Башҡортостанда социаль яҡланмаған үҫмерҙәр өсөн эш урындары тураһында закон ҡабул ителде

Башҡортостан Дәүләт Йыйылышы – Ҡоролтай «Башҡортостан Республикаһында бала хоҡуҡтарының төп гарантиялары тураһында» Башҡортостан Республикаһы Законының 11-се статьяһына үҙгәрештәр индереү тураһында» закон ҡабул итте, тип хәбәр итә матбуғат хеҙмәте.

– Закон социаль яҡлауға мохтаж бәлиғ булмаған граждандарға эшкә урынлашыу хоҡуғын бирә, – тип белдерҙе Дәүләт Йыйылышы рәйесе Константин Толкачев. – Ошо маҡсатта граждандарҙың әлеге категориялары өсөн эштәрҙең (һөнәрҙәрҙең) айырым төрҙәре резервҡа ҡалдырыла һәм эшкә урынлашыу өсөн эш урындары һаны билдәләнә.

Парламент спикеры фекеренсә, эшкә урынлашыу мөмкинлеге үҫмерҙәргә оло тормошҡа дөрөҫ аҙым яһарға ярҙам итәсәк.

– Етемдәр, аҙ тәьмин ителгән ғаиләләрҙәге үҫмерҙәр, бәлиғ булмағандар эштәре буйынса комиссияларҙа иҫәптә торған балалар хәүеф төркөмөнә ҡарай, – тине Константин Толкачев. – Уларҙың ҡайһы берҙәре, легаль аҡса эшләү мөмкинлеге булмағанлыҡтан, «еңел» аҡсаға алданыуы һәм енәйәт юлына баҫыуы ихтимал. Гарантиялы эш урыны – хеҙмәт хаҡы ғына түгел. Хеҙмәт дисциплина, яуаплылыҡ тәрбиәләй, финанс белеменә өйрәтә.

Закон Башҡортостан Республикаһы Башлығына ҡултамға ҡуйыу өсөн ебәрелгән.

https://www.bashinform.ru/news/politics/2026-03-04/v-bashkirii-prinyat-zakon-o-rabochih-mestah-dlya-sotsialno-uyazvimyh-podrostkov-4601365