Ағинәй хеҙмәттән йәм табып йәшәргә әйҙәй.

Ауылдар буйлап команди­ров­каларҙа йөрөгәндә төрлө ке­ше­ләр менән аралашырға, таны­шырға насип итә. Биша­уыл-Уң­ғар ауылында йәшәгән Нәсимә инәй Ғәлиәхмәтова ме­нән дә шулай ҡапыл һөйләшеп киттек.

84 йәшлек инәй бик алсаҡ, ихлас кеше булып сыҡты. Өлкән йәшкә етеүенә, тышта ҡара көҙ булыуына ҡарамаҫтан, ишек алды гөл-сәскәгә күмелгән, йорт эсе бөхтә итеп йыйыш­ты­рылған.

– Хеҙмәткә өйрәнгән ҡул­дар­ҙың бер минут та эшһеҙ торғоһо килмәй, – ти ул, йылмайып. – Нисек ҡул ҡаушырып ултырмаҡ кәрәк? Беҙҙең быуын балалары бәләкәй саҡтан уҡ эштә сынығып үҫте бит. Һуғыш йылдарында өлкән апайҙар менән бер рәт­тән көлтә урҙыҡ, ни ҡуш­һалар, шуны башҡарҙыҡ. Мәктәптә алты класс ҡына белем алырға тура килде.

1955 йылда ошо ауыл егете Ғә­лимйән Ха­жи­әхмәт улына ке­йәүгә сығып, бер ул һәм ике ҡыҙға ғүмер бирә улар. Ҡыҙ­ға­нысҡа ҡаршы, бер сабыйҙары бәпес сағында уҡ вафат бу­лып ҡала. Нәсимә апай колхоз­да быҙауҙар ҡарай, сөгөл­дөр­ҙә эшләй. Ғә­лим­йән ағай Өфө­лә милицио­нер булып хеҙмәт итә, урмансы эшен дә башҡара. Ауыл ерендә йә­шәгәс, мал-тыуарҙы, ҡош-ҡортто күпләп аҫ­рай улар, баҡса тул­тырып йәшел­сә-емеш үҫтерәләр. Балаларын да үҙҙәре өлгөһөндә эш­һөйәр, кешелекле, кесе­лекле итеп тәр­биә­ләйҙәр. Нәсимә Кә­рим ҡыҙы 13 йыл ауылдаштарына гә­зит-журнал да та­шый.

– Ике йыл Һәүәләй почта­һынан йәйәүләп йөрөнөм, аҙаҡ ҡына гәзит-журналды ауылға килте­реп бирә башланылар, – ти инәй. – Ул саҡ­та өй һайын алты-етешәр баҫма алдыралар ине, хаттар, открыткалар күп килә торғайны. Таш тултырылған кеүек ауыр сумканы  күтәреп, ҡар-буран, ел-ям­ғыр тимәй, өй беренсә таратып сыға инем. Гел маҡта­лып эшлә­нем, грамоталарым бихи­сап.

Бөгөн дә Нәсимә инәй иртәгәһе көнгә ыша­нысын юғалтмай, тыуған һәр таңға ҡыуанып ғүмер кисерә. Мәсеттә үткәрелгән байрамдарға йөрөй, бала­ла­рына, ейән-ейәнсәрҙә­ренә, бү­лә-бүләсәрҙәренә изге доға­ларын уҡып ҡына тора. Ҡәҙерле һәм ихтирамға лайыҡ өлкән йәштәге инәйҙе яҡын­­­­дары ла иғтиба­рынан, яр­ҙа­­мынан айырмай. Үҙе ме­нән бергә йәшәгән ейәне Ве­нер – өләсәһенең ныҡлы терәге.

Ауыл клубында Фәһимә Абдра­фиҡова ойошторған һәр байрамдан гел бик ҡәнәғәт булып ҡайта Нәсимә Кәрим ҡыҙы.

– Өлкән быуын кешеләре­нең күңелен күргәндәре өсөн бары­һына ла ҙур рәхмәт! Имен­лектә, тыныс тормошта татыу ғүмер кисерергә яҙһын һәр беребеҙгә, – тип теләй ағинәй.