Ауыл эшсәндәренең байрам шатлығын уртаҡлашырға был юлы республика Президенты вазифаһын башҡарыусы Рөстәм Хәмитов та килде.
Ул тәүҙә тирмәләрҙе ҡараны, халыҡ менән аралашты, ауыл хужалығы техникаһы күргәҙмәһе менән танышты, хатта салғысылар конкурсында ҡатнашты.
"Туймазы ҡошсолоҡ фабрикаһы", "Агрогусь", "Башнефть-бурение", "Туймазыхиммаш", "Ҡандра икмәге" йәмғиәттәре, "Бишенде", "Рассвет", Фәрхетдинов, Мичурин исемендәге хужалыҡтар, Төмәнәк, Бишҡурай, Илсембәт, Собханғол, Кәкребаш, Үрге Троицк ауылдары ҡуйған тирмәләр янында олоһо ла, кесеһе лә күп ине. Уң яҡта сауҙа рәттәре теҙелеп киткән, "Китап донъяһы" йәмғиәте һәм күсмә библиобус күргәҙмә ойошторған. Мәҙәниәт һарайының халыҡ уйын ҡоралдары оркестры күңелле көй-моң менән күңелдәрҙе күтәрә.
– Элек-электән килгән был байрам һәр беребеҙгә бөгөн дә кәрәк: халыҡтың рухын нығытыу һәм кәйефен күтәреү өсөн, – тип сәләмләне Рөстәм Зәки улы. – Әҙерәк ял итеп алайыҡ. Көн матур, ҡояш балҡып тора. Ямғыр булһа, тағы ла яҡшыраҡ булыр ине, яуым-төшөм көтәбеҙ. Ямғыр яуһа, аҙыҡ та, ризыҡ та артыр.
Рөстәм Хәмитов билдәләүенсә, Туймазы районы һәм ҡалаһы – ныҡлы административ берәмек. Был яҡты төйәк иткән халыҡ ауыл хужалығында ла, машина эшләү тармағында ла, төҙөлөштә лә, мәҙәниәттә лә, бер һүҙ менән әйткәндә, һәр тармаҡта һынатмай. Туймазы шикелле алдынғы райондар һәм үҫешкән ҡалалар күберәк булһа, тормошобоҙ ҙа яҡшырасаҡ.
Рөстәм Зәки улы республикабыҙҙың социаль-иҡтисади хәле менән ҡыҫҡаса таныштырып:
– Әле күп йүнәлештәр буйынса алдынғыбыҙ: сәнәғәт, иҡтисад, ауыл хужалығы үҫешкән, — тип билдәләне. — Шул уҡ ваҡытта хәл ителмәгән проблемалар ҙа байтаҡ, хатта бик күп. Кешеләрҙең йәшәү кимәлен күтәрергә кәрәк, авария хәлендәге торлаҡты һүтеү, эш хаҡын арттырыу мәсьәләләре беҙҙе айырыуса борсой.
Республика башлығы хеҙмәт алдынғыларының бер төркөмөнә дәүләт наградалары тапшырҙы.
Байрам ауыл эшсәндәренең иңенә ҡанат ҡуйыуҙы, тракторсы, һауынсы кеүек кәрәкле һөнәрҙәрҙе һайлаусыларҙы данлауҙы маҡсат иткән театрлаштырылған тамаша менән үрелеп барҙы. Тос иген башаҡтары, иге-сиге күренмәгән баҫыу, игенсе тураһында механизатор егеттәр башҡарған дәртле йырҙарҙы тыңлау, аҡ халатлы һауынсы ҡыҙҙарҙың һыйыр һауыу, һөт һөҙөү, уны феләктәргә ҡойоу күренешен ҡарау ауыл мөхитенә алып инде. Иген сәсеү, тырматыу һәм утау кеүек эштәрҙе күрһәтеү бөтөнләй көтөлмәгәнсә килеп сыҡты. Ә инде аҙаҡтан балаларҙың сәхнәне бер итеп бейеүе бынамын тигән алмаш үҫеп килеүе хаҡында һөйләй ине.
– Кем беренсе килгән?
– Тәкәне кем алған?
Тирмә янындағы ир-аттың һөйләшеүе иғтибарымды йәлеп итте. Ысынлап та, ҡайһы һабантуй ат сабыштырыуһыҙ һәм көрәшһеҙ үтһен?!
Милли көрәштә абсолют чемпион булып Наил Мөхәмәтйәнов танылды. Ат сабышында "Игол" ҡушаматлы арғымаҡта Виктор Леонтьевҡа етеүсе табылманы, унан тыш Руслан Муллағәлиев ("Миләш") менән Игорь Иванченко ("Гдан") алда килде. Бүтән төрлө сәмле ярыштарҙа һәм ҡыҙыҡлы уйындарҙа ла һәр кем теләп ҡатнашты. Өҫән буйы кискә тиклем гөрләп торҙо.