Эш сәфәре барышында Башҡортостан Башлығы вазифаһын ваҡытлыса башҡарыусы Радий Хәбиров “Мечел” төркөмөнә ингән Белорет металлургия комбинатында өр-яңы канат производствоһын сафҡа индереү тантанаһында ҡатнашты.


Комбинат етәксеһе әйтеүенсә, әле Рәсәйҙә диаметры 70 миллиметрҙан артҡан күп өлтөклө һәм ун ике өлтөклө арҡандар сығарылмай. Завод белгестәре ғилми-тикшеренеү институттары менән берлектә эшләгән полимерҙың составы ла үҙенсәлекле. Ошондай арҡандар тау-мәғдән һәм нефть сығарыу тармаҡтарында, күпер, суднолар төҙөлөшөндә сит ил тауарҙарын алмаштырасаҡ.


Белорет металлургия комбинатында был арҡан етештереү проекты 2015 йылдан тормошҡа ашырыла. Уның хаҡы – 510 миллион һумдан ашыу. 2016 йылда комбинат Рәсәй сәнәғәтен үҫтереү фондынан 255 миллион һумлыҡ айырым маҡсатлы ташламалы заем алған. Хаҡтың ҡалған яртыһы – предприятиеның үҙ аҡсаһы. Былтыр яңы канат производствоһы республикалағы өҫтөнлөклө инвестиция проекттары иҫәбенә инде.



Рәсәйҙең сәнәғәт һәм сауҙа министры Денис Мантуров яңы производствоның әһәмиәтен билдәләне. Министрлыҡтың Металлургия һәм материалдар департаменты директоры Павел Серватинский уның ҡотлау һүҙҙәрен уҡып ишеттерҙе.