Хәбәр итеүебеҙсә, республикабыҙ етәкселегенең саҡырыуы буйынса Палдиски ҡалаһы башлығы Каупо Каллас әфәнде етәкселегендәге Эстония делегацияһы Башҡортостанға килде.

Тап Палдиски ҡалаһындағы Рогервик ҡәлғәһендә милли батырыбыҙ Салауат Юлаев ғүмеренең һуңғы 25 йылын үткәргән. Ҡала етәкселеге Башҡортостандың тарихи һәм мәҙәни мираҫын һаҡлап ҡалыуға ҙур иғтибар бирә. Атап әйткәндә, унда һәйкәл ҡуйылған, Салауат Юлаевтың музейы эшләй, урамға һәм паркка батырҙың исеме бирелгән.
Эстония делегацияһы Республика көнөнә арналған байрам сараларында ҡатнашты, Башҡортостан етәкселеге, эшҡыуарлыҡ даирәһе вәкилдәре менән осрашты, шулай уҡ Эстонияның тәүге президенты Константин Пятстың мемориаль таҡтаташына, Салауат Юлаев һәйкәленә сәскә һалды. Башҡортостандың Милли музейында ҡунаҡтарға республика тарихы һәм мәҙәниәте хаҡында һөйләнеләр. Ошо уҡ көндө рәсми делегация Башҡортостан Республикаһы Хөкүмәте Премьер-министры урынбаҫары Салауат Сәғитов, мәҙәниәт министры Әминә Шафиҡова һәм баш ҡала хакимиәте етәкселеге менән осрашты. Эшҡыуарҙар менән аралашыу барышында яҡтар берлектәге проекттар һәм артабанғы хеҙмәттәшлек буйынса тәҡдимдәр индерҙе.
Сәфәр программаһына ярашлы, ошо көндәрҙә делегацияның Салауат ҡалаһына һәм районына сәфәр ҡылыуы күҙаллана.