Район һәүәҫкәрҙәренең “Әбйәлил биҙәктәре” тип аталған сығышы ысын мәғәнәһендә сәнғәт һөйөүселәр өсөн ҙур асыш булды. Әйтерһең дә, сәхнәлә ижади коллективтар түгел, ә Әбйәлил халыҡ филармонияһы сығыш яһай. Бөтә Рәсәй һәм республика конкурстары лауреаты, “Иҙел буйы-2013” хор һәм вокаль ансамблдәр конкурсының гран-при эйәһе булған район мәҙәниәт һарайының халыҡ хоры (етәксеһе — Заһит Ғәбитов) сығышы менән асылып китте сағыу тамаша. Артабанғы сығыштарҙың да һәр береһе профессиональ юғарылыҡта булыуы менән хайран ҡалдырҙы, сәхнә кейемдәренең сағыулығы күҙҙе ҡамаштырҙы. 117 кешене туплаған коллективта төрлө быуын һәүәҫкәрҙәренең ҡатнашыуы – үҙе бер ғәжәп үҙенсәлекле күренеш. Мәҫәлән, Байым мәҙәниәт йортоноң “Күбәләк биҙәктәре” бейеү ансамбле инәйҙәрендә йәштәрсә дәрт тә, ололарса аҡыл да ярылып ята. Сәхнәгә ғашиҡ өлкәндәр үҙҙәренә махсус күлдәк тектереп, таҡмаҡтар сығарып, концертта ҡатнашырға дәрт иткән.
Һүҙ юҡ, Әбйәлилдә сәнғәткә ғашиҡ кешеләр йәшәй. Бында етәкселәр ҙә мәҙәниәтте үҙ итә, даими ярҙам күрһәтә. Шулай булмаһа, һәр мәктәптә тиерлек бейеү түңәрәктәре ойошторолор инеме?! Йыл һайын район күләмендә үткән “Байыҡ” бейеү конкурсы ғына ни тора! Әбйәлилдә бейемәгән кеше юҡ, тигән һүҙ ҙә хаҡтыр, күрәһең. Ошоға ҡеүәт өҫтәп, яҡташтарҙың йыл һайын “Байыҡ” республика телевизион бейеү бәйгеһендә гран-при яулауын әйтеү ҙә етә. Ә халыҡ-ара, Бөтә Рәсәй, республика конкурстары лауреаты, ЮНЕСКО ҡарамағындағы халыҡ-ара ассоциация ағзаһы, Ким Әхмәтйәнов исемендәге премия лауреаты булған “Йәшлек” халыҡ бейеүҙәре ансамбле хаҡында әйтеп тораһы ла юҡ.
Район хакимиәте башлығы Рим Сыңғыҙовтың мәҙәниәт өлкәһенә ҙур ярҙам күрһәтеүен яҡташтары яҡшы белә. Тап етәксенең тырышлығы менән һәр ансамбль өсөн сәхнә костюмдары тектерелгән, төрлө конкурстарҙа ҡатнашыу мөмкинлеге тыуҙырылған, мәҙәниәт йорто, ауыл клубы һәм мәктәптәрҙә йыр, ҡурай, бейеү түңәрәктәре һаҡланып ҡалған, мәҙәниәт усаҡтарын ремонтлау өсөн аҡса даими бүленә, музыка ҡоралдары һатып алына, яңы бейеүҙәр һалыу өсөн белгестәр саҡырыла. Район хакимиәтенең мәҙәниәт бүлеге начальнигы Гөлшат Лавренованың тынғыһыҙлығы һәм талапсанлығы һөҙөмтәһендә бөгөн һәр ауылда мәҙәниәт усаҡтары гөрләп эшләй. Башҡа райондарҙа клубтар ябылған мәлдә, бында, киреһенсә, яңылары асыла. Тап шулай берҙәм һәм маҡсатлы эш алып барыуҙың матур күренеше, күркәм һөҙөмтәһе булды ла инде Сибайҙағы сағыу тамаша.



Гөлшат ЛАВРЕНОВА, Әбйәлил районы хакимиәтенең мәҙәниәт бүлеге начальнигы:
— Беҙҙә йыл һайын — Мәҙәниәт йылы, тип әйтер инем, сөнки районда ошо өлкәгә ҡағылышлы төрлө саралар йыш үтә, конкурстарҙа ҡатнашып, һәр саҡ призлы урындар алып торабыҙ. Был юлы күршеләребеҙгә әбйәлилдәрҙең бай мәҙәни “күстәнәс”ен килтерергә булдыҡ. Залдың тулы булыуы, һәр сығыштың көслө алҡыштар менән оҙатылыуы сибайҙарға оҡшағандыр, тигән фекер уята. Тик шуныһы күңелде бер аҙ ҡырҙы: үҙенең театр берекмәһе, драма театры, сәнғәт училищеһы булған ҡалалағы мәҙәни өлкәнең үҫеше өсөн яуаплы етәкселәрҙе күреп, фекерҙәрен ишетә алманыҡ.
Мәмдүҙә ИЛБӘКОВА, Башҡортостандың атҡаҙанған мәҙәниәт хеҙмәткәре, Сибай ҡалаһы:
— Иҫ киткес матур тамаша! Музыка белгесе булараҡ шуны әйтер инем: район мәҙәниәт һарайының халыҡ хоры хатта күп кенә профессиональ йырсыларға өлгө булырлыҡ. Тот та бөгөндән филармония ойоштор!

Сәфинә ҠОТЛОҒОЛОВА, тамашасы:
— Үҙем Әбйәлил районынан булғас, концертҡа ашҡынып килдем. Яҡташтарым өсөн ҡыуанып ултырҙым. Әбйәлилдәрҙең концерты тамашасы өсөн оло бүләк, яңы табыш булды. Рәхмәт, йышыраҡ килегеҙ!