Башҡортостандан шәфҡәт туташы МХО-ға юлланды

Махсус хәрби операцияла табиптарға ғәйәт ҙур яуаплылыҡ өҫтәлә. Шулай ти Борай районынан «Афина» позывнойлы шәфҡәт туташы. Әлеге ваҡытта яҡташыбыҙ фронт госпиталендә хеҙмәт итә. Ул хәрби хәрәкәт зонаһында рух көсөнөң оло әһәмиәткә эйә булыуын билдәләне.

Ҡыйыу ҡыҙ һәм яугирҙәр хаҡында видеояҙма «Махсус операция геройҙары Z» телеграм-каналына һалынған.

«Афина» МХО-ға тиклем Өфөнөң Ҡыуатов исемендәге республика клиник дауаханаһында операция шәфҡәт туташы булып эшләй. Ул медицина колледжын тамамлағас та хәрби ойошмала эшләргә теләй, әммә ҡыҙҙы ата-әсәһе был уйынан кире күндерә. Әммә «Афина» маҡсатына тоғро ҡала һәм МХО биләмәһендә хеҙмәт итеү юлын һайлай.

«Бында дисциплина бар, һин нимә эшләргә кәрәклеген беләһең. Хеҙмәт лайыҡлы баһалана. Тыныс тормошта һин «ирекле кеше». Сирләп, эшкә яраҡһыҙлыҡ ҡағыҙын алырға мөмкин. Ә бында яуаплылыҡ ифрат ҙур. Беҙ ир-егеттәребеҙгә ярҙам итергә тейешбеҙ», — ти «Афина».

Борай районы хакимиәте башлығы Рушан Гәрәев социаль селтәрҙәге сәхифәһендә яҙыуынса, «Афина» ҡустыһы һәм әсәһе өсөн терәк булып тора. «Фиҙакәрлек һәм профессионаллек өсөн» миҙалы менән бүләкләнгән.

https://www.bashinform.ru/news/svo/2025-04-01/medsestra-iz-bashkirii-otpravilas-na-svo-spasat-boytsov-4179352