Хәбәр итеүебеҙсә, Сибай ҡалаһында “Башҡортостандың көньяҡ-көнсығыш райондары-2014”: “25-20” стратегияһы” II төбәк-ара инвестиция форумы уҙҙы. Унда Башҡортостан Президенты вазифаһын ваҡытлыса башҡарыусы Рөстәм Хәмитов, Ырымбур өлкәһе губернаторы вазифаһын ваҡытлыса башҡарыусы Юрий Берг, Ҡурған өлкәһе губернаторы вазифаһын ваҡытлыса башҡарыусы Алексей Кокорин, Силәбе өлкәһе губернаторы урынбаҫары Руслан Гаттаров, “Эшлекле Рәсәй” Бөтә Рәсәй йәмәғәт ойошмаһынан Андрей Назаров, Башҡортостан Хөкүмәте Премьер-министры урынбаҫары, “Урал аръяғы”н үҫтереү программаһының координация етәксеһе Илшат Тажетдинов, федераль һәм төбәк власы органдары, үҫеш институттары, Рәсәйҙең бизнес структуралары, йәмәғәт ойошмалары вәкилдәре һәм эксперттары, республиканың көньяҡ-көнсығыш район хакимиәттәре башлыҡтары, күренекле ғалимдар ҡатнашты.
Уңайлы шарттар булһын Ҡунаҡтар тәүҙә ҡаланың Балалар ижады үҙәгендә халыҡ кәсептәренән, ҡул эштәренән ойошторолған ғәжәп бай күргәҙмә менән танышты. Уларҙы бигерәк тә милли кейем, Сибай йәшмәһенән яһалған сувенирҙар, биҙәүестәр, кейеҙҙән баҫылған әйберҙәр һоҡландырҙы.
Унан республиканың көньяҡ-көнсығыш район хакимиәттәре башлыҡтары үҙ төбәге буйынса инвестиция проекттарын тәҡдим итте.
– Илдәге глобалләшеү, донъя баҙарындағы үҙгәрештәр төбәк-ара бәйләнештәрҙең яңы юлдарын табыуҙы, төрлө мөмкинлектәрҙе файҙаланыуҙы, яңыса фекерләүҙе талап итә, – тине Рөстәм Зәки улы, форумды асып. – Сарала төбәк-ара хеҙмәттәшлек мәсьәләләренә ентекле туҡталып, фекер алышып, тәжрибә уртаҡлашып, иҡтисад, мәҙәниәт, сәнәғәт, социаль өлкәләрҙә яңы башланғыстарға нигеҙ һалыныр тигән ышаныстамын. Ә “үҙ ҡаҙаныңда ғына ҡайнап” эш итеүҙең тейешле һөҙөмтәгә килтермәүе көн кеүек асыҡ. Заман муниципалитеттар, төбәктәр алдына агломерациялар, территориаль кластерҙар ойоштороу, бер нисә төбәк өсөн отошло булған программаларҙы дөйөм көс менән тормошҡа ашырыу бурысын ҡуя. Был йәһәттән үҫешкә этәргес биргән проекттарға ентекле туҡталыу, уның мөмкинлектәрен өйрәнеү мотлаҡ. Әлбиттә, төбәктәр араһында үҙ-ара конкурентлыҡ барлыҡҡа килеүе бик ихтимал. Көнләшергә түгел, ә эшлекле мөнәсәбәттә булыу кәрәк: шул саҡта башланғыстар һөҙөмтәлерәк һәм тиҙерәк тормошҡа ашасаҡ.
Рөстәм Хәмитов белдереүенсә, төбәк-ара хеҙмәттәшлеккә аҡрынлап булһа ла тәүге аҙымдар яһалған да инде. Мәҫәлән, Әбйәлил һәм Белорет райондарында Магнитогорск ҡалаһының ял йорттары асылған, Учалы һәм Верхнеуральск (Силәбе өлкәһе) райондары, Хәйбулла районы һәм Ырымбур өлкәһе араһында биләмә-ара кооперация булдырылған. Мәҙәниәт өлкәһенә туҡталғанда ла ҡаҙаныштар бар: төбәк-ара конкурстар, гастролдәр, башҡорт мәҙәниәте көндәре, һабантуйҙар даими үтеп тора. Күрше төбәктәрҙә милләттәштәребеҙҙең күпләп йәшәүен иҫәпкә алғанда, бындай хеҙмәттәшлек ике яҡ өсөн дә отошло буласаҡ.
Был фекерҙе күрше төбәктәрҙең башлыҡтары ла ҡеүәтләне. Улар үҙ сығышында форумда күтәрелгән мәсьәләләрҙең көнүҙәклеген билдәләне һәм үҙҙәрендә инвестиция проекттарын тормошҡа ашырыуҙа тотҡарлыҡтар булмаясағын белдерҙе.
Форумдың көн тәртибенә ҡуйылған тағы ла бер мәсьәлә Рәсәй Президенты Владимир Путиндың 2020 йылға ҡәҙәр илдә юғары технологияларға нигеҙләнгән 25 миллион яңы эш урыны булдырыу бурысына ҡайтып ҡалды. Башҡортостан Президенты ҡарамағындағы Инвестиция мөхитен яҡшыртыу буйынса йәмәғәт советының ултырышында иһә республикала уңайлы инвестицион мөхит булдырылыуы хаҡында бәйән ителде. Шулай уҡ төбәккә оҙайлы инвестицияларҙы йәлеп итеү технологиялары, уға бәйле закондарға үҙгәрештәр индереү, билдәле ваҡытҡа тиклем ҡайһы бер һалымдарҙан азат итеү, эшмәкәрлекте көйләүгә йүнәлтелгән дәүләт ярҙамы формалары, бәләкәй һәм урта эшҡыуарлыҡ өсөн административ кәртәләрҙе бөтөрөү кеүек мәсьәләләр ҡаралды.
Йыйында Башҡортостан, Ырымбур, Силәбе һәм Ҡурған өлкәләре хөкүмәттәре араһында төрлө тармаҡтар буйынса килешеүҙәргә ҡул ҡуйылды. Улар райондар араһында ла төҙөлдө. Миҫал өсөн, Баймаҡ–Силәбе өлкәһенең Ҡыҙыл районы, Әбйәлил Магнитогорск ҡалаһы менән тығыҙ бәйләнештә буласаҡ.
Шулай уҡ сит илдәр менән хеҙмәттәшлеккә юл асҡан килешеүҙәргә лә ҡул ҡуйылды.
Төбәк-ара йыйынға бәйле БДУ-ның Сибай институтында, ҡаланың 24-се һөнәрселек лицейында “түңәрәк өҫтәл”дәр ойошторолдо.
Киләсәк – йәштәр ҡулындаЙыйын иртәгәһенә Баймаҡта дауам итте. Сарала ҡатнашыусыларҙы Халыҡ ижады үҙәгендә эшҡыуарлыҡҡа арналған күргәҙмә ҡаршыланы. Күптәр, Өфөнән килеп, тәмле коктейлдәрен тәҡдим иткән йәш йүнсел Игорь Чернов (һүрәттә) янына йыйылды. Бушлай эсемлекте ауыҙ итергә теләү менән бергә, егеттең эш тәжрибәһен өйрәнергә ашҡынған йәштәр байтаҡ ине. Игорь, ысынлап та, үҙ эшенең оҫтаһына әүерелгән.
“Йәштәр эшҡыуарлығы: киләсәк архитекторҙары” тип аталған йыйында Башҡортостан Хөкүмәте Премьер-министры урынбаҫары, Хөкүмәт Аппараты етәксеһе Илшат Тажетдинов, республиканың йәштәр сәйәсәте һәм спорт министры урынбаҫары Александра Акулина, “Һин – эшҡыуар” федераль проектының Башҡортостандағы кураторы, “Синергия” эшҡыуарлыҡ һәм социаль инновацияларҙы үҫтереү институты президенты Руслан Ҡазыханов, Баймаҡ районы хакимиәте башлығы Илшат Ситдыҡов, юғары уҡыу йорттары уҡытыусылары, йәш эшҡыуарҙар, үҙ эшен асырға теләүселәр, студенттар ҡатнашты.
Илшат Азамат улы үҙ сығышында республикала бәләкәй һәм урта эшҡыуарлыҡты үҫтереү, йәштәрҙең мәшғүллек проблемаларын хәл итеү буйынса байтаҡ аныҡ эш башҡарылғаны хаҡында әйтте. Шулай уҡ был тармаҡҡа килергә теләк белдергәндәргә ҡыйыуыраҡ булырға, федераль һәм республика программаларын әүҙемерәк файҙаланырға саҡырҙы.
– Республиканың көньяҡ-көнсығыш райондарын иҡтисади яҡтан үҫтереү буйынса программаға ярашлы йүнселлекте, айырыуса бәләкәй эшҡыуарлыҡты үҫтереү йәһәтенән бик күп эш башҡарыла. Әммә барыһы ла был тармаҡҡа килергә ынтылып тормай. Тәү сиратта иҡтисади белем булмау бәкәлгә һуға. Ошо мәсьәләне хәл итеү — төп маҡсатыбыҙ, — тине Илшат Тажетдинов. — Үҙ эшеңде асыу, бизнес-план төҙөү, артабан уны үҫтереү мөмкинлектәре тураһында юғары уҡыу йорттарында ҡыҫҡа ваҡытлы курстар, семинарҙар ойошторола. Шулай уҡ күп кенә районда Башҡортостандың микрофинанслау үҙәгенең офистары асылды, 2011- 2013 йылдарҙа ғына микрозаем күләме өс тапҡырға артҡан. Һуңғы өс йылда биш меңдән ашыу эш урыны булдырылды.
Республиканың көньяҡ-көнсығыш төбәге ауыл хужалығы, урман эшкәртеү, малсылыҡ, йәшелсәселек, йылҡысылыҡ өсөн уңайлы. Бөгөн республикала “Эш башлаусы фермер”, “Ғаилә фермаһы”, “500 ферма» кеүек программалар эшләй, яңы техника алыу өсөн субсидия ҡаралған. Программаларҙан, булған мөмкинлектәрҙән файҙаланырға кәрәк. Йәштәргә әүҙемерәк булыу мөһим. Буласаҡ эшҡыуарҙар өсөн Рәсәйҙең киң билдәле бизнес-тренеры Бари Алибасовтың тренингы, уның йүнселлеккә килеү юлдары хаҡында ҡыҙыҡлы һәм мауыҡтырғыс итеп һөйләүе бик фәһемле булды.
Ике көн дауам иткән “Урал аръяғы-2014” форумында күтәрелгән мәсьәләләрҙең ҡағыҙҙа ғына ҡалмауын, тормошҡа ашыуын теләйһе ҡала. Шул саҡта ғына төбәк мәнфәғәтендә ҡабул ителгән программа һөҙөмтә бирәсәк.
Юрий БЕРГ, Ырымбур өлкәһе губернаторы вазифаһын ваҡытлыса башҡарыусы:— Сараның баш ҡалала түгел, ә Сибайҙа үтеүе күпкә отошло булды, тип уйлайым. Ырымбур өлкәһенең Гай районы һәм Орск ҡалаһы Хәйбулла районы, Сибай һәм Баймаҡ ҡалалары менән күптән хеҙмәттәшлек итә.
Юғары кимәлдә үткән йыйын өсөн Башҡортостан Президенты вазифаһын ваҡытлыса башҡарыусы Рөстәм Хәмитовҡа, Сибай ҡала хакимиәте башлығы Хәлит Сөләймәновҡа ҙур рәхмәт белдерәм.
Алексей КОКОРИН, Ҡурған өлкәһе губернаторы вазифаһын ваҡытлыса башҡарыусы:– Был йыйын ҙур әһәмиәткә эйә оло ваҡиға, иҡтисадты үҫтереү, урындарға яңы инвесторҙар йәлеп итеү йәһәтенән ышаныслы башланғыс булды. Ҡурған өлкәһендә “Башҡортостан продукты” проекты уңышлы эшләй, төбәк-ара хеҙмәттәшлек артабан да дауам итер, килешеүҙәр ике яҡ өсөн дә отошло булыр тигән өмөттәмен.
Илшат ТАЖЕТДИНОВ, Башҡортостан Хөкүмәте Премьер-министры урынбаҫары:— Рәсәйҙең өс субъекты етәкселәренең ҡатнашыуы быйылғы сараның мәртәбәһен арттырҙы. Иң мөһиме — өр-яңы проекттарға һәм төбәк-ара башланғыстарға нигеҙ һалынды. Программаның 2015 йылға тиклем иҫәпләнеүенә ҡарамаҫтан, уны оҙайтыу мөмкинлектәре булыр һәм ике йылдан өсөнсө тапҡыр йыйылырбыҙ тигән ҙур ышаныста ҡалам.
Бари АЛИБАСОВ, бизнес-тренер, Мәскәү ҡалаһы:— Башҡортостанға дүртенсе тапҡыр килдем. Һәр саҡ уның тырыш халҡына, матур тәбиәғәтенә һоҡланып ҡайтам. Ғаиләм менән Абҙаҡ ял йортонда ял итергә тура килде. Донъяның бер ере лә Башҡортостандың тәбиғәтенә етмәй. Ошо матурлыҡтың ҡәҙерен белегеҙ, унан “аҡса эшләргә” өйрәнегеҙ.