Радий Хәбиров республика парламентарийҙарына МХО-ға ярҙамы өсөн рәхмәт белдерҙе

24 июндә Башҡортостан Башлығы Радий Хәбиров етенсе саҡырылыш Дәүләт Йыйылышы – Ҡоролтайҙың 24-се ултырышында ҡатнашты. Республика парламенты яҙғы сессияһын тамамланы.

Сара башланыр алдынан республика етәксеһе Дәүләт Йыйылышы фойеһында махсус хәрби операцияла ҡатнашыусыларҙың портреттары төшөрөлгән «Үҙебеҙҙекеләр һәм Геройҙар» тигән күргәҙмә менән танышты. Экспозицияла 24 хәрби хеҙмәткәр, шул иҫәптән 15 Рәсәй Геройы һәм өс Батырлыҡ ордены кавалерының картинаһы бар. Һигеҙ портретта Башҡортостан яугирҙәре һүрәтләнгән. Рәссамдар – Вера Фролова һәм Марат Мөхәмәтйәнов.

Башҡортостан Башлығы парламентарийҙарға махсус хәрби операцияға ярҙамы өсөн рәхмәт әйтте һәм уларға Башҡортостандың дәүләт наградаларын тапшырҙы.

– Республика һәм муниципаль кимәлдәге депутаттар, барлыҡ сәйәси фракция ағзалары МХО-ла ҡатнашыусыларға һәм уларҙың ғаилә ағзаларына ярҙам итеү буйынса мөһим миссия башҡара. Был күп яҡлы эш. Еңел булмаған хеҙмәтегеҙ өсөн ҙур рәхмәт. Һеҙ гуманитар ярҙам туплауҙа ҡатнашаһығыҙ, күп кенә коллегаларығыҙ Ватанды һаҡлау өсөн алғы һыҙыҡҡа юллана, – тип билдәләне Радий Хәбиров. – Төбәктә махсус хәрби операцияла ҡатнашыусыларға, уларҙың туғандарына һәм яҡындарына 54 ярҙам сараһы бойомға ашырыла. Ярҙам күрһәтеүҙе артабан да дауам итәбеҙ.

Республика етәксеһе Милли музей менән бергә әҙерләнгән «Символдың тыуыуы» күргәҙмәһен дә ҡараны. Экспозиция скульптор Сосланбәк Тавасиевтың милли геройыбыҙ Салауат Юлаев һәйкәле тарихына арналған.

https://www.bashinform.ru/news/svo/2025-06-24/radiy-habirov-poblagodaril-parlamentariev-bashkirii-za-podderzhku-svo-4288385