Радий Хәбиров республика предприятиеһын юбилейы менән ҡотланы

Республика етәксеһе Радий Хәбиров «ПОЛИЭФ» заводы коллективын һәм ветерандарын юбилейы менән ҡотланы.

40 йыл элек, 1985 йылда, «Химволокно» Башҡортостан етештереү берекмәһе – хәҙерге «Полиэф» заводының дирекцияһы булдырыла.

«Предприятие коллективын һәм ветерандарын, Благовещен халҡын ошо күркәм юбилей менән ҡотлайым», — тип яҙҙы Радий Хәбиров үҙенең телеграм-каналында.

Әлеге ваҡытта «ПОЛИЭФ» Рәсәйҙә терефтал кислотаһы етештергән берҙән-бер предприятие һанала. Башҡортостан Башлығы һүҙҙәренсә, был иһә ПЭТ синтезы өсөн төп сеймал, унан һыу өсөн пластик шешәләр эшләйҙәр. Терефталь кислотаһын башҡа полиэфир материалдары етештереүҙә лә ҡулланалар.

Заводта ҙур инвестиция проекттары уңышлы тормошҡа ашырыла. Шул уҡ ваҡытта производствоны яңыртыуға, экологик программаларҙы үҫтереүгә ҙур иғтибар бүленә. Бер нисә йыл инде бында икенсел сеймал ПЭТ гранулаһы етештерелә – һуңғы өс йылда 3 миллиард пластик шешә эшкәртелгән. Завод майҙансығында үҙенең ҡояш электр станцияһы бар.

«Предприятиеға тотороҡло үҫеш, ә уның бөтә хеҙмәткәрҙәренә — һаулыҡ һәм именлек теләйем», — тип йомғаҡ яһаны Башҡортостан Башлығы.

https://www.bashinform.ru/news/economy/2025-08-15/radiy-habirov-pozdravil-s-yubileem-odno-iz-krupnyh-predpriyatiy-bashkirii-4350632