Радий Хәбиров «Башспирт» етәксеһе Әбдрәхимовты асыҡтан-асыҡ яҡлап сыҡты

Башҡортостан Башлығы Радий Хәбиров 2025 йылдың 30 сентябренә тиклем хеҙмәт вәкәләттәрен арттырыуҙа ғәйепләнеп һаҡ аҫтына алынған «Башспирт» акционерҙар йәмғиәтенең генераль директоры Рәйеф Әбдрәхимовты яҡлап сығыш яһарға әҙер булыуын белдерҙе.

Республика етәксеһе үҙенең ҡарары тураһында хөкүмәттең оператив кәңәшмәһендә белдерҙе һәм ҡулға алынған Рәйеф Әбдрәхимовтың «Башспирт» үҫешенә тос өлөш индереүен билдәләне.

«Беренсенән, Рәйеф Рамаҙан улы менән килеп тыуған хәлгә баһа биреүе ҡыйын, — тине Радий Хәбиров. — Һеҙ беләһегеҙ, мин профессиональ юрист һәм һәр ваҡыт ниндәйҙер баһаларҙан тыйылам. Әммә шуны әйтергә теләйем: мин предприятиены бөлгөнлөк юлына илткән Ноғоманов етәкселегендәге шайканы унан ҡыуып сығарғас, Рәйеф Рамаҙан улы бик ҡатмарлы эш башҡарҙы. Ул предприятиены көрсөктән сығарҙы. Хәҙер беҙ – барлыҡ күрһәткестәр буйынса илдә иң яҡшыларҙың береһе, ҡаты спиртлы эсемлектәр етештереү буйынса Рәсәйҙә бишенсе урынды биләйбеҙ. Акциздарҙың ғәҙәттән тыш артыуы. Предприятие 100 миллион һумдан ашыу килем күрһәтә һәм башҡалар. Аңлауығыҙса, ғәйепләүҙәрҙең асылын беләм. Быға ныҡ шикләнәм. Унда уны ҡурҡыныс енәйәтсе кеүек итеп тотмауҙарын һорап мөрәжәғәт итергә әҙермен. Белмәйем, ни өсөн ҡулға алырғалыр. Минең фекерем шундай. Уның өс балаһы бар. Шуға күрә Валерий Станиславович (Олейник - ред.), адвокаттар табығыҙ, үтенес менән мөрәжәғәт итергә әҙер булыуымды әйтегеҙ. Предприятие эшләргә тейеш. Александр Николаевич (Шельдяев - ред.), һөйләшеп килештек. Был еңел бирелмәне, бик нескә һәм ҡатмарлы эш. Шуға мин һеҙҙән вазифа башҡарыусы булып эшләүегеҙҙе һорайым. Ә Рәйеф Рамаҙан улын көтәбеҙ».

Хәтерегеҙгә төшөрәбеҙ, тәфтишселәр версияһы буйынса, Рәйеф Әбдрәхимов, 2022 йылдың авгусында «Башспирт» йәмғиәтенең генераль директоры вазифаһын биләгәс, Өфөлә мәҙәни мираҫ объекты тип иҫәпләнгән ике торлаҡ булмаған бинаны ҡуртымға алыу буйынса иҡтисади яҡтан файҙаһыҙ килешеүҙәрҙе өҙөү өсөн саралар күрмәгән. Был килешеүҙәрҙе «Башспирт»тың элекке етәкселеге конкурс процедураларын үткәрмәйенсә һәм иҡтисади нигеҙле булыу-булмауын баһаламайынса төҙөгән.

https://www.bashinform.ru/news/economy/2025-09-02/radiy-habirov-publichno-zastupilsya-za-rukovoditelya-bashspirta-abdrahimova-4370262