Илеш районынан тәжрибәле баҡсасы, сәскә үҫтереү оҫтаһы Сулпан Ғайсинаның ябай ғына, әммә һөҙөмтәле кәңәштәренә ҡолаҡ һалығыҙ әле. 

Илеш баҡсасыһы Сулпан Ғайсина гортензия үҫтереү серҙәре менән уртаҡлашты.

- Гортензияларға ике аҙна һайын лимон кислотаһы ҡушылған төнәтмә һибәм. 10 литр һыуға бер аш ҡалағы лимон кислотаһы ҡушып, һәйбәт итеп болғарға. Ошоно һипкәндән һуң, шул көндә калий монофосфаты индерәм. Ул да шул уҡ нисбәттә – 10 литр һыуға бер аш ҡалағы итеп алына. Ни өсөн ошолай эшләргә кәрәк? Сөнки гортензияға тәүҙә әскелт төнәтмә һипмәһәң, ул башҡа файҙалы ашламаларҙы ҡабул ит алмай. Ҡул аҫтында лимон кислотаһы булмаһа, был маҡсатта аш һеркәһе ҡулланырға мөмкин, ул 10 литр һыуға ике аш ҡалағы нисбәтендә алына.

Ултыртҡан мәлдә тупраҡҡа ылыҫ онтағы, ҡом, тиреҫ, торф һалам. Үҫентегә нисә йәш – шунса ботаҡ ҡалдырыу дөрөҫ була, мәҫәлән, бер йыллыҡ гортензияла – бер, ике йәшлегендә – ике ботаҡ. Биш йылдан ул етерлек көс туплап, ҡыуаҡ кеүек матур төҫ ала һәм эре, сағыу сәскәләре менән ҡыуандыра башлай, - тине Сулпан.

БЕЛЕП ҠУЙЫҒЫҘ!

Сулпандан тағы бер мөһим кәңәш: ниндәй генә ашлама, төнәтмә булмаһын, уны ҡоро үҫентегә һибергә ярамай. Мотлаҡ алдан һыу һибергә, шунан һуң ғына ашлама индерергә кәрәк. “Ҡурҡмағыҙ, төрлөсә һынап ҡарағыҙ. Сәскә үҫтереү “сир” кеүек, был шөғөлгә бер тотонһаң,  унан айырылыу мөмкин түгел”, – ти баҡсасы.