Искәндәр Әхмәтвәлиев Башҡортостан Башлығы хакимиәте етәксеһе вазифаһын башҡарыусы итеп тәғәйенләнде

Дүшәмбе Радий Хәбиров үҙенең указы менән республика Башлығы хакимиәте етәксеһе вазифаһын башҡарыу бурысын етәксе урынбаҫары Искәндәр Әхмәтвәлиевҡа йөкмәтте. Был мәғлүмәтте Башҡортостан Башлығы хакимиәтендә раҫланылар.

Азат Бадранов, элеккесә, хакимиәт етәксеһенең эске сәйәсәт буйынса беренсе урынбаҫары вазифаһын биләй.

Әхмәтвәлиев Искәндәр Рәүеф улы 1975 йылда Өфөлә тыуған. Өфө дәүләт сәнғәт институтын, республика Президенты ҡарамағындағы Башҡортостан дәүләт хеҙмәте һәм идара итеү академияһын тамамлаған.

Милли йәштәр театрында актер, Өфө «Нур» дәүләт татар театрында ҡуйыусы режиссер булып эшләй. 2007-2008 йылдарҙа – «Башинформ» мәғлүмәт агентлығының генераль директоры урынбаҫары. 2008-2010 йылдарҙа – З.Исмәғилев исемендәге Өфө дәүләт сәнғәт академияһының режиссура кафедраһында өлкән уҡытыусы. 2010-2011 йылдарҙа – «Башинформ» мәғлүмәт агентлығының баш мөхәррире урынбаҫары.

2011–2019 йылдарҙа – Башҡортостан Президентының Граждандарҙың һәм ойошмаларҙың мөрәжәғәттәре менән эшләү идаралығында бүлек мөдире, идаралыҡ начальнигы урынбаҫары, Башҡортостан Республикаһы Башлығының Граждандарҙың мөрәжәғәттәре менән эшләү һәм уларҙы ҡабул итеү идаралығы начальнигы, Башҡортостан Республикаһы Башлығының Муниципаль берәмектәр менән үҙ-ара эш итеү идаралығы начальнигы.

2019 йылдан Башҡортостан Республикаһы Башлығы хакимиәте етәксеһе урынбаҫары вазифаһында эшләй.

https://www.bashinform.ru/news/politics/2025-08-11/i-o-rukovoditelya-administratsii-glavy-bashkirii-stal-iskander-ahmetvaleev-4345913