Башҡортостандың халыҡ артисы, музыкант-мультиинструменталист, Zainetdin этно-шоуы проекты солисы Заһир Зәйнетдинов «Башҡортостан» мотоуҡсылар полкы яугирҙәре алдында сығыш яһаны.

Ул махсус хәрби операцияла ҡатнашыусыларҙы Ватанды һаҡлаусылар көнө менән ҡотларға килгәйне.

Полкта һалдаттар һәм офицерҙар алдында башҡорт эстрадаһы артисы Альбина Килдейәрова ла сығыш яһаны.

Заһир Зәйнетдинов һәм Альбина Килдейәрова хәрби-сәйәси эштәр идаралығы пункты сәхнәһендә Даян Мурзин исемендәге мотоуҡсылар батальоны яугирҙәре өсөн күптәргә яҡшы таныш композицияларҙы башҡарҙы.

Әхмәт Дәүләтов исемендәге медицина ротаһы хәрби хеҙмәткәрҙәре дауалаған яралылар өсөн концерт ошо подразделение ваҡытлыса урынлашҡан урында яңғыраны.

Хәрби хеҙмәткәрҙәр ҙә концерт номерҙары менән яуап бирҙе. Ижадташ дуҫтары һәм хәрби иптәштәре алдында Ҡариҙел районы егете, күп һанлы республика һәм төбәк-ара конкурстар лауреаты, 2023 йылдың көҙөндә Оборона министрлығы менән контракт төҙөгән «Йырсы» позывнойлы яугир сығыш яһаны.

Уның менән бергә Х. Әхмәтов исемендәге Башҡорт дәүләт филармонияһының һөйләү жанры артисы Эльмира Юлдашева ла ижады менән ҡыуандырҙы. 

Популяр артист менән бергә яугирҙәргә «Ете ҡыҙ» йәмәғәт ойошмаһы ирекмәндәре лә килгәйне. Волонтерҙар яҡташтарына республика райондарында һәм Силәбе өлкәһендә йыйылған гуманитар ярҙам, күстәнәстәр һәм посылкалар килтерҙе. 

https://www.bashinform.ru/news/svo/2026-02-24/v-zone-svo-artist-zaynetdin-dal-kontsert-voennosluzhaschim-iz-bashkirii-4590817