Мосолмандың тормошо Исламдың биш терәген үтәү менән генә сикләнмәй, уның һәр эш-ғәмәле – ғибәҙәт. Әҙәм балаһының ихтыяждары күп: ризыҡлана, кейенә, ғаилә ҡора, балалар үҫтерә... Был ғәмәлдәрҙе атҡарыу өсөн тәү сиратта ҙур тырышлыҡ, сабырлыҡ талап ителә. Ошо ике сифат донъя эштәрендә лә, дини ғибәҙәттәрҙе башҡарғанда ла ифрат мөһим.

Пәйғәмбәребеҙ Мөхәммәт ғәләйһис-сәләм сама белергә, урталыҡты һайларға ҡушҡан. Тимәк, әҙәм балаһы донъяуи бурыстарын онотоп, бөтөн ваҡытын дини ғибәҙәттәргә арнарға тейеш түгел. Исламдың төп нигеҙе – хеҙмәт. Мосолман биш тапҡыр уҡылған намаҙҙан башҡа ваҡытын эш менән үткәрергә бурыслы. Донъялыҡты ла, ахирәтте лә ҡайғыртыу мөһим.
Арабыҙҙа, әл-хәмдү лил-ләһ, ошондай сифаттары менән һоҡландырып йәшәгән милләттәштәребеҙ бихисап. Шуларҙың береһе – Свердловск өлкәһендәге Иҫке Боғалыш ауылында йәшәгән Рәлиф Йыһангиров. Мәғлүм ки, динебеҙ беҙгә ҡаш йыйырып, хәүеф-хафаға батып, ҡараңғы сырай менән йөрөргә ҡушмай. Пәйғәмбәребеҙ Мөхәммәт ғәләйһис-сәләм дә Раббыбыҙҙан “Ҡайғынан һәм күңел төшөнкөлөгөнән һаҡлаһаңсы” тип һорап доға ҡылыр булған. Динебеҙ ҡанунына ярашлы, Рәлиф Мөхсин улы беҙҙе яҡты йөҙ менән ҡаршыланы.
Ул ошо ауылда күп балалы ғаиләлә тыуған. Атаһы “Боғалыш” хужалығында балта оҫтаһы булһа, әсәһе төҙөлөштә эшләгән.
– Яҡындарым шул ҡәҙәр тырыш, татыу ине, – ти Рәлиф Мөхсин улы. – “Атайың­дың нәсихәтен тыңла, әсәйеңдең васыятын кире ҡаҡма. Улар һинең башыңа кейҙе­релгән гүзәл таж, муйыныңа тағыл­ған нәфис биҙәктер”, – тиер ине әсәйем. Яҡындарыбыҙ беҙҙе эшһөйәр итеп тәрбиәләне, изгелекле, намыҫлы булырға, дин ҡанундарын хөрмәт итергә өйрәтте. Урта мәктәпте тамамлағас, 1988 – 1989 йылдарҙа Афғанстанда хәрби бурысымды үтәнем. Унан ауылға ҡайттым. “Тыуған нигеҙен тарҡатмаған ғаилә – иң бәхет­леһе”, – тиелгән бит хәҙистә, шул аманат­ҡа тоғромон. 1991 йылда үҙебеҙҙең өлкәләге Ғәйнә ауылы һылыуына өйләндем.
– Аллаға шөкөр, ете балаға ғүмер бирҙек, – тип әңгәмәгә ҡушылды Вәсилә ханым. – Һәр йән эйәһе был донъяға яратыу һәм яратылыу өсөн тыуа. Атай-әсәйҙең балаларына мөхәббәте, уларҙы ҡәҙерләүе, хәстәрләүе – оло ҡөҙрәт. Был тойғо әҙәм балаһын ауырлыҡтарҙан һаҡлай, үҫешкә йүнәлтә. Шуға ла яратылып үҫкән бала тормошта уңыш ҡаҙана, бәхеткә өлгәшә.
Кейәүгә сыҡҡас, мин Исламды ҡабул иттем. Өйҙә тик башҡортса һөйләшәбеҙ. Хеҙмәт һөйөп, һөнәр белеп үҫкән балаларыбыҙ, Аллаға шөкөр, йөҙөбөҙгә ҡыҙыллыҡ килтермәй.
Хаҡ юлдағы мосолман булараҡ, Рәлиф шәхси эшен дә асҡан: 14 йыл инде аяк кейемдәрен йүнәтеү менән шөғөлләнә.
– Һөнәремде бик яратам, – ти ул. – Ерҙән ҡарыш буйы күтәрелгәндән алып хеҙмәттәмен – беҙгә шулай яҙған. “Донъялыҡ өсөн – мәңге йәшәйәсәк, ә ахирәт өсөн иртәгә үләсәк кеше кеүек тырыш”, – тигән бит Мөхәммәт ғәләйһис-сәләм.

Свердловск өлкәһе.