Башҡортостан МХО-ла ҡатнашыусылар өсөн кадрҙар проекттарына ғаризалар һаны буйынса беренсе урында

Башҡортостан МХО-ла ҡатнашыусылар өсөн кадрҙар проекттарына ғаризалар һаны буйынса Рәсәйҙә беренсе урынға сыҡты — «Башҡортостан Геройҙары» проектына 2026 ғариза килде. Өс лидер иҫәбендә Краснодар крайы һәм Нижегород өлкәһе лә бар.

Рәсәйҙең күпселек төбәктәрендә «Геройҙар ваҡыты» федераль программаһының төбәк аналогтарында ҡатнашыуға ғаризалар ҡабул итеү тамамланды. Тотош илдән 46 меңдән ашыу махсус хәрби операция яугире ошо проекттарҙа ҡатнашырға теләк белдерҙе. Ҡайһы бер төбәктәрҙә бер урынға конкурс 25 кешенән ашып китә.

Бындай ҡыҙыҡһыныу геройҙарыбыҙҙың үҙ иленә, хәҙер инде тыныс тормошта, лидерҙар һәм идарасылар булып хеҙмәт итергә әҙер икәнен күрһәтә.

«Башҡортостан геройҙары» – «Геройҙар ваҡыты» программаһының төбәк аналогы, МХО-ла ҡатнашыусылар араһынан яңы быуын етәкселәрен әҙерләүгә йүнәлтелгән. Проект республика Башлығы Радий Хәбиров тәҡдиме менән ғәмәлгә ашырыла.

«Рәсәй Президенты ҡушыуы буйынса «Геройҙар ваҡыты» федераль проектын киңәйтәбеҙ. МХО-ла ҡатнашыусылар араһынан дәүләт һәм муниципаль власть органдарында, предприятиеларҙа һәм ойошмаларҙа эшләү өсөн квалификациялы идарасылар әҙерләйбеҙ», – тип белдергәйне Радий Хәбиров.

Хәтерегеҙгә төшөрәбеҙ, республикала МХО-ла ҡатнашыусылар өсөн «Башҡортостан геройҙары» кадрҙар программаһы буйынса һайлап алыуҙың икенсе этабы башланды.

https://www.bashinform.ru/news/svo/2025-04-22/bashkiriya-lidiruet-po-chislu-zayavok-na-kadrovye-proekty-dlya-uchastnikov-svo-4207736