Һабантуйҙа ҡатнашыусыларҙың бары­һын да Хәйбулла районы делегацияһы тарафынан төҙөлгән башҡорт йәйләүе үҙенә йәлеп итте. Килгән ҡунаҡтар халҡыбыҙҙың боронғо кәсептәре – ҡортсолоҡ, һунарсылыҡ, балыҡсылыҡ, игенселек кеүек халыҡ шөғөлдәре тәҡдим ителгән күргәҙмәләр менән танышты. Күптәр ҡайын туҙынан һағыҙ ҡайнатыуҙы, мейес янында ҡорот эшләүҙе тәүге тапҡыр күрһә, икенселәрҙе иһә туҡыу станоктарында ба­лаҫ һәм шәл һуҡҡан оҫтабикәләрҙең эше ҡыҙыҡһындырҙы.
Үҫәргән ырыуының ҡатын-ҡыҙ күлдәктәре төп урын алған милли костюмдар күргәҙмәһе янынан да кеше өҙөлмәне. Шуны­һы ҡыуаныслы: ҡунаҡтар ҡурай, ҡымыҙ, бал, төрлө милли аш-һыу төрҙәрен, “Яңы тормошҡа” редакция-нәшриәт комплексы продукцияһын һатып алыу бәхетенә иреште.
Ситтә йәшәгән ҡан-ҡәрҙәштәребеҙ милләттәштәре менән аралашып, сарсаған күңелдәрен туған моңдар менән ҡандырып алғандан һуң, сараның төп өлөшө башланды. Байрамда Ленинград өлкәһе губернаторы вазифаһын башҡарыусы Александр Дрозденко, Санкт-Петербург ҡалаһы губернаторы Георгий Полтавченко, Бөтә донъя башҡорттары ҡоролтайының Башҡарма комитеты рәйе­се Румил Аҙнабаев, Татарстан Республи­ка­һының Дәүләт Советы Рәйесе Фәрит Мөхәмәтшиндарҙың ҡатнашыуы һа­бантуйға оло мәртәбә өҫтәне. Хәй­булла районының рәсми делегацияһы составында район хакимиәте башлығы Раил Ибраһимов, “Бүре­бай тау-ба­йыҡтырыу комбинаты” ябыҡ акционерҙар йәм­ғиә­тенең генераль директоры, Дәүләт Йыйылышы — Ҡоролтай де­пу­таты Рөстәм Аблаев, “Башҡорт баҡыры” яуаплылығы сиклән­гән йәмғиәтенең генераль директоры Игорь Карепанов һәм башҡалар бар ине.
Ленинград өлкәһе һәм Санкт-Петербург халҡы “Каруан­һарай” фольклор-эстрада төркөмө сығышын, хәй­бул­ла­лар­ҙың “Сиҙәм” халыҡ бейеү, “Аҡтамыр” вокаль, “Түңгәүер” ҡурай­сы­лар, “Ҡош юлы” фольклор ансамбл­дәренең дәртле бейеү­ҙәрен, моңло йырҙарын көслө алҡыштарға күмде. Район мәҙәниәт йорто хеҙмәткәрҙәре ойошторған милли уйындарҙа һәр кем ихлас ҡатнашты.
Йыраҡ Питер ерендә — Нева яры буйында бер көн генә булһа ла күркәм милли байрамыбыҙ – һабантуй гөрләне: ул күптәр күңелендә йылы тойғо ҡал­дырҙы, яҡташтары менән осраштырҙы, үҙ халҡының мәҙәниәте өсөн ғорурлыҡ хистәре уятты.



Румил АҘНАБАЕВ, Бөтә донъя башҡорттары ҡорол­тайының Баш­ҡар­ма комитеты рәйесе, Башҡорт­остан Республикаһының Дәүләт Йыйылышы – Ҡо­рол­тай депутаты:
– Санкт-Петербург менән Башҡортостанды тарихи дуҫлыҡ ептәре бәйләй, һәм уны нығытыу — беҙҙең изге бурысыбыҙ. Ошондай ҙур һәм йөкмәткеле сарала мәҙәниә­тебеҙҙе лайыҡлы күрһәткән хәйбуллаларға ҙур рәхмәт!

Лидия ӘЛМӨХӘМӘТОВА, Санкт-Петербургта йәшәй:
– Мин Аҡъяр ауылында тыуып үҫтем, Питерҙа 30 йылға яҡын йәшәйем. Тыуған еремде бик һағынам, туған телемде онотмайым. Яҡташтарымдың кил­гә­нен ишеткәс, барлыҡ эшемде ҡалдырып, байрамға ашыҡтым. Бик тулҡын­ланам. Хәйбуллалар өсөн ғорурланып ултырҙым, иҫ киткес сағыу тамаша бүләк иттеләр. Рәхмәт, яҡташтар!