Билдәле булыуынса, Башҡортостандан Рәсәйҙең Дәүләт Думаһына 16 депутат үтте. Уларҙың 12-һе — “Берҙәм Рәсәй”ҙән, икәүһе — Коммунистар партияһынан, ә Либераль-демократик партия менән “Ғәҙел Рәсәй”ҙән — берәр кеше. Кисә Республика йортонда улар менән Башҡортостан Президенты Рөстәм Хәмитов осрашты.
Рөстәм Зәки улы депутаттарҙы һайлауҙағы еңеүе менән ҡотланы һәм республиканан тәҡдим ителгән корпустың бик эшлекле һәм абруйлы кешеләрҙән тороуын билдәләне.
— Быйыл Башҡортостандан Дәүләт Думаһына дүрт партия вәкиле үтте. Республика өсөн был яңы хәл, элек ике партия ғына була торғайны. Һөҙөмтәне демократияның сағылышы, алға ҡарай хәрәкәт тип ҡабул итәбеҙ, — тине ул. — Күп тапҡыр ҡабатлағаным бар: мин власть монополияһына ҡаршы, һәр ваҡыт диалог булырға тейеш. Килешеп эшләребеҙгә ышанам.
Президент әйтеүенсә, уларҙың алдында республикала йәшәүсе 4 миллион кешенең, шул иҫәптән 3 миллион һайлаусының, ышанысын аҡлау бурысы тора.
— Республикаға файҙа килтерергә тейешһегеҙ. Үҙегеҙ күреп тораһығыҙ: илдә лә, донъяла ла хәлдәр ябайҙан түгел. Ҡайһы бер белгестәр әйтеүенсә, тағы ла иҡтисади көрсөк килеүе ихтимал. Шуға күрә берләшергә, республикаға инвестициялар йәлеп итеү йәһәтенән эшләргә кәрәк, — тине Рөстәм Хәмитов.
Башҡортостан Президенты яңы һайланған депутаттар алдына тағы бер мөһим бурыс ҡуйҙы: федераль министрлыҡтар һәм ведомстволар, ғөмүмән, үҙәк власть менән хеҙмәттәшлекте әүҙемләштереү. Һүҙ республикабыҙҙың федераль инвестиция программаларында ҡатнашыуы тураһында бара. Күп төбәктәр үҙ проблемаларын ошо программалар аша хәл итә, күршеләр айырыуса әүҙемлек күрһәтә. Шуға күрә Рөстәм Зәки улы депутаттарға ошо йәһәттән нығыраҡ тырышып эшләргә ҡушты.
— Ҡануниәт өлкәһендәге эштән тыш, республикаға аҡса, инвесторҙар, кадрҙар йәлеп итеү кәрәк. Һеҙҙең менән артабан да осрашырға, эшләргә әҙермен. Тәҡдимдәрегеҙҙе, һорауҙарығыҙҙы ебәрегеҙ, — тине осрашыу һуңында Рөстәм Хәмитов.
Депутаттар исеменән Дәүләт Думаһына икенсе тапҡыр һайланған Сәлиә Мырҙабаева сығыш яһаны.
— Беҙҙән үткән кешеләр араһында ҙур тәжрибәле сәйәсмәндәр — Хөкүмәт Премьер-министрының ике урынбаҫары, баш ҡала башлығы — бар. Улар яҡшы урынға дәғүә итә һәм республика мәнфәғәтендә ҙур эштәр башҡарырға һәләтле, — тине ул.
Үткән саҡырылыш менән сағыштырғанда, быйыл Дәүләт Думаһында Башҡортостандан үткән ҡатын-ҡыҙ сафы ла ишәйҙе. Сәлиә Мырҙабаева менән бергә Зөһрә Рәхмәтуллина һәм Рима Баталова эшләйәсәк.
Быға тиклем республика Хөкүмәте Премьер-министры урынбаҫары булып эшләгән Зөһрә Йыһанур ҡыҙы хәбәрселәргә үҙенең тәьҫораттарын еткерҙе.
— Республикама, һайлаусыларға ышанысы өсөн ҙур рәхмәт әйткем килә. Ҡайҙа ғына китһәм дә, бөтә яҙмышым бәйле булған республикам һәм уның халҡы ҡәҙерле. Мин быны онотмайым, иңемдә оло яуаплылыҡ тоям. Улар беҙгә өмөт бағлай, шуға күрә эшләргә лә эшләргә, — тине ул.