шулай уҡ кәйефтәрҙең йыр менән бер бөтөн, әммә төрлө булыуына ишара яһағандай итте. Барабансы Ришат Сөләймәнов, скрипкасы Резана Вәлиева кисәгә илһам өләште.
...Ямалып та ғына бөткән күңел,
йүрмәлгән дә генә йән менән
ҡайттым бына...
Һинең ҡаршыңа.
Рәнйеһәң дә, әсәй,
әрләһәң дә...
Һөй арҡамдан. Һыйпа башымдан.
А. Юлдашбаев был байрамын әсә­һенең ижад кисәһе һәм уны “трилогия” авторы тип атаны. Бер туған Азамат, Рәжәп, Нәжип Юлдашбаевтар сәхнә тү­рендә урын алды. Мәрфүғә апай Юл­дашбаева ысын мәғәнәһендә кисәнең йәме булды.
Йәш ижадсылар Алина Ғәлиева, Айгөл Ғәбитова шиғырҙы оҫта һөйләү һәм шиғыр яҙыу буйынса был юлы ла үҙҙәрен лайыҡлы күрһәтә алды. Әйт­кәндәй, Алина Башҡортостандың ха­лыҡ шағиры Рауил Бикбаевтың ши­ғырҙарын яттан һөйләү конкурсын­да еңеү яулаһа, Айгөл “Ҡош юлы” гита­рала уйнап йырлаусылар фес­ти­вале сиктәрендә ойошторолған шиғриәт конкурсында 1-се урынға лайыҡ бул­ғайны. Быларҙы айырым әйтеп ките­үем юҡҡа түгел, сөнки тап шул са­ра­ларҙың башында шағир Азамат Юлдашбаевтың исеме тора. Ул үҙенең янында йәш ижадсылар тулҡыны булдыра алды. Монстоп менән барған “спетакль”дә һәр кем үҙ ролен уңышлы башҡарҙы: артыҡ бер һүҙ юҡ, бары тик шиғыр, йыр, монолог!
Миңзәлә Яхинаның йырҙары, гитара, ауыҙ гармунында уйнауы үҙе бер тамаша булды. Рок-н-ролл был кисә­нең шулай уҡ саҡырылған ҡунағы ине.
Эйе, беҙ күнегеп, өйрәнеп киткән юбилей кисәһе түгел ине был, ә ижади отчет, яланғас йәндең ауазы кеүек ишетелде һәр кемебеҙгә таныш изгелек, яуызлыҡ, ҡуштанлыҡ, дуҫлыҡ, әрһеҙлек, әҙәп, һатлыҡйәнлек һәм тоғролоҡ хаҡындағы әйтелгән һүҙҙәр, күҙ алдына баҫҡан образдар!
Ҡотлауҙар ҙа ғәҙәттәгесә булманы. Халыҡ шағиры Рауил Бикбаев сәғәт­тән ашыу монолог тотҡан, шиғырҙарын яттан һөйләгән шағирға һоҡланыуын белдерһә, Башҡортостандың Дәүләт Йыйылышы – Ҡоролтай Рәйесе урын­баҫары, шағирә Йомабикә Ильясова кисәне ҡалыптарға һыймаған осрашыу тип атаны. Шағир Ирек Кинйәбулатов байрам сәбәпсеһенә ғәҙәттәгесә юмор аша мөрәжәғәт итте. “Азамат, әлдә кисәңде төнгө клубта үткәрҙең әле, улайһа уның ни икәнен дә белмәй үлер инем!” – тип йылмайҙы ул. Башҡорт­остандың халыҡ шағиры Ҡәҙим Аралбаев та, ижады кеүек үк, кисәнең дә бик үҙенсәлекле булыуына баҫым яһаны. Яҙыусылар Тамара Ғәниева, Әх­мәр Үтәбаев, Дамир Шәрәфет­ди­нов, Айҙар Хөсәйенов, Зөлфиә Ханнанова, Тәнзилә Дәүләтбирҙина, Гөлназ Ҡо­тоева, Зәки Әлибаев, Рәсүл Сә­ғи­тов, Айгөл Арыҫланбәкова, журналис­тар Артур Дәүләтбәков, Фәнүр Йә­ғә­фәров, Шамил Ку­чуков, Гөлназ Ҡолһарина, Миләүшә Ғәлиева, Ләйсән Мәзитова, Гөлназ Ишемғолова, Башҡорт википе­дияһы ирекмәне Рөстәм Нурыев, бик күп йәш ижадсылар, музыканттар, Азамат Юлдашбаев стиленә тап килтереп, уны үҙенсәлекле итеп ҡотланы.
Бер ҡараһаң, кисәлә һәр нәмә үҙ урынында кеүек: микрофон да шытырламаны, һүҙен онотоусы ла булманы, музыка ла сифатлы булды, әммә шул уҡ ваҡытта байрам ҡалыптарҙан сыҡ­ҡайны! Үҙенең һүҙ сәнғәтен заманса стилдә халыҡҡа еткереүе, ихласлығы, яһалма булмауы, аралашыуға һыу­һаған әҙәбиәтселәрҙе берләштереүе менән! Ҡайтып барышлай уҡ шиғыр яҙғы килде. Классиктарҙың береһе әйт­кән бит әле: ысын ижад шуның менән таныла, уға саҡ ҡына барып ҡағылһаң да, күңелдән урғылып йыр сыға башлай тип!..