Башҡортостан Башлығы Андрей Назаровты «Хеҙмәт ҡаһарманлығы өсөн» миҙалы менән бүләкләне

Башҡортостан Башлығы Радий Хәбиров республика хөкүмәтенең оператив кәңәшмәһендә премьер-министр Андрей Назаровты 55 йәшлек юбилейы менән ҡотланы. Андрей Геннадьевич 6 йыл ошо вазифала эшләй һәм тап ошо осорҙа Башҡортостан яҡшы һөҙөмтәләр күрһәтә, тип белдерҙе республика етәксеһе.

— Беҙ барыбыҙ ҙа Андрей Геннадьевичты күптән беләбеҙ. Һеҙ ғүмерегеҙ буйына төрлө вазифаларҙа республика мәнфәғәте өсөн эшләйһегеҙ, һәр ваҡыт ихлас, иң мөһиме, һөҙөмтәле эшләйһегеҙ. Һеҙгә иптәш, етәксе, хөкүмәтебеҙ эшен ойоштороусы булараҡ рәхмәт белдерәм, — тине Радий Хәбиров. — Башҡортостанды нисек яратыуығыҙҙы һәм республиканың алдынғы булһын өсөн тырышыуығыҙҙы беләм.

Башҡортостан Башлығы премьер-министрҙы «Хеҙмәт ҡаһарманлығы өсөн» миҙалы менән бүләкләү тураһында указға ҡул ҡуйыуын белдерҙе һәм уға ошо награданы тапшырҙы. Андрей Назаров Радий Хәбировҡа уның хеҙмәтен юғары баһалағаны һәм тыуған республикаһы мәнфәғәтенә эшләү мөмкинлеге өсөн рәхмәт әйтте.

— Һәр ваҡыт намыҫлы эшләргә, һөҙөмтәгә ирешергә, эш менән Башҡортостанға һөйөүемде раҫларға һәм һеҙ күрһәткән ышанысты аҡларға тырыштым, – тип билдәләне Андрей Назаров. – Һөҙөмтәле эш өсөн хөкүмәт ағзаларына рәхмәт һүҙҙәремде еткерәм. Муниципалитет башлыҡтарына айырым рәхмәт.

https://www.bashinform.ru/news/politics/2025-04-28/glava-bashkirii-nagradil-andreya-nazarova-medalyu-za-trudovuyu-doblest-4215959