Бөтә донъя башҡорттары ҡоролтайының башҡарма комитеты ағзалары, сираттағы ултырыш үткәреп, көнүҙәк мәсьәләләр буйынса фекер алышты, уларҙы хәл итеү юлдарын эҙләне, шулай уҡ йәмәғәт ойошмаһына яңы етәксе һайланы.
Көн тәртибенә ярашлы, башта башҡорт телен уҡытыуға бәйле борсоулы хәл тикшерелде. Башҡарма комитеттың милли мәғариф һәм фән буйынса комиссияһы рәйесе, филология фәндәре кандидаты Фәнзил Санъяровтың ошо туралағы сығышынан һуң бик күп кешенең, шул иҫәптән Рәсәйҙең Дәүләт Думаһы депутаты Сәлиә Мырҙабаеваның, Башҡортостандың мәғариф министры Әлфис Ғаязовтың, абруйлы ғалим һәм уҡытыусыларҙың фекере тыңланды. Был турала гәзиттең алдағы һандарының береһендә тулыраҡ мәғлүмәт буласаҡ.
Артабан 112-се Башҡорт кавалерия дивизияһының 70 йыллығына арналған "Өфө — Берлин — Өфө" халыҡ-ара автоуҙышының нисек үтеүе һәм уның халыҡта ватансылыҡ тойғоһон үҫтереүҙәге әһәмиәте хаҡында башҡарма комитет рәйесе урынбаҫары Вәлиәхмәт Бәҙретдинов һөйләне.
Марсель Йосопов башҡарма комитет ағзаларына Рәсәйҙең Дәүләт Думаһы депутаты булараҡ эшмәкәрлегенең күп ваҡыт һәм көс талап итеүен белдерҙе һәм үҙен рәйес вазифаһынан бушатыуҙарын һораны. Ошо уҡ ултырышта асыҡ тауыш биреү һөҙөмтәһендә яңы рәйес итеп билдәле йәмәғәт эшмәкәре Румил Аҙнабаев һайланды. Мәғлүм булыуынса, ул башҡарма комитетҡа 2006 — 2009 йылдарҙа ла етәкселек иткәйне, һуңғы осорҙа рәйестең беренсе урынбаҫары вазифаһында эшләне. Хәҙер иһә беренсе урынбаҫар — дәүләт етәкселеге һәм йәмәғәт ойошмаһы эшмәкәрлегендә бай тәжрибә туплаған Хәләф Ишморатов.