Башҡортостан Республикаһының киләсәге ышаныслы ҡулдарҙа, тип ныҡлы әйтә алабыҙ. Был хаҡта һәләтле балаларҙың Өфөлә үткән “Башҡортостан Республикаһы баш ҡалаһының киләсәге” слеты асыҡ һөйләй. Был сарала Өфө ҡалаһы хакимиәте һәр йылдағыса төбәк һәм Бөтә Рәсәй олимпиадаларында еңеүселәрҙе бүләкләне.
Бындай олимпиадалар милли-төбәк компоненты фәндәре буйынса уҙғарыла. Быйылғы уҡыу йылында Бөтә Рәсәй олимпиадаһында Өфө­нән 21 фәндән 70 мең уҡыусы көс һынашҡан. Ә инде олимпиада­ның төбәк этабында 453 уҡыусы ҡат­нашһа, уларҙың 19-ы – еңеүсе­ләр исемлегендә, 150-һе призлы урындар яулаған.
Олимпиаданың һуңғы этабында иһә Өфө ҡалаһы уҡыусы­ларынан еңеүселәр, призерҙар һаны – 13. Улар араһында милли-төбәк компоненты фәндәре бүлегендә үҙенең көсөн һына­ған Маргарита Гейт та бар. Ул – 52-се лицейҙың 11-се класс уҡыусыһы. Башҡорт теле буйынса олимпиадала башта үҙ мәктәбендә, аҙаҡ инде ҡалала беренсе урынды яулаған тырыш ҡыҙ республика кимәлендә 4-се урынға лайыҡ булған.
Немец ғаиләһендә тыуып үҫкән, башҡортса шулай таҙа, матур итеп һөйләшкән ҡыҙға һоҡланып: “Баш­ҡорт телен шулай яҡшы белеүеңдең сере нимәлә?”– тигән һорауҙы бирмәй булдыра алманым.
– Мин башҡорт телен етенсе клас­та уҡығанымда уҡ ентекләп өйрәнә башланым. Башҡорт­остан юлдаш телевидение­һы­ның “Башҡорт телен өйрәнәм” тапшырыуында ла ҡатнаш­тым. Ошондай олимпиадалар ҙа телде нығыраҡ белергә ярҙам итә. Был йәһәттән башҡорт теле уҡы­тыусыһы Сәриә Хәбир ҡыҙы Рәхмә­туллинаға рәхмәтем ҙур. Минеңсә, Башҡортос­танда йәшә­гән һәр милләт вәкиле башҡорт телен мотлаҡ белергә тейеш, сөнки был милләттең тарихы тәрән, мәҙәниәте лә, рухи ҡиммәттәре лә бик бай. Беҙ ошондай матур Баш­ҡорт­остан ерендә йәшәйбеҙ. Халҡы­ның ихлас­лығы өсөн рәхмәт. Уға хөрмәт йөҙөнән беҙ баш­ҡортса һөй­ләшергә, республи­кабыҙҙың камил­лығын бергәләп тулыланды­рырға тейеш­беҙ, – тип ихлас һөйләне ул.
Үҙенең бик күп тиңдәштәренә өлгө булған был ҡыҙҙың һүҙҙә­рен сарала ҡатнашҡан һәләтле бала­лар­ға рәхмәт әйтеп бүләк­тәр тап­шырған Өфө ҡала хаки­миәте баш­лығы урын­баҫары Сынтимер Баязитов та йөпләне. Слетта ҡатна­шыу­сыларҙы тәбрик­ләп ул респуб­ликабыҙ­ҙың, халҡы­быҙҙың ышаныслы ҡулдарҙа булыуын, ошондай һәләтле балаларға таянып, килә­сәктә тағы ла яҡшыраҡ, матуры­раҡ йәшәйә­сәгебеҙҙе билдәләне һәм, уҡыусыларға уңыштар теләп, ҡайҙа ғына йөрөһәләр ҙә, ҡайһы ғына илдә бейек үрҙәр яула­һалар ҙа, тыуған Башҡортос­танға әйләнеп ҡайтырға, уның милли кадрҙар ҡәүемен тулыландырып йәшәргә саҡырҙы.
Сарала шулай уҡ “Йыл уҡы­тыусыһы-2017” бәйгеһендә ҡат­наш­ҡан республика уҡытыу­сы­ларына Маҡтау ҡағыҙҙары менән Рәхмәт хаттары тапшырылды.
Слетты алып барыусылар­ҙың: “Киләһе йыл ниндәй йыл бу­лырға тейеш?” – тигән һора­уы­на бала­ларҙың “Мәға­риф йылы булһын” тип тәҡдим итеүе бер ҡыуандырһа, бер уҡыусы­ның “Туған тел йылы булһын” ти­гән тәҡдиме барыһын да уйлан­дырҙы. Беҙ ҡайҙа ғына, нисек кенә йәшәһәк тә, хал­ҡыбыҙҙың Ер йөҙөндә милләт, кеше булараҡ йәшәүендә туған тел ҙур роль уйнай шул.