Был бүлектән яҙыусылар һис өҙөлмәй. Уҡыусылар көтөп алған художестволы әҫәрҙәр нәҡ ошонда баҫмаға әҙерләнә. Нәфис әҙәбиәт редакцияһы өс бүлектән тора: китаптар урыҫ, башҡорт һәм татар телдәрендә сығарыла. Халыҡты, уҡыусыларҙы матур әҙәбиәт менән тәьмин итеү – редакцияның иғтибар үҙәгендә. Ваҡытлы матбуғатта донъя күргән ижад емештәрен уҡып барыу һәм һайлап алыу, халыҡҡа ниндәй әҫәрҙәр кәрәк, ниндәй китаптар һатыласаҡ – шуларҙы өйрәнеү ҙә төп эштәребеҙҙең береһе.
Йыл һайын сәсмә әҫәрҙәр, шиғриәт, публицис­ти­ка буйынса исемлек туплана. Өс телдә лә “Йәштәр тауышы” серияһына йыл аралаш алмашлап йә сәсмә әҫәрҙәр, йә шиғыр китаптары нәшерләнә.
1994 йылда Башҡортостан һәм Татарстан китап нәшриәттәре араһында килешеү төҙөлгәйне. Уға ярашлы йыл һайын ике республика әҙиптәренең китаптары “Ҡәрҙәшлек кәштәһе” һәм “Ҡәләмдәр туғанлығы” серияһында сыға башланы. Өфөлә – Роберт Миңнуллин, Әмирхан Еники, Туфан Миңнуллин, Рәзил Вәлиев, Рәдиф Ғаташ, Илдар Юзеев – йәмғеһе 34 авторҙың, Ҡазанда Мостай Кәрим, Зәйнәб Биишева, Рәми Ғарипов, Яныбай Хамматов, Ноғман Мусин, Ғайса Хөсәйенов, Рауил Бикбаев һәм башҡаларҙың китаптары донъя күрҙе.
Быйыл ике республика араһындағы әҙәби бәйләнешкә 20 йыл тулыу айҡанлы был килешеүҙе яңыртырға тигән ҡарар ҡылынды. Дуҫлыҡ һәм туғанлыҡҡа нигеҙләнгән әҙәби күпер оҙаҡ йылдар халыҡҡа, әҙәбиәткә хеҙмәт итер тигән өмөттәбеҙ.
Һуңғы йылдарҙа бөйөк шағирыбыҙ Мостай Кәримдең “Һайланма әҫәрҙәр”енең – 5, Ноғман Мусиндың – 9, Нәжиб Асанбаевтың – 5, Зәйнәб Биишеваның – 5, Рауил Бикбаевтың – 5, Марат Кәримовтың – 4, Ғәзим Шафиҡовтың – 3, Рәшит Солтангәрәевтең – 3, Назар Нәжми, Суфиян Поварисов, Әнғәм Атнабаев, Сафуан Әлибаев, Ҡәҙим Аралбаев, Тимерғәле Килмөхәмәтов, Гөлфиә Юнысованың ике томлыҡтары донъя күрҙе. “Башҡорт әҙәбиәте тарихы” китабының ике томын сығарыуға өлгәшелде.
“Башҡорт халыҡ ижады” йыйынтыҡтарының башҡорт һәм урыҫ телендә 12-шәр томы донъя күрҙе. Артабанғы томдары ла әҙер, редакция портфелендә үҙ сиратын көтә. Мөһим тарихи ваҡиғалар, хөрмәтле яҙыусыларыбыҙҙың юбилейҙары айҡанлы ла сифатлы китаптарҙы сығарырға тырышабыҙ.
Йыл һайын үткәрелеп килгән “Йыл китабы” конкурсында нәфис әҙәбиәт редакцияһынан үҙ ваҡытында сыҡҡан китаптарҙың булыуы автор­ҙарҙың ғына түгел, мөхәррирҙәребеҙҙең дә уңышы тип иҫәпләйбеҙ. Мәҫәлән, башҡорт әҙәбиәте бүлегенән Ирек Кинйәбулатовтың “Замана тауышы” китабы Салауат Юлаев исемендәге дәүләт премияһына лайыҡ булды. Сабир Шәриповтың “Ҡолонташ” исемле китабы 2013 йылдың иң уҡымлы китабы тип табылды. Гөлнур Яҡупованың “Ҡатындар” трилогияһы, Зиннур Нурғәлиндың “Дәүләт теле: цивилизациялы һәм милли беришлек”, унан алдағы йылдарҙа Гөлсирә Ғиззәтул­линаның “Йәшәргә ваҡыт”, Рәлис Ураҙғоловтың “Аслыҡ” китаптары уҡыусылар араһында иң үтемлеләрҙән һаналды. Урыҫ әҙәбиәте бүлегенән Морат Рәхимҡоловтың “От Пушкина до Толстого”, “От Горького до наших дней”, Рим Ахмедовтың “Одолень-трава”, “Растения: друзья и недруги”, “По следам одолень-травы”, Михаил Чвановтың ”Загадка штурмана Альбанова”, Яныбай Хамматовтың “Северные амуры” китаптары киң билдәлелек яуланы. Татар әҙәбиәте бүлегенән Венера Мәжитованың “Туйға өс көн ҡала” китабы иң уҡымлы тип табылды, Рәсим Рәхмәтуллиндың “Беренсе туҡталыш” исемле шиғырҙар йыйынтығын шулай уҡ уҡыусылар йылы ҡабул итте. Земфира Муллағәлиеваның “Ҡиблаларым” исемле шиғырҙар китабы тураһында ваҡытлы матбуғатта ыңғай фекерҙәр булды. Йыл һайын тиерлек сығып килгән “Аҡсарлаҡ” шиғырҙар йыйынтығы – утыҙлаған авторҙы туплап, киң танылыу яулаған китаптарҙың береһе.
Быуаттан быуатҡа тапшырылыр ауыҙ-тел ижады, шиғриәт, сәсмә әҫәр өлгөләрен ҡәҙерләп, мөхәррирләп, һатыуға сығарғансы тырышҡан уңған, тәжрибәле, үҙ эшенең оҫталары хеҙмәт итә был редакцияла. Башҡорт әҙәбиәте бүлегендә Ринат Камалов, Гөлназ Фазлиәхмәтова, Эльвира Ниғмәтуллина, рус әҙәбиәте бүлегендә Оксана Кемер, Ирида Садиҡова һәм Әлфиә Хөснөтдинова, татар әҙәбиәте бүлегендә Гөлшат Абдуллина – ең һыҙғанып китап нәшерләү эшенә бирелгән оҫталарыбыҙ. Барлыҡ ҡулъяҙмаларҙы ла тиерлек үҙ компьютеры аша үткәреп, йән өрөп ултырған операторыбыҙ Венера Баһауетдинованың да өлөшө ҙур китап сығарыу эшендә.