Башҡортостандың МХО-ла ҡатнашҡан дин әһелдәре тураһында фильм киң прокатҡа сыҡты

Бөгөн Рәсәйҙә МХО яугирҙәренең рухи остаздары Хәмзә хәҙрәт һәм отец Виктор тураһында «Һинең юлдарың» документаль кинопроекты күрһәтелә башлай. Фильмдың беренсе ике серияһын «ВКонтакте» социаль селтәрендә «Ватанды һаҡлаусылар» дәүләт фонды төркөмөндә ҡарарға мөмкин.

Дин әһелдәре МХО яугирҙәренә нисек ярҙам итеүҙәре хаҡында һөйләй, ғаиләләре менән таныштыра. Фильмда улар махсус операция ветерандары менәндә  осраша. Яҡташтарыбыҙҙы актер Илья Глинников оҙатып йөрөй.

 «Өфөлә ике дуҫ, ике дин әһеле — отец Виктор һәм Хәмзә хәҙрәт бар. Улар төрлөсә доға ҡыла. Әммә был уларға машинаға ултырып, алғы һыҙыҡҡа яугирҙәребеҙгә ярҙам итергә юлланырға ҡамасауламай. Мин хәрбиҙәр янына бына ошо юлға сығырға һәм үҙемде күптән борсоған һорауҙарға яуап табыу өсөн килдем», — ти Илья Глинников фильмдың трейлерында.

Юлда улар төрлө ҡалаларҙа туҡтай, төрлө дини ойошма вәкилдәре менән осраша, үҙ фекерҙәре һәм булған хәлдәр менән уртаҡлаша.

Хәтерегеҙгә төшөрәбеҙ, «Һинең юлдарың» фильмын тәүгеләрҙән булып Мәскәү халҡы һәм баш ҡала ҡунаҡтары ҡараны. Фильм февраль айында Мәскәүҙә «Рәсәй» милли үҙәгендә күрһәтелде.

«Был ысын илһөйәрлек, диндарҙарҙың дуҫлығы һәм батырлығы тураһында уйлап сығарылмаған тарих. Алғы һыҙыҡта һәм тылда, көн һайын улар рухи ҡаһарманлыҡ күрһәтә, еңеүҙе яҡынайтырға ярҙам итә», — тип яҙа Башҡортостан Башлығы Радий Хәбиров социаль селтәрҙәге сәхифәһендә.

 12+