«Минченко консалтинг» федераль коммуникация холдингының «Дәүләт советы 2.0» төбәк башлыҡтарының сәйәси тотороҡлолоғо рейтингы баҫылған.

Башҡортостан Республикаһы Башлығы Радий Хәбиров губернаторҙарҙың «йәшел» зонаһына инде, был уның юғары сәйәси тотороҡлолоғо тураһында һөйләй.

«Минченко консалтинг» коммуникация холдингы президенты Евгений Минченко «Башинформ»ға Башҡортостан Башлығының позициялары нығыныуына ҡарата үҙ фекерен белдерҙе.

— Һуңғы ваҡытта Хәбировтың уңыштары байтаҡ тип уйлайым. Оҙайлы һәм дауамлы сәйәси дистанцияла ул юғары тотороҡлолоҡто һаҡлай. Яңы йүнәлештәр барлыҡҡа килә, мәҫәлән, яһалма зиһен индереү, сәнәғәтте, агросәнәғәт комплексын үҫтереү буйынса ҙур эш алып барыла, бында ла яһалма зиһен ҡулланыла. Радий Хәбиров һәм Башҡортостан Мәскәү һәм Липецк өлкәһе менән бер рәттән төбәктәр араһында яһалма зиһенде үҫтереү повесткаһы лидерҙарҙың береһе булып тора. Республикала Башҡортостан Башлығы ҡарамағында Һанлы үҫеш һәм яһалма зиһен технологияларын индереү мәсьәләләре буйынса совет булдырылды, ул медицинаға, производствоға, дәүләт идаралығына инновациялар индереү өсөн яуап бирә. Эске конфликттар кәмене, — тип билдәләне Евгений Минченко. — Өфө мэрына ҡаршы енәйәт эше Хәбировтың позицияһына зыян килтермәй, сөнки был кеше Радий Фәрит улы командаһынан түгел һәм үҙ ваҡытында уны тәғәйенләү тураһында ҡарар төбәк элиталары менән компромисслы килешеүҙәр һөҙөмтәһе булып тора.

Рейтингҡа ярашлы, Башҡортостан Башлығы халыҡ-ара тректа әүҙемлек күрһәтә. Быға айырыуса Тажикстан һәм Үзбәкстан менән тышҡы иҡтисади бәйләнештәрҙе нығытыу булышлыҡ итте.

Губернаторҙарҙың тотороҡлолоҡ рейтингы («Дәүләт советы 2.0») 9 критерий буйынса бирелгән баһалар буйынса төҙөлә. Йомғаҡлау баһаһы юғарыраҡ булған һайын, губернаторҙың үҙ вазифаһында ҡалыу мөмкинлеге лә юғары. Башҡортостан Башлығы Радий Хәбиров «Дәүләт советы 2.0» рейтингында «һары»нан сәйәси яҡтан тотороҡло «йәшел зонаға» күтәрелде (2025 йылдың сентябрендә 12 балл булһа, хәҙер 16 балл).