Шул тиклем оҫталыҡ, илһам, ижади көс ҡайҙан килә икән? Әлиә менән Зәлиә Сиражетдиноваларҙың данлыҡлы Мөжәүир хәҙрәттең бүләсәләре булыуында түгелме икән сәбәп? Лира Яҡшыбаеваның бынан бер нисә йыл элек нәшер ителгән “Мөжәүир хәҙрәт” китабының тышлығына ла уларҙың һоҡланғыс һүрәттәре бирелгәйне. Эйе, мин уларҙы иң элек рәссам тип белә инем. Ә талантлы кеше һәр эштә лә маһир. Әле уларҙың ҡотло ҡулдары тыуҙырған күҙҙең яуын алып торған түшелдеректәр, селтәрҙәр, сулпылар, сымһыҙ телефондар өсөн бәләкәй сумкалар һәм башҡа биҙәүестәр Сибай ҡалаһында ғына түгел, башҡа урындарҙа ла тиҙ арала танылыу яулап өлгөрҙө.

Былтыр Сибайҙа республика кимәлендә уҙғарылған “Батырҙар иле” конкурсының йомғаҡлау тантанаһына Зәлиә менән Әлиәнең иҫ киткес оҫталыҡ, теүәллек менән ижад ителгән түшелдеректәрҙә килеүе һәр кемдең иғтибарын йәлеп иткәйне. Әсәйҙәре Зилә апай ҡыҙҙарына тип бар күңелен һалып эшләгән ҡупшы биҙәүестәрҙе улар бик мөһим байрамдарҙа ғына таға. Тора-бара ҡыҙҙар үҙҙәре лә халҡыбыҙҙың ҡатмарлы кәсебенә тотонорға була. Асия Ғәйнуллинала оҫталыҡ дәресендә булып, өлгөләргә күҙ һалып, шул уҡ ваҡытта әсә кешенең дә һабаҡтарын ҡулланып, тәүге эштәрен ижад итергә тотоналар. Әлиә башлыса таштар, мәрйендәр ҡушып биҙәргә тырышһа, Зәлиәнең эшендә иһә һуғылған тинлек көмөш аҡсалар, ҡабырсаҡтар өҫтөнлөк итә. Һәр бер һоҡланғыс эштән һуң ҡомар уяна бара. Етмәһә, “Бәйләнештә” социаль селтәре биттәренә бер генә фотоны һалыу етә, һорауҙар яуа башлай.
Шулай бер ваҡыт Әлиәнең ҡыҙыл, алһыу төҫтәге таштар менән биҙәп эшләнгән түшелдерегенә 80 йәшлек бер инәйҙең күҙе төшә. Ҡыҙ бар халыҡҡа күрһәтеп ҡуйһа ла, һатып ебәреү тураһында башына ла килтермәгән була. Ә теге инәй өҙмәй ҙә ҡуймай: “Шул матур түшелдеректе миңә алып килегеҙ”, — тип балаларынан шылтыраттыра икән. Ярай, оло кешенең һүҙен йыҡмайым, тип һатып ебәрергә була оҫта. “Инде шундай уҡ килеп сығырмы икән, шул тиклем күңел йылыһы һалып эшләнгәйне бит әле. Үҙемә ҡалдырырмын тип уйлай инем”, – ти Әлиә.
Ҡыҙҙарҙың эштәренә ихтыяж ҙур. Яңыраҡ өс эшен Бөрйәндән һатып алғандар. Әбйәлилдән, Ейәнсуранан, Дәүләкәндән яҙалар, һорайҙар. Был аңлашыла ла. Ни өсөн тигәндә, хаҡтары ла ат башындай түгел, осһоҙ. Етмәһә, ҡупшы түшелдеректәрҙе теләгән урында тағып йөрөргә була, хатта көндәлек эш урынында ла килешле. Тик бына биҙәүес­тәр өсөн материалдарҙы тиҙ арала туплау үҙе бер мәсьәлә. Сибай магазиндарында уларҙы табырмын тимә. Йә интернет аша, йә ҙур ҡала сауҙа үҙәктәренән генә алырға була. Боронғо аҡсаларҙы ла ҡулға төшөрөү еңел түгел, өҫтәүенә ҡиммәт тә.
Сибай ҡыҙҙары һынлы сәнғәт мәк­тәбендә рәсем буйынса тәүге нигеҙҙәрҙе өйрәнә. Беренсе уҡытыусылары Илгиз Рәхимйән улы Хәйруллинды тик яҡшы яҡтан, оло ихтирам менән телгә алалар. Сибай интернат-гимназияһын тамамлағас, артабан Өфөләге сәнғәт колледжының һынлы сәнғәт бүлегенә бер ниндәй ҡаршылыҡһыҙ уҡырға инәләр.
Бала саҡтары шулай уҡ әсәйҙәренең тыуған яғында – Бөрйәндә үтә. Был ерлектең хозурлығына ғашиҡ ҡыҙҙар һәр ваҡыт пейзаж төшөрә. Һәм был эштәрен студент саҡтарында ла дауам итә. Хатта картиналарын һатып алыусылар ҙа табыла. Студент ҡыҙҙарға ошондай кәсептәре бик тә ярап ҡала. Эшләгән аҡсалары уҡыу өсөн түләүгә китә. Иң тәүҙә ҡыҙҙарҙың ғәжәйеп эштәренә Сибай институты директоры Зиннур Йәрмөхәмәтов хайран ҡала һәм уларҙы һатып ала. Әле лә уҡыу йорто стенаһын йәмләп, байытып тора был картиналар.
Ҡыҙҙарҙы бәләкәй саҡтарында атайҙары Шамил ағай әүлиә олатайы ғүмер иткән ергә алып ҡайтыр булған. Бүләсәләре олатайҙарының шәхесен шул тиклем яҡын күреп, уның тыуған төбәге Манһырҙы, ауылдың тирә-яғындағы икһеҙ-сикһеҙ киң далаларҙы яратып, үҙһенеп үҫә. Уларҙың аҙаҡтан бихисап картиналары ла ошо ерлектең тауҙарына, ялан-ҡырҙарына, йылға-шишмәләренә арнала. “Мөжәүир хәҙрәт йәшәгән йорт”, “Манһыр мәсете”, “Тыуған яҡ” исемле картиналары тыуған яҡҡа сикһеҙ һөйөү, уның матурлығын күрә, тоя белеүҙе асып бирә. Был ҡабатланмаҫ ижади эштәр ҙә Сибай институты стеналарында һәр быуынға данлыҡлы Мөжәүир хәҙрәт шәхесе тураһында, ул ғүмер иткән ерҙең гүзәллеге, күгәреп ятҡан Ирәндек тауҙары, Урғаҙа йылғаһы, ҡылғанлы дала киңлектәре тураһында тарих һөйләй.
Нескә күңелле, изге холоҡло, рухлы Зәлиә менән Әлиә Сиражетдиновалар 2003 йылдан Сибай һынлы сәнғәт мәктәбендә педагог булып эшләһә лә, камиллыҡҡа, һынлы сәнғәт донъяһындағы яңылыҡтарға, яңы һөнәрҙәр, кәсептәр үҙләштерергә ынтыла һәм үҙҙәре һабаҡ биргән мәктәпкәсә йәштәге, шулай уҡ башланғыс класс ҡыҙҙары-малайҙарына һынлы сәнғәт серҙәрен аса. Уның араһында әллә күпме конкурстарҙа ҡатнашалар. Ә еңеүҙәренең иҫәбе-һаны юҡ. Быларҙан тыш кейеҙ баҫыу, төрлө туҡымаға һүрәттәр төшөрөү кеүек һөнәрҙәргә лә һөйөү уяталар.
Нимә генә башҡармаһын, был гүзәл заттар үҙҙәрен илһамландырып торған тыуған яғына, нәҫелдәренә булған һөйөүен, тоғролоғон һәр эшендә сағылдыра.

Земфира ҒИРФАНОВА.
Сибай ҡалаһы.