Мәләүез районы Ҡотош ауылынан Илдус Шәрипов оҙаҡ йылдар Мәжит Ғафури исемендәге колхозда агроном, баш агроном булып эшләй. Илдә үҙгәртеп ҡороуҙар башланғас, күптәр эшҡыуарлыҡҡа тотонғас, уңған егет тыуған ауылында крәҫтиән хужалығы ойошторорға йөрьәт итә. Уға ул ваҡытта ни бары 28 йәш кенә була.

Колхозда ниндәйҙер кимәлдә тәжрибә туплаған егеткә был эшкә тотоноп китеүе ауыр булмай. Етмәһә, ер эшкәртергә бер нисә берәмек техникаһы ла була. Ауылдаштарының пай ерҙәрен ҡуртымға алып, уҙаман 1992 йылда 20 гектарҙа сөгөлдөр, 24 гектарында иген сәсә. Әлбиттә, фермер тәүҙә борсола, башлаған эшенең һөҙөмтәһе булырына икеләнә. Әммә көҙ баҫыуҙан мул уңыш алғас, Илдус Маркс улы ныҡлап үҫемлекселек менән шөғөлләнергә ҡарар итә. Туғандары, дуҫтары уның был ҡарарын ҡеүәтләп кенә ҡуя. Уңған, эшкә бөтмөр егет эшмәкәрлеген артабан дауам итеү өсөн кредитҡа ауыл хужалығы техникаһы һатып алыуға өлгәшә.

Бөгөн Илдус Шәрипов — аяғында ныҡлы баҫып торған фермерҙарҙың береһе, бына 30 йылға яҡын ул крәҫтиән хужалығына етәкселек итә. Уны районда ғына түгел, башҡа төбәктәрҙә лә яҡшы беләләр. Хатта тәжрибә уртаҡлашырға киләләр.

Хужалыҡтың әле 1800 гектар ере бар. Иген культуралары бер мең гектарҙы биләһә, ҡалған майҙандарға шәкәр сөгөлдөрө, көнбағыш, күп йыллыҡ үләндәр сәсәләр. Фермер йәшелсә үҫтереп тә хужалыҡ ҡаҙнаһына аҡса килтерә.

Йәмғиәт техника паркын яңыртыуға сығымдарҙы йәлләмәй, йыл һайын 15-20 миллион һумлыҡ техника, төрлө ауыл хужалығы ҡоролмалары һатып ала. Шуныһы мөһим: фермер бөгөн банктан бер ниндәй кредит алмай, үҙ аҡсаһына ғына эшмәкәрлеген алып бара. Әйткәндәй, үҫтерелгән продукцияны һаҡлау өсөн ике яңы келәт, йәшелсә һаҡлағыс, оҫтахана төҙөгәндәр.

Бөгөн хужалыҡта 300 баш һыйыр малы аҫрала, уны, нигеҙҙә, ит өсөн һимертәләр. Сифатлы һәм экологик яҡтан таҙа продукцияны һәр ерҙә яратып һатып алалар, күрше райондарға, Мәләүез ҡалаһы баҙарҙарына сығарып, аҡсаға әйләндерәләр.

– Кемделер айырып маҡтағы килмәй, һәр береһенең хеҙмәте юғары баһаға лайыҡ, – ти Илдус Шәрипов. – Уларҙың тырышлығы менән юғары күрһәткестәргә өлгәшәбеҙ инде.

Бында бөгөн 13 кеше эш урыны тапҡан, нигеҙҙә, туғандары һәм дуҫтары эшләй. Хужалыҡта ололар менән бер рәттән йәштәр ҙә етерлек, киләсәктә эшсе ҡулдарға ҡытлыҡ булмаясаҡ. Уңайлы шарттар булдырылғас, һәр кем эшкә ҙур теләк менән йөрөй. Хеҙмәт хаҡы, мәҫәлән, бөгөн 28 мең һум тәшкил итә. Ауыл эшсәндәренә ял итеү мөмкинлеге лә бар, күптәр республиканың “Янғантау”, “Красноусол” шифаханаларында һаулығын нығыта.

– Етәксенән уңдыҡ, үҙе лә ер тип йәбешеп ята, өҫтәүенә мал йәнле лә. Күп кенә етәкселәр баҫыуға, фермаларға килеп урамай, ә хужабыҙ һәр саҡ беҙҙең янда. Үҙе тракторға ултырып ер һөрөргә лә, сәскесте йүнәтергә лә ваҡыт таба. Мал тәрбиәләргә лә өлгөрә, – ти хужалыҡ хеҙмәткәрҙәре.