Фәрҙиән ауыл уҡытыусылары Йәүһәрә менән Шакирйән Хажиевтарҙың татыу ғаиләһендә бынан 60 йыл элек тәүге булып донъяға килә. Унан һуң йәнә алты сабый тыуа: Наилә, Даян, Нәүилә, Ғаян, Рафиҡ, Зилә. Һөләймәндә, һуңынан Яңы Мишәрҙә лә иң абруйлы, зыялы ғаилә булды улар.

Ошо сифаттарҙы Хажиевтар балаларында ла тәрбиәләне. Уларҙың бишәүһе юғары белем алды. Оло улдары Фәрҙиән, мәҫәлән, Силәбе ауыл хужалығын механизациялау һәм электрлаштырыу институтын тамамлағас, тәүҙә йүнәлтмә буйынса Ҡурған өлкәһендә эшләй. Бер ни тиклем тәжрибә туплағас, Мәсетле районындағы Салауат Юлаев исемендәге колхоздың баш инженеры итеп тәғәйенләнә. Егеттең тырышлығын, әүҙемлеген күреп, тиҙҙән уны Фрунзе исемендәге колхоздың рәйесе итеп һайлайҙар. Ана шунда асыла ла инде Фәрҙиәндең етәкселек һәләте.
“Һәләт” тигән һүҙҙе күп осраҡта артистарға, әҙиптәргә ҡарата ғына әйтәбеҙ. Шул уҡ ваҡытта башҡа һөнәр эйәләре ситтә ҡала. Ниңәлер беҙ “талантлы хирург”, “талантлы инженер”, “талантлы төҙөүсе”, “талантлы етәксе” тип әйтеүҙән ҡурҡабыҙ.
Колхоз рәйесе булып Фәрҙиән Хажиев эшләгән 15 йыл эсендә хужалыҡ ныҡ алға китә: быға тиклем булмаған мал һимертеү комплексы, ауыл мәҙәниәт йорто, колхоз идараһы бинаһы төҙөлә, умарталыҡ ойошторола, балалар баҡсаһы асыла, урамдарға, ауыл араларына яңы юлдар һалына, мал һаны ишәйә, колхозсыларҙың хеҙмәт хаҡы бермә-бер күтәрелә.
Күп таҡылдарға, түрәләргә тәрилкә тоторға яратмаған Фәрҙиән район үҙәгенә — Оло Ыҡтамаҡҡа — күсеп килгәс тә юғалып ҡалмай. “Агропромхимия” етештереү берекмәһенең баш инженеры, кирбес заводы директоры, төҙөлөш материалдары комбинатының баш инженеры вазифаларында көсөн һынай. Дүрт йыл дәүләт техник күҙәтеү инспекцияһы начальнигы булып эшләгәс, район хакимиәте башлығының беренсе урынбаҫары — ауыл хужалығы идаралығы начальнигы вазифаһын үтәй башлай. Бәлки, бәғзеләр эштән-эшкә күсеп йөрөүҙе оҡшатып та етмәҫ, ләкин Фәрҙиән Хажиев өсөн улар тормош һәм тәжрибә туплау баҫҡыстары ине. Баҫҡыстан-баҫҡысҡа күтәрелгән һайын уның аң-белеме арта, ябай хеҙмәт кешеләренең уй-кисерештәрен дә тәрәнерәк аңлай башлай. Күптән түгел Фәрҙиән Шакирйән улына “Башҡортостан Республикаһының атҡаҙанған ауыл хужалығы хеҙмәткәре” тигән маҡтаулы исем бирелеүе лә — бының асыҡ дәлиле.
Ошо йылдар эсендә ул тормош юлдашы Гөлфирә менән өс ул тәрбиәләп үҫтерҙе. Бөтәһе лә хәҙер юғары белемле: Марат — Башҡортостан дәүләт аграр университетын, Айрат — Рәсәй Эске эштәр министрлығының Өфө юридик институтын, Илдар Өфө дәүләт авиация техник университетын тамамлаған.
Еңелеп, төңөлөп йәшәүҙе, ваҡиғалар артынан эйәреүҙе күҙ алдына ла килтермәй Хажиев. Халыҡта “Егет кешегә етмеш төрлө һөнәр ҙә аҙ” тигән әйтем бар. Был һүҙҙәр бөгөн ил ағаһы йәшен үтеп, аҡһаҡалдар ҡорона юл тотҡан Фәрҙиән Шакирйән улына туранан-тура ҡағыла.