Республикала «Ер ҡото» этномәҙәни һәм илһөйәрлек фестивале үтте

Мишкә районында «Ер ҡото» төбәк-ара этномәҙәни, илһөйәрлек фестивале үтте. «Ватанды һаҡлаусылар» дәүләт фонды филиалынан хәбәр итеүҙәренсә, фестиваль яугирҙәргә эшҡыуарлыҡ буйынса белем биреү проекттарын үҙ эсенә алған бай программа тәҡдим итте.

Фестиваль барышында «Ер ҡото – һаулыҡ өсөн» түңәрәк өҫтәле, шулай уҡ махсус хәрби операцияла ҡатнашыусылар һәм уларҙың ғаиләләре өсөн асыҡ брифинг уҙҙы.

Фестивалгә «Ватанды һаҡлаусылар» фондының медицина һәм юридик десанттары килде. Мишкә үҙәк район дауаханаһының күсмә ФАП-ы һәм республика стоматология поликлиникаһының стоматология модуле ойошторолдо, 3-сө балалар стоматология поликлиникаһы эшләне.

«Ватанды һаҡлаусылар» фонды филиалы етәксеһе Гөлнур Ҡолһарина фестивалдә халыҡ дауалаусыларының МХО-ла ҡатнашыусыларға һәм ветерандарға бушлай хеҙмәттәр күрһәтеүе хаҡында һөйләне.

«Иғтибар, ярҙам һәм хәстәрлек – беҙҙең төп бурыстарыбыҙ. Фестивалде ойоштороусылар, ҡатнашыусылар һәм ҡунаҡтар онотолмаҫ хис-тойғолар һәм киләһе фестивалгә етерлек көс-ҡеүәт алды», – тип билдәләне Гөлнур Ҡолһарина.

Республика халҡы дүртенсе йыл инде «Ер ҡото» фестиваленә йыйыла. Йыл һайын ул халыҡтың берҙәмлеген һәм кешеләрҙең МХО геройҙарына, уларҙың ғаиләләренә ярҙам итергә әҙер булыуын күрһәтә.

https://www.bashinform.ru/news/svo/2025-06-30/v-bashkirii-proshel-etnokulturnyy-patrioticheskiy-festival-sila-zemli-4295710