Башҡортостан Президенты Рөстәм Хәмитов “Башҡортостан Республикаһы дәүләт власының башҡарма органдары структураһын камиллаштырыу буйынса саралар тураһында”ғы Указға ҡул ҡуйҙы.

Указ менән министрлыҡтар, дәүләт комитеттары һәм ведомстволары (агентлыҡ, комитет, идаралыҡ, комиссия, инспекциялар) республика башҡарма власть органдарына ҡарай, тип билдәләнә. Документҡа ярашлы, Башҡортостан Президенты республика Хөкүмәте һәм Хөкүмәт ағзалары эшмәкәрлегенә етәкселек итә. Хөкүмәт Премьер-министры урынбаҫарҙары министрҙарҙың, дәүләт комитеттары рәйестәре менән ведомство етәкселәренең эшен көйләй. Башҡортостан Хөкүмәте составында Хөкүмәт Премьер-министрының туғыҙ урынбаҫары, шул иҫәптән беренсе урынбаҫар эшләйәсәк.
Указ менән Элемтә һәм киң коммуникациялар министрлығы, Эшҡыуарлыҡ һәм туризм буйынса дәүләт комитеты бөтөрөлдө. Хеҙмәт һәм халыҡты социаль яҡлау министрлығы Халыҡтың мәшғүллеге дәүләт хеҙмәте идаралығын ҡушыу юлы менән үҙгәртеп ҡоролдо.
Документҡа ярашлы Матбуғат һәм киң мәғлүмәт саралары буйынса агентлыҡ, Республиканың территориаль үҫеше буйынса агентлыҡ, Туризм буйынса агентлыҡ, Мәғлүмәт технологиялары буйынса агентлыҡ төҙөлдө.

* * *

Башҡортостан Президенты Рөстәм Хәмитов республика Хөкүмәте составы тураһындағы Указға ҡул ҡуйҙы.

Уға ярашлы Хөкүмәт составына түбәндәгеләр инде:
Башҡортостан Хөкүмәте Премьер-министрының беренсе урынбаҫары, Башҡортостан Президенты Хакимиәте етәксеһе, Хөкүмәт Премьер-министрының алты урынбаҫары, Хөкүмәт Премьер-министры урынбаҫары — Хөкүмәт Аппараты етәксеһе, Башҡортостан Республикаһының Рәсәй Федерацияһы Президенты ҡарамағындағы Тулы хоҡуҡлы вәкиле — Хөкүмәт Премьер-министры урынбаҫары;
торлаҡ-коммуналь хужалыҡ министры, һаулыҡ һаҡлау министры, ер һәм мөлкәт мөнәсәбәттәре министры, мәҙәниәт министры, урман хужалығы министры, йәштәр сәйәсәте һәм спорт министры, мәғариф министры, тәбиғәттән файҙаланыу һәм экология министры, сәнәғәт һәм инновация сәйәсәте министры, ауыл хужалығы министры, хеҙмәт һәм халыҡты социаль яҡлау министры, финанс министры, иҡтисади үҫеш министры;
Төҙөлөш һәм архитектура буйынса дәүләт комитеты рәйесе, Дәүләт заказдарын урынлаштырыу буйынса дәүләт комитеты рәйесе, Тарифтар буйынса дәүләт комитеты рәйесе, Сауҙа һәм ҡулланыусылар хоҡуғын яҡлау буйынса дәүләт комитеты рәйесе, Транспорт һәм юл хужалығы буйынса дәүләт комитеты рәйесе;
Матбуғат һәм киң мәғлүмәт саралары буйынса агентлыҡ етәксеһе, Территориаль үҫеш буйынса агентлыҡ етәксеһе, Туризм буйынса агентлыҡ етәксеһе, Мәғлүмәт технологиялары буйынса агентлыҡ етәксеһе;
Ветеринария идаралығы начальнигы, Архив эштәре буйынса идаралыҡ начальнигы, Гражданлыҡ хәле акттарын теркәү идаралығы начальнигы, Мәғариф өлкәһендә контроль һәм күҙәтеү буйынса идаралыҡ начальнигы, Мировой судьяларҙың эшмәкәрлеген ойоштороу һәм хоҡуҡ акттары регистрҙарын алып барыу буйынса идаралыҡ начальнигы;
Дәүләт торлаҡ инспекцияһы начальнигы, Үҙйөрөшлө машиналарҙың һәм башҡа төр техниканың техник торошон күҙәтеү буйынса дәүләт инспекцияһы начальнигы, Дәүләт төҙөлөш күҙәтеүе инспекцияһы начальнигы.

* * *

Республика Президенты Рөстәм Хәмитов Башҡортостан Хөкүмәте Премьер-министры урынбаҫарҙарын тәғәйенләү тураһындағы указдарға ҡул ҡуйҙы.

Документҡа ярашлы, Рәүеф Ноғоманов — Хөкүмәт Премьер-министрының беренсе урынбаҫары, Илшат Тажетдинов — Хөкүмәт Премьер-министры урынбаҫары — Хөкүмәт Аппараты етәксеһе, Лилиә Ғүмәрова, Эрнст Исаев, Евгений Маврин, Марат Мәһәҙиев, Салауат Сәғитов, Дмитрий Шаронов Премьер-министр урынбаҫарҙары итеп тәғәйенләнде.

Л. ДӘҮЛИЕВА.

ЭКСПЕРТ ФЕКЕРЕ

Рөстәм ЛАТИПОВ, Башҡортостан Президенты ҡарамағындағы дәүләт хеҙмәте һәм идара итеү академияһының ғилми-тикшеренеүҙәр үҙәге етәксеһе урынбаҫары, сәйәсәт фәндәре докторы:
— Республика Хөкүмәтендә бындай үҙгәрештәрҙең буласағы көтөлгән ваҡиға ине. Ул Рәсәй Федерацияһы сәйәсәтендәге тенденцияларға бәйле. Киләсәктә илдә бер генә Президент, ә субъекттарҙа төбәк башлыҡтары буласаҡ. Ә төбәк башлығы ни өсөн бер үк бурыстарҙы ҡабатларға тейеш? Рөстәм Хәмитов электән Президент аппараты менән Хөкүмәт аппаратында бурыстарҙың ҡабатланыуы, чиновниктарҙың бик күп булыуы тураһында әйтә килде. Әле әйткәндәрен тормошҡа ашырҙы. Минеңсә, был дөрөҫ аҙым.

Тимур САБЛИН, “Симакс” йәмәғәтселек фекерен өйрәнеү үҙәгенең генераль директоры, философия фәндәре кандидаты:
— Әле Башҡортостан алдында еңел булмаған бурыстар тора. Проблемалар етерлек: бюджет ҙур түгел, инвестициялар ҙа теләгән кимәлдә килмәй, юл төҙөлөшө, алданған өлөшсөләр, экология һәм башҡалар. Президент уларҙың барыһын да хәл итеү өсөн ҡулай юлдар эҙләй. Хөкүмәттәге үҙгәрештәр быға булышлыҡ итер тип ышанабыҙ. Чиновниктарҙың 30 процентҡа кәмеүе лә дәүләт идаралығы системаһында һөҙөмтәлелеккә килтерергә тейеш. Әле тәғәйенләнгән Премьер-министр урынбаҫарҙары араһында яңы кешеләр бар. Улар заманса ҡараш, яңы идеялар менән килә. Бер һүҙ менән әйткәндә, был бик ваҡытлы һәм дөрөҫ аҙым.