Философия фәндәре докторы, профессор Валерий Мансуров Рәсәй социологтар йәмғиәте президенты итеп ҡайтанан һайланды. Йәмғиәттең отчет-һайлау съезы 25 октябрҙә Өфөлә “Социология һәм йәмғиәт: глобаль талаптар һәм төбәктәр үҫеше” IV Бөтә Рәсәй социология конгресы сиктәрендә үтте.

Социологтар тотош донъялағы үҙгәрештәрҙең Рәсәйҙәге, уның төбәктәрендәге социаль күренештәргә, атап әйткәндә, шәхестең ҡиммәттәренә, быуындарҙың йәшәү рәүешенә, этностарға, территориаль һәм конфессия берләшмәләренә йоғонтоһон тикшерҙе.
Конгреста Рәсәйҙең ғилми тикшеренеү үҙәктәренән, Мәскәү, Санкт-Петербург, башҡа төбәктәрҙәге мәғариф учреждениеларынан 500-ҙән ашыу ғалим ҡатнашты. Осрашыуға 20 сит ил вәкиле лә килгәйне.
Өфөнөң төп юғары уҡыу йорттарында, ғилми-тикшеренеү институттары менән үҙәктәрендә йәмғиәт үҫешендәге көнүҙәк мәсьәләләр буйынса 20 “түңәрәк өҫтәл”, 11 ғилми, 33 тематик сессия, ике оҫталыҡ дәресе һәм инглиз телендә “БРИКС” илдәрендә социология” тигән махсус сессия үтте.
Һәр секция етәксеһе ошо көндәрҙә үҙҙәренең резолюцияларын Рәсәй социологтар йәмғиәтенә ебәрәсәк. Уларҙы дөйөмләштергәндән һуң социологтар конгрестың берлектәге йомғаҡлау резолюцияһын тәҡдим итәсәк.

* * *
М. Аҡмулла исемендәге Башҡорт дәүләт педагогия университетында “Дин социологияһы: йәмғиәттең дини тормошондағы традицион һәм яңы күренештәр” тигән секция ултырышы булды. Унда Рәсәйҙең күп кенә төбәктәренән билдәле ғалим-социологтар ҡатнашты.
— Социологик тикшеренеүҙәр йәмғиәттәге хәл-күренештәрҙең торошо хаҡында мәғлүмәт бирә, — тине философия фәндәре докторы, М. Аҡмулла исемендәге Башҡорт дәүләт педагогия университеты профессоры Валерий Хажиев. — Дин социологияһы Башҡортостанда айырыуса әһәмиәтле. Беҙҙә рәсми мәғлүмәттәр буйынса 103 этник төркөм, 23 дини ойошма бар. Шуға күрә социология — бөгөн иң төп гуманитар фәндәрҙең береһе. Ул татыулыҡ, толерантлыҡ төшөнсәләрен үҙ эсенә ала.

* * *
Рәсәй дәүләт социаль университетының Өфө филиалында “Оло быуын: ресурстар һәм перспективалар” тигән секция ултырышы үтте. Унда Рәсәй төбәктәренән социологтар, геронтологтар, шулай уҡ Башҡортостандың дәүләт власы органдары вәкилдәре ҡатнашты.
Ғалимдар алдында Башҡортостандың хеҙмәт һәм халыҡты социаль яҡлау министры Ленара Иванова сығыш яһаны. Ул оло быуын мәнфәғәтендәге социаль сәйәсәт, республикала тормошҡа ашырылған проекттар хаҡында һөйләне. Улар иҫәбенә Бөтә донъя һаулыҡ һаҡлау ойошмаһының “Ҡыуаныслы ҡартлыҡ ҡалаһы” проекты ла инә. 2007 йылда Рәсәйҙә тәүгеләрҙән булып Туймазы ҡалаһы ошо проектҡа ҡушылды. Ҡалала өлкәндәрҙең волонтерлыҡ хәрәкәте йылдам үҫә, “Өләсәйҙәр — балаларға”, “50+” программалары эшләй. Оло быуын хаҡына идеологияны үҙгәртеүгә йүнәлтелгән проектҡа былтыр Башҡортостандың барлыҡ ҡалалары ла тиерлек ҡушылды. Тағы ла бер әһәмиәтле социаль проект — “Өлкәндәр өсөн халыҡ университеттары”. Унда 26,5 мең пенсионер белемен камиллаштырған.
“Рәсәй — әүҙем оҙон ғүмер” проектының Башҡортостандағы етәксеһе Рима Шәйҙуллина сәләмәт тормош алып барыуҙы, физик культураны, сәләмәт туҡланыуҙы, кешеләрҙең социаль әүҙемлеген пропагандалауҙы маҡсат итеп ҡуйған ошо проекттың республикала нисек тормошҡа ашырылыуы хаҡында һөйләне. Педагогия фәндәре кандидаты Гөлнара Миңлеғәлиева коллегаларын оло быуынды дөйөм Рәсәй, шулай уҡ төбәк кимәлендә хеҙмәт һәм йәмәғәт эшмәкәрлегенә йәлеп итеү дәрәжәһен өйрәнеүгә арналған социологик тикшеренеүҙәр һөҙөмтәһе менән таныштырҙы.
Секция ултырышында ҡатнашыусылар ололарҙы реабилитациялауға, социаль хеҙмәтләндереүгә, уларға белем биреү һәм мәшғүллеген ойоштороуға ҡағылышлы мәсьәләләрҙе тикшерҙе.