Башҡортостан Республикаһы Хөкүмәте Аппаратында граждандарҙың мөрәжәғәттәренә бәйле эш “Рәсәй Федерацияһы граждандарының мөрәжәғәттәрен ҡарау тәртибе тураһында”ғы Федераль законға, “Башҡортостан Республикаһында граждандарҙың мөрәжәғәттәре тураһында”ғы Башҡортостан Республикаһы Законына ярашлы тормошҡа ашырыла һәм Башҡортостан Хөкүмәтенең даими контролендә тотола. Яҙма мөрәжәғәттәрҙең барыһы ла Башҡортостан Президенты, Башҡортостан Республикаһы Хөкүмәте Премьер-министры урынбаҫарҙары, республика Хөкүмәте Аппараты етәксеһе тарафынан ҡарала һәм тейешле республика башҡарма власть органдары, ойошмалар етәкселәренә башҡарыуға ебәрелә.

Былтыр Башҡортостан Хөкүмәтенә 9 927 яҙма, шул иҫәптән 383 коллектив мөрәжәғәт килгән, 2 395 хат ҡайтанан ебәрелгән, 33 мөрәжәғәттә ебәреүсенең фамилияһы һәм почта адресы күрһәтелмәгән.
Әйтергә кәрәк, бөтә корреспонденцияның 50 проценттан ашыуы республика Хөкүмәтенә юғары органдарҙан килә. Былтыр Рәсәй Президенты Хакимиәтенән 3 176, Рәсәй Хөкүмәте Аппаратынан — 1 343, Рәсәй Федерацияһы Федераль Йыйылышының Дәүләт Думаһынан — 25, Башҡортостан Президенты Хакимиәтенән — 1 066, Башҡортостан Республикаһы Дәүләт Йыйылышы — Ҡоролтайҙан 14 мөрәжәғәт ебәрелгән.
Мәғлүмәттәрҙең күпселеге торлаҡ мәсьәләләренә (3 327) ҡағыла, улар дөйөм мөрәжәғәттәр һанының 33,6 процентын тәшкил итә. Күпселегенең авторы — Бөйөк Ватан һуғышы ветерандары һәм инвалидтары, күп балалы ғаиләләр, пенсионерҙар, ирекһеҙҙән күсеп килеүселәр, төньяҡта эшләүселәр, запасҡа сыҡҡан офицерҙар, иҫке һәм авария хәлендәге торлаҡ хужалары. Байтаҡ мөрәжәғәттәрҙә йәш ғаиләләрҙе торлаҡ менән тәьмин итеү, торлаҡ субсидиялары, кредиттары биреү мәсьәләләре күтәрелә. Алданған өлөшсөләр төҙөүселәр тарафынан договор шарттарын үтәмәүгә зарлана. Ошоға бәйле 129 мөрәжәғәт алынған.
Ошо осорҙа торлаҡ-коммуналь хужалыҡ ойошмаларының ҡыйыҡты йүнәтеү, йылылыҡ һәм һыу менән тәьмин итеү буйынса эшенең ҡәнәғәтләнерлек булмауы, ҡаланы төҙөкләндереү һәм уның санитария торошо, торлаҡ-коммуналь хеҙмәттәр өсөн түләү тураһында 1304 (13%) мөрәжәғәт килгән.
Халыҡты социаль яҡлау мәсьәләһе көнүҙәк булып ҡала. Уға ҡағылған мөрәжәғәттәр 11,7 процентты тәшкил итә. Социаль тәьминәт буйынса 1 162 хат килгән. Бынан тыш, мәғариф мәсьәләләре: мәктәпте үҙгәртеп ойоштороу һәм төҙөкләндереү, уҡытыусыларҙың торлаҡ шарттарын яҡшыртыу, торлаҡ-коммуналь хеҙмәт өсөн түләүгә компенсация юллау, баланы мәктәпкәсә учреждениеларға урынлаштырыу тураһында — 664 (6,6 процент); торлаҡ йорттар, социаль-мәҙәни үҙәктәр төҙөү мәсьәләләре буйынса — 567 (5,7%); агросәнәғәт комплексын үҫтереү йәһәтенән: крәҫтиән (фермер) хужалыҡтарына кредит биреүҙе һорап, агрофирмаларҙағы хәл, ауыл хужалығын үҫтереү буйынса тәҡдимдәр менән — 556 (5,6 %); шәхси торлаҡ төҙөү өсөн ер биреү, ерҙе милеккә алыу, ер участкаларының статусын үҙгәртеү буйынса — 540 (5,4 %); һаулыҡ һаҡлау, медицина ярҙамы күрһәтеү, дауалау учреждениеларын тейешенсә финансламау, дарыу хаҡының ҡиммәт булыуы, бушлай һәм льготалы рецепттар буйынса таратылған препараттар күләменең һәм төрөнөң ҡырҡа кәмеүе, дарыуханаларҙа уларҙың юҡлығы буйынса — 521 (5,2 %); хеҙмәт һәм эш хаҡы мәсьәләләре хаҡында — 428 (4,3 %); мәҙәниәт хеҙмәткәрҙәренән торлаҡ шарттарын яҡшыртыу, дөйөм ятаҡтарҙан бүлмә биреү, китап сығарыуҙа, мәҙәниәт йорттарын төҙөкләндереүҙә булышлыҡ итеүҙе һорап — 260 (2,6 %); сәнәғәт, сауҙа һәм эшҡыуарлыҡ буйынса — 165 (1,6 %); экология һәм тәбиғәттән файҙаланыу мәсьәләләре күтәрелгән 125 (1,2 %) мөрәжәғәт килгән.
Анализлау күрһәтеүенсә, айырыуса Өфө (35 %), Стәрлетамаҡ (15 %), Салауат (12 %) ҡалаларынан, шулай уҡ Өфө (4 %), Иглин (3 %), Туймазы (3 %), Белорет (2 %) райондарынан мөрәжәғәт итеүселәр күп булған.
Башҡортостан Республикаһы Хөкүмәтенең Интернет селтәрендәге htth:/www/pravitelstvorb.ru рәсми порталында граждандарҙы ҡабул итеү буйынса ҡануниәт тураһындағы мәғлүмәттәр, ҡабул итеү графиктары, Башҡортостан Республикаһы Хөкүмәте регламентынан өҙөмтәләр, Башҡортостан Хөкүмәте Аппаратында эш башҡарыу тәңгәлендә инструкция, килгән мөрәжәғәттәргә анализ, бәйләнеш реквизиттары, шулай уҡ республика Хөкүмәтенә Интернет аша мөрәжәғәт итеү ысулы урынлаштырылған. Былтыр электрон почта аша 1 452 кеше (14,6 %) мөрәжәғәт иткән.
Бынан тыш, Башҡортостан Хөкүмәтенә факс буйынса ла мөрәжәғәт итәләр. Бының өсөн махсус 250-46-78 номеры аша былтыр 12 мөрәжәғәт ҡабул ителгән.
Граждандарҙың мөрәжәғәттәре менән эшләү секторы кешеләрҙе етәкселек тарафынан ҡабул итеүгә алдан яҙа. 2012 йылда сектор белгестәре ике меңгә яҡын гражданды ҡабул иткән, уларға тейешле аңлатма һәм консультация биргән, мәсьәләләрҙе хәл итеүҙә ярҙам күрһәткән.
Башҡортостан Республикаһы Хөкүмәте Премьер-министры урынбаҫарҙары халыҡты ай һайын ҡабул итә. Эш графигы Хөкүмәттең ҡабул итеү бүлмәһендә (Өфө ҡалаһы, Туҡай урамы, 46) эленгән. Килеүселәргә уңайлы булһын өсөн бүлмәгә айырым ишек бар. Көн һайын унда яҡынса 20 — 25 кеше килә.
Былтыр Хөкүмәт Премьер-министры урынбаҫарҙары 204 кешене ҡабул иткән.
Эште артабан камиллаштырыу маҡсатында Башҡортостан Хөкүмәте бойороғо менән Премьер-министр урынбаҫарҙары, министрлыҡтар, дәүләт комитеттары һәм ведомстволар тарафынан халыҡты күсмә ҡабул итеү графигы раҫланды. Райондарҙа һәм ҡала округтарында ҡабул итеү ваҡыты хаҡында киң мәғлүмәт сараларында алдан хәбәр ителә. Былтыр Башҡортостан Хөкүмәте Президиумы ағзалары, министрлыҡтар, дәүләт комитеттары һәм ведомстволар тарафынан ошондай 236 сара ойошторолған. Уларҙа йәмғеһе 1 734 кеше ҡабул ителгән.