Радий Хәбиров республика хөкүмәтенә ошондай күрһәтмә бирҙе.

Башҡортостан Башлығы Радий Хәбиров республика Дәүләт Йыйылышы – Ҡоролтайға Мөрәжәғәтнамә менән сығыш яһағанда махсус хәрби операция бурыстарын уңышлы хәл итеү өсөн оборона-сәнәғәт комплексын нығытыу мөһим йүнәлеш булып тороуын билдәләне. Уның һүҙҙәренсә, бөгөн республика биләмәһендә оборона-сәнәғәт комплексы предприятиелары дәүләт оборона заказын теүәл үтәй – еңеү өсөн барыһын да эшләй.

«Республика хөкүмәтенә предприятиеларҙың иң яҡшы хеҙмәт коллективтарына генерал Шайморатов орденын биреү буйынса тәҡдимдәр әҙерләү, ә Башлыҡ хакимиәтенә дәүләт наградалары тураһында положениеға үҙгәрештәр индереү бурысын йөкмәтәм.

Төп бурыстарҙың береһе — был предприятиеларҙы кадрҙар менән тәьмин итеү. Беҙ был мәсьәләне «Ростех» предприятиелары, атап әйткәндә, Өфө моторҙар эшләү берекмәһе менән уңышлы хәл итәбеҙ, колледждарға тейешле һөнәрҙәргә ҡабул итеүҙе арттырабыҙ. Был эште дауам итергә һәм ярҙам күрһәтергә кәрәк», — тине республика етәксеһе.

Ул шулай уҡ республика биләмәһендә урынлашҡан һәм оборона заказы өсөн эшләгән, шул иҫәптән эре федераль структуралар составына ингән предприятиеларҙың иғтибар үҙәгендә булырға тейешлеген әйтте. 

«Ғөмүмән, иҡтисадыбыҙҙы нығытыу махсус хәрби операция бурыстарын уңышлы хәл итеү өсөн нигеҙ булып тора, ул «фронтҡа бөтә нәмә, Еңеү өсөн бөтә нәмә» бирергә тейеш. Инвестицияларҙы әүҙемерәк йәлеп итергә, предприятиеларҙы модернизациялау менән шөғөлләнергә, сәнәғәт кластерҙарын, индустриаль һәм технопарктарҙы, өҫтөнлөклө зоналарҙы үҫтерергә кәрәк. «Ростех», «Башнефть», «Система» акционерҙар финанс корпорацияһы, ИнтерРАО, «Газпром», Урал тау-металлургия компанияһы менән берлектәге эш төркөмдәренең эшен көсәйтергә», — тине Радий Хәбиров Дәүләт Йыйылышына Мөрәжәғәтнамәһендә.

https://www.bashinform.ru/news/politics/2026-01-30/orden-generala-shaymuratova-budut-prisvaivat-trudovym-kollektivam-bashkirii-4557117