Башҡортостан Президенты Рөстәм Хәмитов кисә Салауат ҡалаһындағы ҡайһы бер етештереү һәм социаль объекттарҙа булды, шулай уҡ ҡала Советы депутаттары, йәмәғәт ойошмалары вәкилдәре, предприятиелар, бюджет учреждениелары етәкселәре менән осрашыу үткәрҙе.

“Салауатбыяла” йәмғиәте предприятиеһында төбәк башлығы яңы быяла етештереү линияһын ҡарап сыҡты. Был төр быяла механик яҡтан ныҡлы, ультрафиолет нурҙарҙан һаҡлай. Уны етештергәндә уға 11 ҡатлам һалына.
“Газпром нефтехим Салауат” заводында Башҡортостан Президенты нефтте һауа ярҙамында вакуумлы ҡыуыу ҡорамалының эше менән танышты. Ул йылына 6 миллион тонна продукция сығарыу ҡеүәтенә эйә, бензин, кәрәсин, дизель фракциялары, гудрон, шулай уҡ углеводородлы шыйыҡ сеймал алыу маҡсатында нефть эшкәртеү өсөн тәғәйенләнә. 2015 йылда йәмғиәт акрил кислотаһы һәм бутилакрилат етештерә башларға ниәтләй.
Рөстәм Хәмитов ҡорамалды монтажлау, көйләү эштәре менән ҡыҙыҡһынды. Предприятиеның башҡарма директоры Айрат Кәримов әйтеүенсә, проектлағанда, сафҡа индергәндә әллә ни ҙур етешһеҙлектәр булмаған.
Салауатта Башҡортостан Президенты бәләкәй һәм урта эшҡыуарлыҡтың үҫеше менән дә ҡыҙыҡһынды. “Автомаркет” үҙәгендә уны Эшҡыуарлыҡты үҫтереүгә булышлыҡ итеү үҙәген ойоштороу проекты менән таныштырҙылар. Документтың маҡсаты — ҡалала яңы бәләкәй предприятиелар асыуға, эш башлауҙа булышлыҡ итеү.
Артабан Рөстәм Хәмитов 18-се балалар баҡсаһында булды. Бында капиталь реконструкциянан һуң яңы корпус асылған. Артабан төбәк башлығы яңыртылған “Алмас” физкультура-һауыҡтырыу комплексына юлланды.
— Бер йыл элек был урында емереклектәр генә ине, — тине Рөстәм Хәмитов бассейн асыу тантанаһында. Бассейн Башҡортостан Президенты башланғысы менән төҙөкләндерелде. Был эшкә республика ҡаҙнаһынан 93,6 миллион һум аҡса йүнәлтелде. Ҡоролма ярты йыл эсендә төҙөлдө.
Ошо сараларҙан һуң республика етәксеһе ҡала Советы депутаттары, йәмәғәт ойошмалары вәкилдәре, предприятиелар һәм бюджет учреждениелары етәкселәре менән осрашыу үткәрҙе.