Сәскәләр батшабикәһе розаларҙың матурлығына һоҡланмаған кеше юҡтыр, әммә уларҙың ғүмере ҡыҫҡараҡ шул. Баҡтиһәң, уны картуф ярҙамында тамырландырып була икән.

Бының өсөн розаның сәләмәт һабаҡтарын һайлайбыҙ һәм 15 сантиметр тирәһе оҙонлоҡта киҫәбеҙ. Уларҙың һәр береһендә 2-3 бөрө булырға тейеш. Һабаҡтарҙың аҫҡы өлөшөн үткер бысаҡ менән бөрөнөң аҫтынан ғына 45 градуслыҡ мөйөш итеп, өҫкө бөрөнән 1,5-2 сантиметр өҫтәрәк иһә туры итеп киҫәбеҙ. Шунан һабаҡтарҙы бер нисә сәғәткә “Корневин”ға ултыртып торорға мөмкин. ‎

Артабан картуфта 2-3 сантимер тәрәнлектә соҡор яһап, һабаҡты шунда урынлаштырабыҙ. Шунан картуфты тупраҡҡа ултыртабыҙ, күмәбеҙ һәм һыу һибәбеҙ. Парник эффекты булһын өсөн һабаҡты банка йә булмаһа пластик һауыт менән ҡаплайбыҙ. Тик уны даими рәүештә 10-20 минутҡа алып, елләтеп торорға кәрәк. Шуны ла әйтергә кәрәк – һәр һабаҡты айырым картуфҡа ултыртабыҙ. ‎

Артабан инде дөрөҫ итеп тәрбиәләү мөһим. Тупраҡ һәр ваҡыт бер аҙ дымлы, ә температура 20-23 градус булырға тейеш. Һыу һипкәндә шәкәр ҡомо өҫтәргә мөмкин – бер стаканға 1-2 сәй ҡалағы етә. Көн һайын асып, 10-15 минутҡа елләтеп алыу кәрәк. ‎

Ике аҙнанан һуң елләтеү ваҡытын аҙ-аҙлап арттырып, шунан инде бөтөнләй асырға була. Ғәҙәттә, һабаҡтар 3-5 аҙна эсендә тамыр ебәрә. Шуны ла иҫегеҙҙә тотоғоҙ – һабаҡты артыҡ тәрәнгә ултыртмағыҙ, “күҙле” картуф файҙаланмағыҙ һәм үҫенте артыҡ ҡояшлы урында тормаһын.