.

Әнүәр Сөләймәнов… Уҙған быуаттың 70-се йылдары уртаһы. Тирә-яҡ ауылдарҙан Өфөгә гөрләшеп килеп тулдыҡ. Аң-белемгә һыуһағанбыҙ, ниндәйҙер тормош тәжрибәбеҙ ҙә бар, армияла булғанбыҙ. Әлбиттә, әҙәбиәтте яратабыҙ, туған халҡыбыҙ ижадына ғашиҡбыҙ – шул беҙҙе берләштерә.
Әнүәр баштан уҡ ергә яҡыныраҡ кеше булды: шағирлыҡҡа, дан яулар ғәмәлдәргә ынтылманы. Тәбиғәтенә тоғро ҡалып, журналислыҡ юлын һайланы, мәҡәләләр яҙҙы, ҡаратырыш булды. Һәр саҡ тормоштоң ҡайнаған еренә ашҡынды: ҡайҙа шаулайҙар, көнүҙәк мәсьәләләр хәл ителә, Әнүәр – шунда. Был – журналистың төп һыҙаты: алда булыу, тынғыһыҙлыҡ, баш­ҡаларҙан иртәрәк өлгөрөп ҡалыу… Әнүәр дуҫыбыҙ, ауыл малайы булһа ла, һис тә баҫалҡы түгел ине. Терегөмөштәй теремек. Бер ваҡытта ла ситтә, күләгәлә ҡалмай. Һәр саҡ билдәле, күренекле кешеләр тарафына ынтылды, уларҙың эшенә, һөнәренә, ҡылған батырлыҡтарына һоҡланып йәшәне, шулар хаҡында әҫәрләнеп яҙҙы.
Башҡортостан “Китап” нәшриәтендә 2002 йыл­да сыҡҡан “Бергәләп матурлайыҡ донъяны” тигән китабын алайыҡ. Күренекле шәхестәр, хеҙмәт батырҙары тураһындағы очерктар, һүрәт­ләмә­ләр туплан­маһы ул. Геройҙар араһында кемдәр генә юҡ: совет илсеһе Кәрим Хәкимов, шағир-патриот Фәтих Кәрим, Советтар Союзы Геройы Мәғүбә Сыртланова, саңғы буйынса донъя чемпионы Зәлиә Насриева, летчик-космонавт Урал Солтанов, Ленин премияһы лауреаты академик Кев Сәлихов (Ҡазан), маршал Борис Шапошников, Рәсәй Геройы армия генералы Анатолий Романов, генерал Рауил Фәйрүзов, СССР-ҙың халыҡ артисы Инна Чурикова… Яҡташыбыҙ еңел атлетика буйынса донъя чемпионы Нурзиә Баһманова тураһында ла “Башҡортостан” гәзитендә тәүләп Әнүәр Сөләймәнов яҙып сыҡты. Республикабыҙ хөкүмәтенең элекке башлығы Рим Баҡыев, Татарстандың элекке хөкүмәте башлығы Мөхәммәт Сабиров хаҡындағы очерктары менән дә билдәлелек яуланы ул. 1977 йылда Әнүәр студент ҡына көйө Ҡазанға бара, Хәсән Туфан, Шәйхи Маннур, Хәсән Саръян ише яҙыусылар менән осраша.
Эйе, йәштән үк юғарылыҡҡа ынтылды ул. Ошо холҡо, әҙәбиәткә, мәҙә­ниәткә мөкиббән китеүе арҡаһында Башҡортостанда тыуып үҫеп, Татарстанда уңышлы эшмәкәрлек алып барған яҡташтарыбыҙ тураһындағы “Ерҙәге йондоҙҙар” исемле йыйынтығы баҫылып сыҡты. Ул китапта йөҙҙән ашыу билдәле шәхестең хеҙмәт һәм тормош юлы яҡтыртылған. Башҡорт­остан татар дуҫтарыбыҙға күпме данлы-даланлы ул-ҡыҙ үҫтереп биргән! Был ике ҡәрҙәш халыҡ араһында борондан килгән дуҫлыҡ билдәһе, шуның матур бер һөҙөмтәһе түгелме ни?!
Эйе, Әнүәр үҙе — татар егете, туған халҡын өҙөлөп һөйә, шуға уның данлыҡлы ул-ҡыҙҙары хаҡында яҙыуҙан туҡтамай. Ҡайҙа уңған, күркәм эш ҡылған татар бар, Әнүәр шунда иң беренсе барып етә һәм күргәне-белгәне хаҡында бар ғаләм менән уртаҡлаша. Афарин! Беҙгә бындай егәрле, үткер, утлы-ялҡынлы егеттәрҙән өлгө алырға, улар һымаҡ булырға ынтылырға кәрәк. Ундай сифат тынғыһыҙ йәндәргә, эше, халҡы өсөн өҙөлөп торғандарға ғына хас.
Әйткәндәй, 5 сентябрҙә киске сәғәт 7-лә Өфөнөң “Нур” татар дәүләт драма театрында Әнүәр Сөләймәновтың ижад кисәһе була. Ҡәләм оҫтаһына уҡыусыларының, дуҫтарының әйтер һүҙе, һис шикһеҙ, күптер.