Ниндәй ташламалар ҡаралған?

“Беҙ Себерҙә оҙаҡ эшләп, пенсияға сыҡҡандан һуң тыуған яҡҡа әйләнеп ҡайттыҡ. Әле фатирҙа өс кеше йәшәйбеҙ. Ирем — хеҙмәт ветераны, улым — II группа инвалиды. Улар өсөн ниндәй льготалар ҡаралған?
З. УСМАНОВА.
Ишембай ҡалаһы”.

Хөрмәтле Зөлхизә ханым! Иптәшегеҙгә бөтә тейешле документтарығыҙҙы йыйып, теркәлгән урынығыҙҙағы халыҡты социаль яҡлау органына йәки күп функциялы үҙәккә мөрәжәғәт итергә кәрәк. Хеҙмәт ветерандарына айлыҡ аҡсалата түләү, торлаҡҡа һәм коммуналь хеҙмәттәргә сығымдарҙы компенсациялау өсөн айлыҡ түләүҙәр ҡаралған. Һеҙ хатығыҙҙа балағыҙҙың йәше, медик-социаль экспертизаны ҡасан үтеүе, быға тиклем ниндәй льготаларҙан файҙаланыуы хаҡында яҙмағанһығыҙ. Айлыҡ аҡсалата түләүҙе асыҡлау өсөн урындағы Пенсия фонды бүлексәһенә, ә торлаҡҡа һәм коммуналь хеҙмәттәргә сығымдарҙы компенсациялау маҡсатында айлыҡ түләүҙәрҙе тәғәйенләү өсөн урындағы халыҡты социаль яҡлау органына мөрәжәғәт итергә кәрәк. Ниндәй документтар йыйырға кәрәклеген урында яҡшылап аңлатырҙар.


Бурысты түләргә кәрәк

“Эш хаҡын быйыл кинәт кәметтеләр, шуға күрә торлаҡ-коммуналь түләүҙәрҙе өс айға кисектерергә тура килде. Миңә субсидияны нисек юллап алырға икән?

К. КИНЙӘКӘЕВ.
Белорет районы”.

Һеҙ субсидия юллай алаһығыҙ. Әммә тәүҙә бурысығыҙҙы тулыһынса түләргә тура киләсәк йәки уны ҡаплау буйынса килешеү төҙөргә тейешһегеҙ.


Икегеҙҙең дә хоҡуғы бар

“Беҙ ҡатыным менән уртаҡ милектә булған фатирҙа йәшәйбеҙ һәм икебеҙ ҙә ошонда теркәлгәнбеҙ. Торлаҡ-коммуналь хеҙмәттәр өсөн түләү тураһындағы квитанция ҡатыным исеменә килә. Ә субсидияны кемдең исеменә рәсмиләштереү дөрөҫ булыр?
А. ҒИЛМЕТДИНОВ.
Стәрлетамаҡ ҡалаһы”.

Икегеҙ ҙә фатир хужаһы булғанлыҡтан һәм бер үк урында теркәлгәнлектән, һеҙҙең һәр берегеҙҙең субсидияны юллап алырға хоҡуғы бар.

Роза КУЗЬМЕНКО,
Башҡортостан Ғаилә, хеҙмәт һәм халыҡты социаль яҡлау министрлығының матбуғат хеҙмәте белгесе.


Эш таба алмаһаң, иҫәпкә тор

“Халыҡ мәшғүллеге үҙәгендә иҫәпкә тороу өсөн ниндәй документтар талап ителә?

Т. ӘМИРЙӘНОВА.

Шаран районы”.

Рәсәй Хөкүмәтенең эш эҙләүселәрҙе һәм эшһеҙҙәрҙе теркәү тәртибе раҫланған ҡарарына ярашлы, теркәү иҫәбенә граждандарҙың ике төрлө категорияһын ҡуйыу ҡаралған. Беренсеһе – үҙҙәренә яраҡлы эш эҙләү маҡсаты менән йөрөгән граждандар, икенсеһе – эшһеҙҙәр.

Үҙҙәренә яраҡлы эш эҙләүселәрҙе теркәү уларҙың ҡайҙа йәшәүенә бәйле түгел. Түбәндәге документтарҙы тупларға кәрәк: паспорт, инвалидтар категорияһына ингән граждандар өсөн – шәхси реабилитация йәки абилитация программаһы.

Эшһеҙҙәр сифатында теркәлеү өсөн даими йәшәгән урындағы Халыҡ мәшғүллеге үҙәгенә мөрәжәғәт итеп, түбәндәге документтарҙы илтергә кәрәк: паспорт, хеҙмәт кенәгәһе, һөнәри квалификацияны раҫлаған документ, аҙаҡҡы эш урынындағы һуңғы өс айҙа алған эш хаҡы тураһында белешмә. Инвалидтар категорияһына ҡараған граждандар өсөн шәхси реабилитация йәки абилитация программаһы талап ителә.