Мифтахетдин Аҡмулланың тормошон һәм ижадын өйрәнгән әҙәбиәт белгесе Әхнәф Харисовтың билдәләүенсә, Аҡмулла – мәғрифәтсе йә шағир ғына түгел, ә иңенә шағир-импровизатор, аҡыл эйәһе, остаз һәм тәрбиәсе яуаплылығын алған халыҡ сәсәне лә. Бөгөн Урта Азия һәм күп төрки халыҡтарында олуғ остаз булып танылған, ХIХ быуат башҡорт шиғриәтенә ҙур өлөш индергән башҡорт сәсәненең ижадын өйрәнергә, Аҡмулла мираҫының рухи ҡеүәтен аңларға һәм һанларға хаҡлыбыҙҙыр.
Башҡортостан Республикаһының Мәҙәниәт министрлығы, республика Халыҡ ижады үҙәге, Сә­сәндәр үҙәге Миәкә район хөкүмәте адми­нистра­цияһы менән берлектә Халыҡ-ара Аҡмулла көндәре сиктәрендә “Аҡмулла нәсихәттәре” респуб­лика фольклор байрамын уҙғара. Сара мәғ­ри­фәт­се һәм шағир Мифтахетдин Аҡмулланың ижадын өйрәнеү, әҫәрҙәрен халыҡ араһында та­ра­тыу, йәш быуынды милли рухта тәрбиәләү, халыҡтың ауыҙ-тел ижадын, боронғо йола бәйге­ләрен – сәсәндәр әйтешен тергеҙеү маҡсатында ойошторола.
Бәйгелә профессиональ һәм үҙешмәкәр ҡоба­йыр әйтеүселәр, шағирҙар, ауыҙ-тел ижады оҫта­лары, фольклор коллективтар, Дим-Өршәк буйы башҡорттарының халыҡ кәсептәре буйынса оҫта­лары һәм рәссамдар ҡатнаша ала. Байрам программаһы сиктәрендә “Аҡмулла вариҫы” республика сәсән-импровизаторҙар конкурсы, сәсән­лек сәнғәте һәм халыҡ һөнәр-кәсептәре буйынса оҫталыҡ кластары, “Күҙ теймәһен ҡулы­ңа!”, “Бе­лә­геңә көс-ҡеүәт!” район күргәҙмәләре, ижади коллективтар, ҡобайыр әйтеүселәр (сәсән­дәр), М. Аҡмулла исемендәге премия лауреаттары һәм яҙыусыларҙың сығыштары, Миәкә районы­ның М. Аҡмулла исемендәге премияһын тапшы­рыу тантанаһы – гала-концерт ҡаралған. Респуб­лика фольклор байрамы 9-10 декабрҙә Миәкә районында үтәсәк.