Республикала 2012 — 2015 йылдарға иҫәпләнгән “Лайыҡлы хеҙмәт” программаһы тормошҡа ашырыласаҡ. Был документтың проекты әҙер, ул Халыҡ-ара хеҙмәт ойошмаһының “Лайыҡлы хеҙмәт” концепцияһына ярашлы эшләнгән.
Ошо хаҡта Башҡортостан Хөкүмәтенең Премьер-министры урынбаҫары Фидус Ямалетдинов “Интерфакс” агентлығында журналистар менән осрашыуҙа еткерҙе.
Фидус Әғләм улы әйтеүенсә, программа проекты концепцияһында хеҙмәткә ҡағылышлы дүрт төп принцип сағылыш тапҡан. Тәүгеһе халыҡ-ара хеҙмәт нормаларын күҙәтеү булһа, икенсеһе — лайыҡлы эш менән тәьмин итеү. Артабан хеҙмәтсәндәрҙең барыһын да социаль яҡлау, өс яҡлы хеҙмәттәшлек һәм социаль диалог мәсьәләләре урын алған.
Хеҙмәтте һаҡлау буйынса халыҡ-ара нормаларҙың күбеһе 1919 йылдан — Халыҡ-ара хеҙмәт ойошмаһы булдырылғандан алып эшләнгән. Әйткәндәй, хеҙмәтте хәүефһеҙ, һәр кемдең һөнәренә, теләгенә ярашлы эшле һәм тейешле күләмдә түләнгән осраҡта ғына лайыҡлы тип атап була.
Концепцияла сағылыш тапҡан сараларҙың барыһы ла республикала тормошҡа ашырылып килә, әлбиттә. Мәҫәлән, һуңғы йылдарҙа эш урындарын аттестациялауға айырыуса ҙур әһәмиәт бирелә. Һөҙөмтәлә эш урынында имгәнеүҙәрҙең кәмеүе буйынса тәүге биш төбәк иҫәбендәбеҙ. Хеҙмәткәрҙәрҙе социаль яҡлау буйынса ла матур башланғыстар бар. Мәҫәлән, ауыл хужалығына эшкә ҡайтҡан белгестәргә ай һайын ете меңгә тиклем аҡса түләнелә һәм 100 мең һум күләмендә матди дәртләндереү ҙә ҡаралған. “Ауыл табибы” программаһында ҡатнашыусы йәш белгестәргә лә 100 мең һум аҡса биреләсәк.
Шулай уҡ социаль-хеҙмәт мөнәсәбәттәрен көйләү буйынса ла тәжрибәгә эйәбеҙ. Мәҫәлән, өс яҡлы килешеү хеҙмәт баҙарындағы хәлде тотороҡландырыуға өлөш индерә.
Ләкин халыҡтың мәшғүллеген тәьмин итеү буйынса арымай-талмай эшләргә кәрәк әле. Мәҫәлән, йәштәрҙең эшһеҙ булараҡ иҫәптә тороуы мәсьәләнең айырыуса көнүҙәк булыуын раҫлай. Республика Президентының сит илдәрҙең абруйлы компаниялары менән килешеүҙәр төҙөүе, инвесторҙар йәлеп итеүе был тәңгәлдә өмөт уята, әлбиттә. “Әммә эшҡыуарҙар ҙа ситтә ҡалырға тейеш түгел, етәкселәр социаль яуаплылығын арттырырға тейеш”, — тип иҫәпләй Фидус Ямалетдинов. Ойошмаларҙа профсоюз комитеттары булдырыу ҙа мөһим. Эш биреүселәр хеҙмәткәрҙәренең белемен камиллаштырыуҙа, социаль мәсьәләләрҙе хәл итеүҙә әүҙемлекте күтәрергә бурыслы.
Ғөмүмән, “Лайыҡлы хеҙмәт” программаһы проектының концепцияһында нигеҙҙә электән яҡшы таныш мәсьәләләр сағылыш тапҡан. Әммә һәр кемдең хәүефһеҙ, тейешенсә баһаланған, күңеле ятҡан хеҙмәткә хоҡуғының һаҡланыуы барлыҡ сараларҙың эҙмә-эҙлекле атҡарылыуына һәм социаль яуаплылыҡҡа етди ҡарашҡа бәйле.